ସୀତାରାମ ଅଗ୍ରୱାଲ
ବାଣପୁର: ଗତକାଲି ମଧ୍ୟରାତ୍ରିରେ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ମାଣିକପୁର ଗ୍ରାମ ଛକ ନିକଟରେ ଏକ ଅଭାବନୀୟ ଘଟଣା ଘଟିଯାଇଛି। ଭାରସାମ୍ୟ ହରାଇ ଏକ ମହିନ୍ଦ୍ରା ପିକ ଅପ ଗାଡ଼ି ୫୦ ଫୁଟ ତଳେ ଏକ ନଦୀ ଭିତରେ ଖସିପଡିଛି।
ସୂଚନା ମୁତାବକ ଗତକାଲି ଭୁବନେଶ୍ୱରରୁ ଓଡ଼ି-୦୫ ଏଚ ୧୬୨୮ ନମ୍ବର ବିଶିଷ୍ଟ ଏକ ମହିନ୍ଦ୍ରା ପିକ ଅପ ଗାଡ଼ି ରଙ୍ଗ ଜିନିଷ ନେଇ ଆସ୍କା ଯାଇଥିଲା। ଏବଂ ଆସ୍କାରୁ ଜିନିଷ ଖାଲି କରି ୧୬ ନମ୍ୱର ଜାତୀୟ ରାଜପଥ ଜାମ ଥିବାରୁ ଗାଡିଟି ବେଗୁନିଆପଡା- ଅଙ୍ଗାରଗାଁ- ବାଣପୁର ହୋଇ ଭୁବନେଶ୍ୱର ଫେରୁଥିଲା। ପାଖାପାଖି ରାତି ଦୁଇ ଘଟିକାରେ ଗାଡ଼ି ଚାଳକଙ୍କ ଆଖି ପଡିଯିବାରୁ ମାଣିକପୁର ଛକ ବୁଲାଣି ନିକଟସ୍ଥ ଶାଳିଆ ନଦୀ ଭିତରକୁ ପ୍ରାୟ ପଚାଶ ଫୁଟ ତଳକୁ ଗାଡିଟି ଖସିପଡିଥିଲା। ସୌଭାଗ୍ୟବଶତଃ ଗାଡ଼ି ଚାଳକ ଗୁରୁଦେବ ପରିଆ ଏବଂ ତାଙ୍କ ସହଯୋଗୀଙ୍କ କିଛି କ୍ଷୟକ୍ଷତି ହୋଇନାହିଁ। ହେଲେ ବର୍ତ୍ତମାନ ସୁଦ୍ଧା ଗାଡିଟି ନଦୀ ଭିତରେ ପଡି ରହିଥିବାର ସୂଚନା ରହିଛି।
