ଖବର ପ୍ରକାଶ ପରେ ଚେତିଲା ପ୍ରଶାସନ: ବିଭିନ୍ନ ନର୍ସିଂ ହୋମ୍‌ ଉପରେ କଲା ଚଢାଉ

Published: Feb 19, 2020, 4:08 pm IST

ହେମାଙ୍ଗ ପ୍ରସାଦ ରାଉଳ

ବ୍ରହ୍ମପୁର: ଏମ୍‌କେସିଜି ପଛ ଭାଗରେ ଥିବା ଅଳିଆ ଗଦାରେ ଏକ ଭୃଣ ପଡ଼ିଥିବାର ଦେଖିବାକୁ ମିଳିଥିଲା, ଯାହାକୁ ନେଇ ପ୍ରଶାସନକୁ ଅଙ୍ଗୁଳି ନିର୍ଦ୍ଦେଶ କରିଛନ୍ତି ସ୍ଥାନୀୟ ବୁଦ୍ଧିଜୀବୀ। ତେବେ ଏହାକୁ ନେଇ ଏବେ ପ୍ରଶାସନ ଚେତିଥିବାବେଳେ ବିଭିନ୍ନ ନର୍ସିଂ ହୋମ ଚଢାଉ କରାଯାଇଛି। ସୂଚନାଯୋଗ୍ୟ, ସମୀକ୍ଷା ନ୍ୟୁଜ୍‌ରେ ପ୍ରକାଶିତ ଏନେଇ ଏକ ଖବର ପ୍ରସାରଣ ପରେ ପ୍ରଶାସନ ଏହା ସମ୍ପର୍କରେ ଏବେ ଦୃଢ ପଦକ୍ଷେପ ନେଇଛି। ଦୁଇଦିନ ତଳେ ବ୍ରହ୍ମପୁର ମେଡ଼ିକାଲ୍ ନିକଟବର୍ତ୍ତୀ  ସିଦ୍ଧାର୍ଥ ନଗର ନାଳରେ ଏକ ଶିଶୁକନ୍ୟାକୁ ଫୋପାଡ଼ି ଦେଇଥିବା ଦେଖିବାକୁ ମିଳିଥିଲା। ସେହିପରି ବିନାୟକ ଆଚାର୍ଯ୍ୟ କଲେଜ ପାଖରେ ଡ଼ମ୍ପିଂୟାର୍ଡ଼ରେ ଶିଶୁକୁ ଫୋପାଡ଼ି ଦିଆଯାଇଥିବା ଦେଖିବାକୁ ମିଳିଥିଲା। ଏହି ଖବର ପ୍ରକାଶିତ ହେବା ପରେ ପ୍ରଶାସନ ଚେତିଥିବାର ପରି ଲାଗୁଛି। ଜିଲ୍ଲା ପ୍ରଶାସନ ବେଆଇନ ନର୍ସିଂ ହୋମ୍‌ ଗୁଡ଼ିକ ଉପରେ ଚଢାଉ କରିଛନ୍ତି। ଉପଜିଲ୍ଲାପାଳଙ୍କ ନିର୍ଦ୍ଦେଶ ପରେ ଆଜି ବ୍ରହ୍‌ପୁରର ବିଭିନ୍ନ ନର୍ସିଂହୋମ୍‌ଗୁଡ଼ିକ ଯଥା ରୋହିନି ଡ଼ାଇଗ୍ଲୋଷ୍ଟିକ୍‌, ଇସାନ୍ ନର୍ସିଂ ହୋମ, ବାଲାଜୀ ଡ଼ାଇଗ୍ନୋଷ୍ଟିକ୍ ହୋମ୍ ଭଳି ବିଭିନ୍ନ ନର୍ସିଂ ହୋମ୍ ଉପରେ ଚଢ଼ାଉ ହୋଇଥିଲା। ଏହି ଟିମ୍‌ରେ ଡା. ବି. ସରୋଜିନି ଦେବୀ ଜିଲ୍ଳା ସ୍ୱାସ୍ଥ୍ୟ ପରିବାର କଲ୍ୟାଣ ଅଧିକାରୀ ଶକ୍ତିକୁମାର ଦିଗାଲ୍ ଜିଲ୍ଲା ମାତୃଶିଶୁ କାର୍ଯ୍ୟକ୍ରମ ପରିଚାଳକ, ଭେଷଜ ନିରୀକ୍ଷକ ଡା. ଦେବାଶିଷ କାଲୋ, ସହକାରୀ ଜିଲ୍ଲାପାଳ ବିନୋଦ କୁମାର ବେହେରା ପ୍ରମୁଖ ଥିଲେ। କ୍ଳିନିକ୍ ଏବଂ ଡ଼ାଇଗ୍ନୋଷ୍ଟିକ୍ କାଗଜପତ୍ର ସହ ସରକାରୀ ନିୟମର ବିଭିନ୍ନ ଭିତ୍ତିଭୂମିକୁ ପରଖିଥିବା ଦେଖିବାକୁ ମିଳିଛି। କେତେକଙ୍କ କାଗଜପତ୍ରରେ ଅସୁବିଧା ଥିବା ଜଣାପଡ଼ିଛି। ଏ ସଂକ୍ରାନ୍ତରେ ଜିଲ୍ଲାପାଳଙ୍କୁ ଅବଗତ କରାଯାଇଛି। ଆଗାମୀ ଦିନରେ ଏହି ନର୍ସିଂହୋମ୍‌ଗୁଡ଼ିକ କ୍ଲିନିକାଲ୍ ଏଷ୍ଟାବ୍ଲିସ୍‌ମେଣ୍ଟ ଆକ୍ଟ ଏବଂ ପିସିପିଏନ୍‌ଡ଼ିଟି ଅନୁଯାୟୀ ସିଲ୍ ହେବାର ସମ୍ଭାବନା ରହିଛି ବୋଲି ପ୍ରାପ୍ତ ସୂଚନାରୁ ଶୁଣିବାକୁ ମିଳୁଛି।

ଦୀର୍ଘଦିନ ହେଲା ପ୍ରଶାସନ କେବଳ ନର୍ସିଂ ହୋମ୍ ଚଢ଼ାଉ କରିବାରେ ପଛଘୁଞ୍ଚା ଦେଉଥିଲା। ସହରରେ ମାଳ ମାଳ ଛତୁଫୁଟିଲା ଭଳି ନର୍ସିଂ ହୋମ୍ ଖୋଲାଯାଉଛି। ଯାହାକି ସରକାରୀ ନିୟମକୁ ଖୁଲମ୍‌ଖୁଲା ଉଲ୍ଲଂଘନ କରୁଛନ୍ତି। ଯାହାର ଏକ ନମୁନା ଦେଖିବାକୁ ମିଳିଛି। ଯାହାର ପ୍ରଭାବ ମଧ୍ୟ ଏକରକମ ଶୂନ କହିଲେ ଅତ୍ୟୁକ୍ତି ହେବ ନାହିଁ। ସୂଚନାଯୋଗ୍ୟ ଟଙ୍କା ଲୋଭରେ ଏହି ବେଆଇନ ନର୍ସିଂ ହୋମ୍‌ଗୁଡ଼ିକ ଭୃଣହତ୍ୟାଠାରୁ ଆରମ୍ଭ କରି ଭୃଣ ନିରୂପଣ ଏବଂ ସମୟ ପୂର୍ବରୁ ପ୍ରସବ କରାଇବା ଦେଖିବାକୁ ମିଳୁଛି। ଏହି କ୍ଷେତ୍ରରେ ନର୍ସିଂ ହୋମ୍‌ଗୁଡ଼ିକ ମୋଟା ଅଙ୍କର ଅର୍ଥ ରୋଜଗାର କରିଥାନ୍ତି। ଯାହାଫଳରେ ଏହିପରି ଭୃଣହତ୍ୟା ଏବଂ କୋମଳମତି ଶିଶୁକନ୍ୟାକୁ ରାସ୍ତାଘାଟରେ, ଡ଼୍ରେନ୍‌ରେ ଫୋପାଡ଼ୁଥିବା ହୃଦୟ ବିଦାରକ ଚିତ୍ର ଦେଖିବାକୁ ମିଳୁଛି। ସହରରେ ଅହେତୁକ ଭାବରେ ବୃଦ୍ଧି ପାଉଛି ଭୃଣହତ୍ୟା ଏବଂ ଅନୈତିକ ସଂପର୍କର ବିକୃତ ଚିତ୍ର ଏଠୁ ସ୍ପଷ୍ଟ ବାରି ହୋଇପଡ଼ୁଛି ଯେ ସହରରେ ଥିବା ନର୍ସିଂହୋମ୍‌ଗୁଡ଼ିକ କଳାକାରନାମା କରୁଛନ୍ତି।

ପ୍ରତ୍ୟେକ ନର୍ସିଂ ହୋମ୍‌ରେ କେବଳ ସରକାରଙ୍କ ବିଜ୍ଞାପନ ଝୁଲାଇଯାଇଛି କେବଳ ଆଖି ଦୃଶିଆ ପାଇଁ। ଏଠାରେ ଭୃଣ ପରୀକ୍ଷା କରାଯାଏ ନାହିଁ, ଏହା ଏକ ଅପରାଧ କିନ୍ତୁ ବାସ୍ତବ ଚିତ୍ର ଅଲଗା। କିଛି ବ୍ୟକ୍ତି ନର୍ସିଂ ହୋମ୍‌ଗୁଡ଼ିକୁ ଯାଇ ଗର୍ଭରେ ଥିବା ଶିଶୁର ଲିଙ୍ଗ ପରୀକ୍ଷା କରିଥାନ୍ତି। ଯାହାଫଳରେ ଉକ୍ତ ଡ଼ାକ୍ତର, ଉକ୍ତ ଲୋକଠାରୁ ୧୦ ହଜାର ଟଙ୍କାଠାରୁ ଉର୍ଦ୍ଧ୍ୱ ଟଙ୍କା ଦାବି କରନ୍ତି। ଗର୍ଭରେ ଥିବା ସନ୍ତାନ ଯଦି କନ୍ୟା ହୋଇଥାଏ ତେବେ ତାକୁ ନଷ୍ଟ କରିବା ପାଇଁ ମଧ୍ୟ ଉକ୍ତ ନର୍ସିଂ ହୋମ୍‌ର ଡ଼ାକ୍ତରମାନେ ସାହାଯ୍ୟ କରିଥାନ୍ତି। ଅନ୍ୟକ୍ଷେତ୍ରରେ ଅନୈତିକ ସଂପର୍କ ରଖି ଗର୍ଭଧାରଣ କରିଥିବା କୁଆଁରୀ ମା’ମାନେ ଏହି ଅସାଧୁ ନର୍ସିଂହୋମ୍‌ମାନଙ୍କ ଉପରେ ନିର୍ଭର କରିଥାନ୍ତି। ଏହି ନର୍ସିଂହୋମ୍ ଗର୍ଭ ନଷ୍ଟ କରିବାରେ ସାହାଯ୍ୟ କରି ମୋଟା ଅଙ୍କର ପାଉଣା ଦାବି କରନ୍ତି। ନିରୂପାୟ ହୋଇ ତଥା ଲୋକଲଜ୍ଜାରୁ ବର୍ତ୍ତିବାକୁ ଯାଇ ଟଙ୍କା ଦେଇ ଗର୍ଭନଷ୍ଟ କରି ଏହିଭଳି ଶିଶୁଟିକୁ ରାସ୍ତା, ଖେଳପଡ଼ିଆ ଏବଂ ଡ଼୍ରେନରେ ଫୋପାଡ଼ି ଦେଇଥାନ୍ତି। ଗୋଟିଏ ପଟେ ସରକାରଙ୍କର ବେଟି ବଚାଓ ଏବଂ ପରୀ ଭଳି କାର୍ଯ୍ୟକ୍ରମ କେବଳ କାଗଜ କଲମରେ ସୀମିତ କହିଲେ ଅତ୍ୟୁକ୍ତି ହେବନାହିଁ । ନର୍ସିଂ ହୋମ୍‌ ଗୁଡ଼ିକ ଉପରେ ସରକାରୀ ଅଙ୍କୁଶ ଲାଗିବା ସହିତ ବେଆଇନ ନର୍ସିଂହୋମ୍‌ ପ୍ରତି କଡା କାର୍ଯ୍ୟାନୁଷ୍ଠାନ ଗ୍ରହଣ କଲେ ଏପରି ଘଟଣାକୁ ରୋକାଯାଇପାରିବ।

Related posts