ନୂଆଦିଲ୍ଲୀ: ସପ୍ତାହର ପ୍ରଥମ କାରବାର ଦିନରେ ଭାରତୀୟ ସେୟାର ବଜାରରେ ବଡ଼ ଧରଣର ବିପର୍ଯ୍ୟୟ ଦେଖିବାକୁ ମିଳିଛି। ବଜାର ଖୋଲିବା ମାତ୍ରକେ ବିକ୍ରିର ପ୍ରବଳ ଚାପ ଯୋଗୁଁ ବମ୍ବେ ଷ୍ଟକ୍ ଏକ୍ସଚେଞ୍ଜ (BSE)ର ସେନସେକ୍ସ ୭୦୦ ପଏଣ୍ଟରୁ ଅଧିକ ହ୍ରାସ ପାଇ ୭୩,୧୭୨ ସ୍ତରକୁ ଖସି ଆସିଥିବା ବେଳେ, ନ୍ୟାସନାଲ ଷ୍ଟକ୍ ଏକ୍ସଚେଞ୍ଜ (NSE)ର ନିଫ୍ଟି ୨୧୯ ପଏଣ୍ଟ ହ୍ରାସ ପାଇ ୨୨,୯୯୧ ରେ ପହଞ୍ଚିଛି। ଏହି କ୍ରାସ୍ ଯୋଗୁଁ ମାତ୍ର କିଛି ମିନିଟ୍ ମଧ୍ୟରେ BSE ରେ ତାଲିକାଭୁକ୍ତ କମ୍ପାନୀଗୁଡ଼ିକର ମୋଟ ବଜାର ପୁଞ୍ଜି ୪,୮୧,୮୮,୯୯୮ କୋଟି ଟଙ୍କାରୁ ହ୍ରାସ ପାଇ ୪,୭୭,୫୯,୧୧୭ କୋଟି ଟଙ୍କାକୁ ଖସି ଆସିଛି, ଯାହା ଦ୍ୱାରା ନିବେଶକମାନେ ପ୍ରାୟ ୪.୩ ଲକ୍ଷ କୋଟି ଟଙ୍କା ହରାଇଛନ୍ତି।
ଏହି ବଡ଼ ହ୍ରାସ ପଛରେ ମୁଖ୍ୟତଃ ଭୂ-ରାଜନୈତିକ ଉତ୍ତେଜନା ଏବଂ ତୈଳ ସଙ୍କଟ ଦାୟୀ ରହିଛି। ଇରାନ ଏହାର ବନ୍ଦରଗୁଡ଼ିକ ଉପରୁ ନୌସେନା ଅବରୋଧ ହଟାଇବା ବଦଳରେ ଗୁରୁତ୍ୱପୂର୍ଣ୍ଣ ଜାହାଜ ପଥ ‘ହର୍ମୁଜ୍ ପ୍ରଣାଳୀ’କୁ ବାଣିଜ୍ୟିକ ଜାହାଜ ପାଇଁ ଖୋଲିବାକୁ ସର୍ତ୍ତ ରଖିଥିଲା। ତେବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ପ୍ରସ୍ତାବକୁ ଅଗ୍ରାହ୍ୟ କରିଦେବାରୁ ଯୋଗାଣ ବାଧାପ୍ରାପ୍ତ ହେବା ନେଇ ଚିନ୍ତା ବଢ଼ିଯାଇଛି। ଫଳରେ ଅନ୍ତର୍ଜାତୀୟ ବଜାରରେ ବ୍ରେଣ୍ଟ କ୍ରୁଡ୍ ତେଲ ଦର ୧.୫% ରୁ ୨% ବୃଦ୍ଧି ପାଇ ବ୍ୟାରେଲ ପ୍ରତି $105.64 ରୁ $106.20 ରେ ପହଞ୍ଚିଥିବା ବେଳେ US WTI ମଧ୍ୟ $93.55 କୁ ବୃଦ୍ଧି ପାଇଛି, ଯାହା ଭାରତ ପରି ଆମଦାନୀ-ନିର୍ଭରଶୀଳ ଦେଶର ଅର୍ଥନୀତି ଉପରେ ଚାପ ସୃଷ୍ଟି କରିଛି।
ଏହା ବ୍ୟତୀତ ବିଦେଶୀ ସଂସ୍ଥାଗତ ନିବେଶକ (FII)ଙ୍କ ଦ୍ୱାରା ଜାରି ରହିଥିବା କ୍ରମାଗତ ବିକ୍ରି ଏବଂ ଆମେରିକା ସୁଧ ହାରର ଚାପ ବଜାରକୁ ଆହୁରି ତଳକୁ ଟାଣିଆଣିଛି। ଆଜିର କାରବାରରେ ବ୍ୟାଙ୍କିଂ, FMCG ଏବଂ ରିଅଲ୍ଟି ଷ୍ଟକଗୁଡ଼ିକରେ ସବୁଠାରୁ ଅଧିକ ବିକ୍ରି ଦେଖିବାକୁ ମିଳିଛି, ଯେଉଁଥିରେ HDFC ବ୍ୟାଙ୍କ, ବଜାଜ ଫାଇନାନ୍ସ ଏବଂ ଷ୍ଟେଟ୍ ବ୍ୟାଙ୍କ (SBI) ସବୁଠାରୁ ଅଧିକ କ୍ଷତିସହିଛନ୍ତି। ବଜାରର ୧୬ଟି ପ୍ରମୁଖ କ୍ଷେତ୍ର ମଧ୍ୟରୁ ୧୪ଟି କ୍ଷେତ୍ର ଲାଲ ରଙ୍ଗରେ କାରବାର କରୁଥିବା ବେଳେ ମିଡକ୍ୟାପ୍ ଏବଂ ସ୍ମଲକ୍ୟାପ୍ ସୂଚକାଙ୍କ ମଧ୍ୟ ୦.୨% ହ୍ରାସ ପାଇଛି।
ବଜାର ବିଶେଷଜ୍ଞଙ୍କ ମତରେ, ବୈଶ୍ୱିକ ଅସ୍ଥିରତା ଏବଂ ତୈଳ ଦର ବୃଦ୍ଧି ହେତୁ ଆଗାମୀ କିଛି ଦିନ ବଜାରରେ ଏହିପରି ଦୋହଲିବା ସ୍ଥିତି ଜାରି ରହିପାରେ। ଏପରି ସ୍ଥିତିରେ ନିବେଶକମାନଙ୍କୁ ଭୟଭୀତ ହୋଇ ସେୟାର ବିକ୍ରି ନକରିବାକୁ, ମୌଳିକ ଭାବେ ମଜବୁତ୍ ଥିବା କମ୍ପାନୀଗୁଡ଼ିକରେ କ୍ରମାନ୍ୱୟରେ ନିବେଶ କରିବାକୁ ଏବଂ ସ୍ୱଳ୍ପମିଆଦୀ ବ୍ୟବସାୟୀମାନଙ୍କୁ କଡ଼ା ଷ୍ଟପ୍-ଲସ୍ (Stop-loss) ସହିତ କାରବାର କରିବାକୁ ପରାମର୍ଶ ଦିଆଯାଇଛି।