ସୀତାରାମ ଅଗ୍ରୱାଲ
ବାଲୁଗାଁ: ଆଜି ପୂର୍ବାହ୍ନରେ ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅଞ୍ଚଳରୁ ଛିନତାଇ ଅଭିଯୋଗରେ ଜଣଙ୍କୁ ଗିରଫ କରିଛି ପୋଲିସ। ସୂଚନା ମୁତାବକ ଆଜି ପୂର୍ବାହ୍ନ ପ୍ରାୟ ୧୧ ଟା ସମୟରେ ବାଲୁଗାଁ ଥାନା ପାଟଣା ସାହିର ଚନ୍ଦନ ଘଟୁଆଳ ନାମକ ଜଣେ ଅଭ୍ୟାସଗତ ଅପରାଧୀ ବାଲୁଗାଁ ବଜାରରେ ଜଣେ ଗରିବ ବୃଦ୍ଧା ସଜନୀ ନାୟକ ପରିବା ବିକ୍ରି କରୁଥିବା ବେଳେ ତାଙ୍କ ଠାରୁ ୩୫୦୦ ଟଙ୍କା ଛଡ଼ାଇ ଦୌଡ଼ି ପଳାଇଲେ।
ସେହି ସମୟରେ ବାଲୁଗାଁ ଥାନା ଡ୍ରାଇଭର(ହୋମ ଗାର୍ଡ) ରାଜାଉଦ୍ଦିନ ଖାନ ପରିବା କିଣୁଥିବା ବେଳେ ଉକ୍ତ ଦୃଶ୍ୟ ତାଙ୍କ ନଜରରେ ପଡିବାରୁ ସମ୍ପୃକ୍ତ ବଦୁର୍ବୁତ୍ତକୁ ଗୋଡ଼ାଇ ଗୋଡ଼ାଇ ପରିଶେଷରେ କାବୁ କରି ଥାନା ଜିମା ଦେଇଥିଲେ। ଅଭିଯୁକ୍ତ ଜଣକ ଅଭ୍ୟାସଗତ ଅପରାଧୀ ହୋଇଥିବା ବେଳେ ପୂର୍ବରୁ ଖୋର୍ଦ୍ଧା ଓ ବାଲୁଗାଁ ଥାନା ଅଞ୍ଚଳର ୪ଗୋଟି ସମ୍ପତ୍ତି ଅପରାଧ ମାମଲାରେ ଜଡିତ ଥିବା ଜଣାପଡିଛି।
ସମ୍ପୃକ୍ତ ଲୁଟ ଟଙ୍କା ଅଭିଯୁକ୍ତଙ୍କ ନିକଟରୁ ଜବତ କରାଯାଇ ଉକ୍ତ ପରିବା ବିକ୍ରେତାଙ୍କୁ ଦିଆଯାଇଥିବାଥିବା ଅଭିଯୁକ୍ତଙ୍କ ବିରୁଦ୍ଧରେ କେଶ ନଂ ୨୮୦/୨୨ରେ ମାମଲା ରୁଜୁ କରି ଗିରଫ କରାଯାଇଥିବା ଥାନା ଅଧିକାରୀ ରଶ୍ମିରଞ୍ଜନ ଦାଶ କହିଛନ୍ତି। ତେବେ ଥାନା ଡ୍ରାଇଭରଙ୍କ ଉପସ୍ଥିତ ବୁଦ୍ଧି ଏବଂ ତ୍ୱରିତ ପଦକ୍ଷେପକୁ ବାଲୁଗାଁ ବାସି ପ୍ରଶଂସା କରିଛନ୍ତି।
