ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଖଲ୍ଲିକୋଟ ଥାନା ଅନ୍ତର୍ଗତ ଖୋଜାପଲ୍ଲୀ ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଯାହାକି ସାମାଜିକ ନାଟକ ଶିଖୁଥିବା ଚିତ୍ରସେନ ଯେନା ନାମକ ଜଣେ ଯୁବକଙ୍କୁ ମାରଣାନ୍ତକ ଆକ୍ରମଣ କରି ଦୁଇ ଅଭିଯୁକ୍ତ ଘଟଣାସ୍ଥଳରୁ ଚମ୍ପଟ୍ ମାରିଛନ୍ତି। ଘଟଣାକୁ ନେଇ ପତ୍ନୀ ମାମି ଯେନା ଖଲ୍ଲିକୋଟ ଥାନାରେ ଅଭିଯୋଗ କରିଛନ୍ତି।
ସୁଚନା ଅନୁଯାୟୀ, ଗାଁରେ ହେବାକୁ ଥିବା ନାଟକ ପାଇଁ ଗାଁ କୋଠ ଘରେ ରିହଲସଲ ଚାଲିଥିଲା। ସେତିକି ବେଳେ ଜଣେ ଯୁବକ ଆସି ଚିତ୍ରସେନଙ୍କୁ ଡାକି ବାହାରେ କଥା ହେଉଥିଲେ ଓ ହଠାତ୍ ଅନ୍ୟ ଜଣେ ଯୁବକ ଆସି ଚିତ୍ରସେନଙ୍କୁ ବିଭତ୍ସ ଭାବେ ଛୁରୀରେ ଆକ୍ରମଣ କରି ଘଟଣାସ୍ଥଳରୁ ଉଭୟ ଚମ୍ପଟ୍ ମାରିଥିଲେ। ଉପସ୍ଥିତ ଲୋକ ତାକୁ ଚିକିତ୍ସା ପାଇଁ ପ୍ରଥମେ ଖଲ୍ଲିକୋଟ ଡାକ୍ତରଖାନାରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ବଡ଼ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଥିଲା।
ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ଏହି ଭଳି ପରିସ୍ଥିତିରେ ଗାଁରେ ଚାପା ଉତ୍ତେଜନା ସୃଷ୍ଟି ହୋଇଛି। ଅନ୍ୟ ପକ୍ଷରେ ପୋଲିସ ଅଭିଯୋଗ ଗ୍ରହଣ କରି ଘଟଣାର ତଦନ୍ତ ଆରମ୍ଭ କରିଛି। ପୁର୍ବ ରାଜନୈତିକ ଶତ୍ରୁତାକୁ କେନ୍ଦ୍ରକରି ଏହିଭଳି ଘଟଣା ଘଟିଛି ବୋଲି ଅଞ୍ଚଳରେ ଆଲୋଚନା ହେଉଛି।