ସୀତାରାମ ଅଗ୍ରୱାଲ
ଟାଙ୍ଗୀ: ୨୪ ଘଣ୍ଟା ମଧ୍ୟରେ ଅପହୃତା ଦୁଇ ନାବାଳିକାଙ୍କୁ ଟାଙ୍ଗୀ ପୋଲିସ ଆନ୍ଧ୍ରପ୍ରଦେଶରୁ ଉଦ୍ଧାର କରିଛି। ଏହାସହିତ ଦୁଇ ଜଣ ଅଭିଯୁକ୍ତଙ୍କୁ ମଧ୍ୟ ପୋଲିସ ଗିରଫ କରିଛି।
ପୋଲିସ ସୂଚନା ଅନୁଯାୟୀ, ଟାଙ୍ଗୀ ଥାନା କୁହୁଡି ଅଂଚଳର ୨ ଜଣ ନାବାଳିକାଙ୍କୁ ପ୍ରଲୋଭନ ଦେଖାଇ ସେହି ଗାଁର ୨ ଜଣ ଯୁବକ ଅପହରଣ କରି ନେଇଥିଲେ। ଅପହରଣ ହୋଇଥିବା ନେଇ ପରିବାର ଲୋକେ ଗତ ୧ ତାରିଖରେ ଟାଙ୍ଗୀ ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ କୁହୁଡି ଫାଣ୍ଡି ଅଧିକାରୀ ନିରଞ୍ଜନ ରାଉତଙ୍କ ନେତୃତ୍ବରେ ଏକ ଟିମ୍ ଗଠନ ହୋଇ ପୋଲିସ୍ ତୁରନ୍ତ ତଦନ୍ତ ଆରମ୍ଭ କରିଥିଲା। ଏହାପରେ ଉଭୟ ଅପହରଣକାରୀ ନାବାଳିକା ଦ୍ୱୟଙ୍କୁ ଟ୍ରେନରେ ଆନ୍ଧ୍ର ପ୍ରଦେଶ ନେଉଥିବା ପୋଲିସ୍ ଜାଣିବାକୁ ପାଇଥିଲା।
ତେଣୁ ଆନ୍ଧ୍ର ପୋଲିସ୍ ଓ ରେଳବାଇ ପୋଲିସ୍ ସହାୟତାରେ ନାଵାଳିକା ଦ୍ୱୟଙ୍କୁ ବିଶାଖାପାଟଣାମ୍ ନିକଟସ୍ଥ ଟୁନି ଷ୍ଟେସନରୁ ପୋଲିସ୍ ଉଦ୍ଧାର କରିଥିଲା। ଏହା ସହ ନାବାଳିକା ଅପହରଣ ଅଭିଯୋଗରେ ସୋରଣ ଗ୍ରାମର ୨ ଅପହରଣକାରୀ ଯୁବକ ଵିକ୍ରମ ନାୟକ ଓ ପ୍ରତାପ ବେହେରାଙ୍କୁ ଗିରଫ କରିବାରେ ପୋଲିସ୍ ସକ୍ଷମ ହୋଇଛି। ନାବାଳିକାଦ୍ୱୟଙ୍କୁ ପରିବାର ଲୋକଙ୍କୁ ହସ୍ତାନ୍ତର କରିଛି ପୋଲିସ୍।
