ଭୁବନେଶ୍ୱର: ଆଜି ଶକ୍ତି ବିଭାଗ ସମ୍ମିଳନୀ କକ୍ଷଠାରେ ଓଡ଼ିଶା ଶକ୍ତି ସଂଚାରଣ ନିଗମର କାର୍ଯ୍ୟକ୍ରମ ଉପରେ ଏକ ସମୀକ୍ଷା ବୈଠକ ଶକ୍ତିମନ୍ତ୍ରୀ ଶ୍ରୀ ପ୍ରତାପ କେଶରୀ ଦେବଙ୍କ ଅଧ୍ୟକ୍ଷତାରେ ଆୟୋଜିତ ହୋଇଯାଇଛି। ରାଜ୍ୟରେ ବୃଦ୍ଧି ପାଉଥିବା ଶକ୍ତି ଚାହିଦା ଉପରେ ଆଲୋକପାତ କରି ମନ୍ତ୍ରୀ ଶ୍ରୀ ଦେବ ସଂପ୍ରତି ରାଜ୍ୟ ସରକାର ରାଜ୍ୟରେ ଶିଳ୍ପାୟନ ଉପରେ ଅଧିକ ଗୁରୁତ୍ୱ ପ୍ରଦାନ କରୁଥିବା ପରିପ୍ରେକ୍ଷୀରେ ଅଧିକ ଶକ୍ତି ଉତ୍ପାଦନର ଆବଶ୍ୟକତା ରହିଥିବା କହିଥିଲେ।
ତେଣୁ ସେ ଆଗକୁ ଅଧିକ ଶକ୍ତି ଉତ୍ପାଦନ ପାଇଁ ପ୍ରକଳ୍ପ ପ୍ରସ୍ତୁତ କରିବା ଏବଂ ସେଥି ପାଇଁ ବଜେଟ୍ ବ୍ୟବସ୍ଥା କରିବାକୁ ପରାମର୍ଶ ଦେଇଥିଲେ। ଶକ୍ତି ନଥିଲେ ଶିଳ୍ପ ହୋଇପାରିବ ନାହିଁ, ତେଣୁ ବିକାଶର ପ୍ରତିଟି ଉପାଦାନ ପାଇଁ ଶକ୍ତିର ଆବଶ୍ୟକତା ରହିଛି ବୋଲି ସେ କହିଥିଲେ। ସୌର ଶକ୍ତିର ଉତ୍ପାଦନ ହେଉ ଅବା ଅନ୍ୟ ଅଣପାରମ୍ପରିକ ଶକ୍ତି, ଆମକୁ ସେଥିପ୍ରତି ବିଶେଷ ଗୁରୁତ୍ୱ ଦେବାକୁ ହେବ ବୋଲି ସେ କହିଥିଲେ। ଲୋକେ ଗୁଣାତ୍ମକ ବିଦୁ୍ୟତ ସେବା ଉପରେ ଅଧିକ ସଚେତନ, ତେଣୁ ବିଭାଗ ସେଥିପ୍ରତି ଯନିବାନ ହେବାକୁ ସେ ଗୁରୁତ୍ୱ ଦେଇଥିଲେ। ବିଶେଷ ଭାବେ ପଶ୍ଚିମ ଓଡ଼ିଶାରେ ଦ୍ରୁତ ଶିଳ୍ପାୟନ ହେଉଥିବା ଏବଂ ସେ ଅଞ୍ଚଳରେ ଶକ୍ତି ଚାହିଦା ଅଧିକ ଥିବା ହେତୁ ଏହି ଚାହିଦା ପୂରଣ କରିବାକୁ ପଦକ୍ଷେପ ନେବାକୁ ସେ ବିଭାଗୀୟ ଅଧିବାସୀମାନଙ୍କୁ କହିଥିଲେ।
ଅବିଚ୍ଛିନ୍ନ ବିଦୁ୍ୟତ ଯୋଗାଣ ପାଇଁ ୨୦୧୫-୧୬ ଆର୍ଥିକ ବର୍ଷରେ ହାତକୁୁ ନିଆଯାଇଥିବା ରେଡିଆଲ୍ ଗ୍ରୀଡ଼୍କୁ ରିଙ୍ଗ ମୋଡ୍ରେ ପରିବର୍ତ୍ତନ କରିବା ପ୍ରକି୍ରୟା ଏଯାବତ୍ ୧୨ଟି ପ୍ରକଳ୍ପ ମଧ୍ୟରୁ ପାରଳାଖେମୁଣ୍ଡି-ଆର୍ ଉଦୟଗିରି, ବୌଦ୍ଧ-ଫୁଲବାଣୀ ଏବଂ ଘେଁସ-ପଦମ୍ପୁର ପ୍ରକଳ୍ପ ପାଇଁ ଜଙ୍ଗଲ ଜମି ସମସ୍ୟା ରହିଥିବା ବୈଠକରେ ପ୍ରକାଶ କରାଯାଇଥିଲା। ଅନ୍ୟଗୁଡ଼ିକର କାର୍ଯ୍ୟ ପ୍ରାୟତଃ ଶେଷ ପର୍ଯ୍ୟାୟରେ ପହଞ୍ଚିଛି। ସେହିପରି ଉପକୂଳବର୍ତ୍ତୀ ଜିଲ୍ଲାଗୁଡ଼ିକ ବାତ୍ୟା ପ୍ରତିରୋଧୀ ବିଦୁ୍ୟତିକରଣ କାର୍ଯ୍ୟରେ ୬ଟି ପ୍ରକଳ୍ପ ମଧ୍ୟରୁ ୫ଟି ସରିଥିବାବେଳେ ଚାନ୍ଦବାଲି-ଧାମରା ୧୩୨ କେଭି ଲାଇନ୍ କାର୍ଯ୍ୟ ଚାଲୁଥିବା କୁହାଯାଇଥିଲା।
ବିପର୍ଯ୍ୟୟ ମୁକାବିଲା ନିମନ୍ତେ ତ୍ୱରିତ ବିଦୁ୍ୟତସେବା ସ୍ୱାଭାବିକ କରିବା ଉଦ୍ଦେଶ୍ୟରେ ରାଜ୍ୟର କେତୋଟି ସ୍ଥାନରେ ବିପର୍ଯ୍ୟୟ ମୁକାବିଲା କେନ୍ଦ୍ର ପ୍ରତିଷ୍ଠା ପାଇଁ ୧୫୧.୩୩ କୋଟି ବ୍ୟୟ ଅଟକଳରେ ୨୦୧୫-୧୬ ମସିହାରେ କାର୍ଯ୍ୟ ହାତକୁ ନିଆଯାଇଥିଲା। ସେଥି ମଧ୍ୟରୁ ଡୁବୁରୀଠାରେ କାର୍ଯ୍ୟ ନିର୍ମାଣାଧୀନ ଥିବାବେଳେ ଚନ୍ଦକା, ବାଲେଶ୍ୱର, ବଲାଙ୍ଗିର, ଖୋର୍ଦ୍ଧା, ଯାଜପୁର ରୋଡ଼୍, ନରେନ୍ଦ୍ରପୁର, ସମ୍ବଲପୁର, ଚାନ୍ଦପୁର ଓ ଜୟନଗରଠାରେ ନିର୍ମାଣ କାର୍ଯ୍ୟ ସରିଥିବା ଜଣାପଡ଼ିଛି । କେତେକ ସ୍ଥାନରେ ଶକ୍ତିଭାର ଅଧିକ ଥିବାବେଳେ ଅନ୍ୟ କେତେକ ସ୍ଥାନରେ କମ୍ ଥିବା ରିପୋର୍ଟରୁ ଜଣାପଡ଼ିଥିବା ଦର୍ଶାଇ ସେଥିରେ କିପରି ସୁଧାର ଅଣାଯାଇପାରିବ ତା’ଉପରେ ଅଧିକ ଗୁରୁତ୍ୱ ଦେବାକୁ ବିଭାଗୀୟ ପ୍ରମୁଖ ଶାସନ ସଚିବ ଶ୍ରୀ ନିକୁଞ୍ଜ ବିହାରୀ ଧଳ ନିର୍ଦ୍ଦେଶ ଦେଇଥିଲେ।
ଭୁବନେଶ୍ୱର-କଟକ ଟୁଇନ୍ ସିଟି ମଧ୍ୟରେ ବ୍ୟାପକ ବିକାଶ ଯୋଜନା (ସିଡିପି) ଅଧୀନରେ ଭୂତଳ କେବୁଲିଂ ଏବଂ ବିକଳ୍ପ ବିଦୁ୍ୟତ ସେବା ଲାଇନ୍ ବ୍ୟବସ୍ଥା କରିବାକୁ ୧୪୯୨.୦୭ କୋଟି ଟଙ୍କା ବିନିଯୋଗରେ ୧୩ଟି ପ୍ରକଳ୍ପ କାର୍ଯ୍ୟ କାର୍ଯ୍ୟକାରୀ କରାଯାଇଛି । ସେଥିରେ କଟକ, ବିଡ଼ାନାସୀ, ପ୍ରତାପଶାସନ, ସିଡିଏ, ୟୁନିଟ୍-୮, ମଞ୍ଚେଶ୍ୱର, ଗୋଡ଼ିସାହି କାର୍ଯ୍ୟ ସରିଥିବାବେଳେ ନୂଆପଡ଼ା-ପ୍ରତାପଶାସନ, କଣ୍ଟାବାଡ଼, ସତ୍ୟନଗର, ବଡଗଡ଼ ଓ ବାଲିଅନ୍ତାଠାରେ ନିର୍ମାଣ କରାଯାଉଥିବା ୧୩୨ ଏବଂ ୨୨୦ କେଭି ସବ୍ଷ୍ଟେସନ୍ କାର୍ଯ୍ୟ ନିର୍ମାଣାଧିନ ରହିଛି । ୨୦୨୧-୨୨ରେ ବିଭାଗ ଦ୍ୱାରା ୨୦୮୫ ଏମ୍ଭିଏ କ୍ଷମତାବିଶିଷ୍ଟ ୨୯୫.୧୧ ସର୍କିଟ କିମି ଦୈର୍ଘ୍ୟ ବିଦୁ୍ୟତଲାଇନ୍ ବିଛାଇବା, ସମୁଦାୟ ୪୬୫.୯୮୮ ସର୍କିଟ୍ କିମି ସ୍ୱତନ୍ତ୍ର ଲାଇନ୍ ଏବଂ ଶିଳ୍ପାଞ୍ଚଳ ସକାଶେ ୧୨୬.୩୭୪ ସର୍କିଟ୍ କିମି ଲାଇନ୍ ବିଛାଇବା କାର୍ଯ୍ୟ କରାଯାଇଛି ।
ସୌରଶକ୍ତି ଉପରେ ଆଖିଦୃଶିଆ ବିକାଶ ହୋଇ ନପାରିବା ହେତୁ ରାଜ୍ୟ କର୍ମସଂସ୍ଥାନ ସୁଯୋଗ ହରାଉଥିବା ନେଇ ସମୀକ୍ଷାରେ ଉଦ୍ବେଗ ପ୍ରକାଶ କରାଯାଇଥିଲା । ମନ୍ତ୍ରୀ ଶ୍ରୀ ଦେବ ବୈଷୟିକ ବ୍ୟବସ୍ଥା ଉପଯୋଗରେ କାର୍ଯ୍ୟାଳୟକୁ ଅଧିକ ପାରଦର୍ଶୀ କରିବା ଏବଂ କାଗଜମୁକ୍ତ କରିବାକୁ ପରାମର୍ଶ ଦେଇଥିଲେ । ସେହିପରି ପର୍ଯ୍ୟାୟ କ୍ରମେ ଯନ୍ତ୍ରୀ ପଦବୀଗୁଡ଼ିକ ପୂରଣ କରିବା ଉପରେ ସମୀକ୍ଷାରେ ଗୁରୁତ୍ୱାରୋପ କରାଯାଇଥିଲା ।
ଏହି ବୈଠକରେ ଓପିଟିସିଏଲ୍ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଶ୍ରୀ ସଂଜୟ ମିଶ୍ର, ନିର୍ଦ୍ଦେଶକ ଶ୍ରୀ ଉପେନ୍ଦ୍ର କୁମାର ପତି, ଅତିରିକ୍ତ ସଚିବ ଶ୍ରୀମତୀ ଲିପ୍ସା ଦାସଙ୍କ ସମେତ ବରିଷ୍ଠ ଅଧିକାରୀମାନେ ଉପସ୍ଥିିତ ଥିଲେ ।