ଜାମିନ ଶୁଣାଣିର ଗୋଟିଏ ଦିନ ପୂର୍ବରୁ ପୁଣି ଗିରଫ ହେଲେ ମନୀଷ ସିସୋଦିଆ

Published: Mar 9, 2023, 8:53 pm IST

ନୂଆଦିଲ୍ଲୀ: ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ଜାମିନ ଆବେଦନ ଉପରେ ଶୁଣାଣି ହେବାର ଗୋଟିଏ ଦିନ ପୂର୍ବରୁ ପ୍ରବର୍ତ୍ତନ ନିର୍ଦ୍ଦେଶାଳୟ ଗିରଫ କରିଛି। ଦୀର୍ଘ ୮ ଘଣ୍ଟା ଧରି ପଚରାଉଚରା ପରେ ତାଙ୍କୁ ଗତ ମାସରେ ଦିଲ୍ଲୀ ଅବକାରୀ ନୀତି ମାମଲାରେ ସିବିଆଇ ଗିରଫ କରିଥିଲା। ଦିଲ୍ଲୀର ଅବକାରୀ ନୀତି ଦୁର୍ନୀତି ମାମଲାରେ ସିବିଆଇ ଫେବୃଆରୀ ୨୬ ତାରିଖରେ ସିସୋଦିଆଙ୍କୁ ଗିରଫ କରିଥିଲା। ବର୍ତ୍ତମାନ ସେ ନ୍ୟାୟିକ ହେପାଜତରେ ଅଛନ୍ତି। ଆସନ୍ତାକାଲି ଅର୍ଥାତ୍ ମାର୍ଚ୍ଚ ୧୦ ତାରିଖରେ ସିସୋଦିଆଙ୍କ ଜାମିନ ସମ୍ପର୍କରେ କୋର୍ଟରେ ଶୁଣାଣି ହେବ।

ଇଡି ଦ୍ୱାରା ସିସୋଦିଆଙ୍କୁ ଗିରଫ କରିବା ନେଇ କେନ୍ଦ୍ର ସରକାରଙ୍କ ଉଦ୍ଦେଶ୍ୟ ଉପରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବେ ପ୍ରଶ୍ନ ଉଠାଇଛନ୍ତି। କେଜ୍ରିୱାଲ ତାଙ୍କ ଟୁଇଟରେ ଲେଖିଛନ୍ତି ଯେ, “ମନୀଷ ସିସୋଦିଆଙ୍କୁ ପ୍ରଥମେ ସିବିଆଇ ଗିରଫ କରିଥିଲା। ସିବିଆଇ କୌଣସି ପ୍ରମାଣ ପାଇନାହିଁ, ଚଢାଉ ସମୟରେ କିଛି ମିଳିନଥିଲା। ଆସନ୍ତାକାଲି ଜାମିନ ଉପରେ ଶୁଣାଣି ହେବ। କିନ୍ତୁ ମନୀଷଙ୍କୁ ଆଜି ପୁଣି ଗିରଫ କରାଯାଇଛି। ପ୍ରତିଦିନ ନୂଆ ନକଲି ମାମଲା ସୃଷ୍ଟି କରି ତାଙ୍କୁ ଭିତରେ ରଖିବା, ସେମାନଙ୍କର କେବଳ ଗୋଟିଏ ଉଦ୍ଦେଶ୍ୟ। ଜନସାଧାରଣ ଦେଖୁଛନ୍ତି, ଜନସାଧାରଣ ଉତ୍ତର ଦେବେ।

Related posts