ସୀତାରାମ ଅଗ୍ରୱାଲ
ବାଣପୁର: ବୁଧବାର ଅପରାହ୍ନରେ ଚଳିତ ବର୍ଷ ହେବାକୁଥିବା ଐତିହାସିକ ପଞ୍ଚାଦୋଳ ନିମନ୍ତେ ପାଲଟନ ପଡିଆର ଛାୟା ମଣ୍ଡପ ଠାରେ ପଞ୍ଚୁଦୋଳ କମିଟି ସମ୍ପାଦକ ମାଧବ ବାରିକଙ୍କ ଆବାହକତ୍ୱରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଉପସଭାପତି ଅମର କାଣ୍ଡିଙ୍କ ସଭାପତିତ୍ୱରେ ବୈଠକ ହୋଇଥିବା ବେଳେ ଜିଲ୍ଲା ପରିଷଦ ଉପସଭାପତି ଗୋପୀନାଥ ମହାରଣା, ବାଣପୁର ଏନଏ ସି ଅଧକ୍ଷ ମିଟୁ ନାୟକ, ଭଗବତୀ ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ବଳାମୁକୁନ୍ଦ ଦାସ, ସଂଗ୍ରାମ କେଶରୀ ସାହୁ, କୋଷାଧ୍ୟକ୍ଷ ନବ ପ୍ରଧାନ ଓ ଜୟ କୃଷ୍ଣ ପ୍ରଧାନଙ୍କ ସହ ଅଂଚଳର ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
କୋସାଧ୍ୟକ୍ଷ ବିଗତ ବର୍ଷ ମାନଙ୍କର ଆୟବ୍ୟୟର ହିସାବ ପଠନ କରିଥିବା ବେଳେ ଚଳିତବର୍ଷ ଐତିହାସିକ ପଞ୍ଚଦୋଳକୁ ସରସ ସୁନ୍ଦର କରିବାକୁ ସର୍ବ ସମ୍ମତ ଭାବେ ପ୍ରସ୍ତାବ ଗୃହୀତ ହୋଇଥିଲା। ବିଗତ ଦୁଇ ବର୍ଷ ହେଲା କରୋନା କଟକଣା ଥିବାରୁ ସମସ୍ତ କାର୍ଯ୍ୟକ୍ରମକୁ କାଣ୍ଟଛାଣ୍ଟ କରାଯାଇ କେବଳ ବିଧି ଅନୁଯାୟୀ ବିମାନ ପୂଜା କରାଯାଇଥିବା ବେଳେ ଭକ୍ତଙ୍କୁ ପଲଟନ ପଡିଆ ବାରଣ ଥିଲା। ଫଳରେ ହଜାର ହଜାର ଭକ୍ତ ଐତିହାସିକ ପଞ୍ଚଦୋଳ ଯାତ୍ରା ଦେଖିବାରୁ ବଞ୍ଚିତ ହୋଇଥିଲେ। ଏପରିକି ଆତସବାଜି ମଧ୍ୟ ସମ୍ପୂର୍ଣ୍ଣ ବନ୍ଦ ଥିଲା।
ତେବେ ଚଳିତ ବର୍ଷ ମାର୍ଚ୍ଚ ୧୨ ଓ ୧୩ ତାରିଖରେ ପଞ୍ଚୁଦୋଳ ଅନୁଷ୍ଠିତ ହେବାକୁ ଥିବାବେଳେ ଏହାକୁ ପୁନର୍ବାର ଧୁମଧାମରେ ପାଳନ କରାଯାଇ ଆଜିଠାରୁ ସମସ୍ତ ପ୍ରସ୍ତୁତି କରିବାକୁ ସଭା କମିଟିଙ୍କ ଉପରେ ନ୍ୟସ୍ତ କରିଥିଲା। ପଡିଆରେ ଅବସ୍ଥିତ ବିମାନ ପିଣ୍ଡି ସବୁ ଏନଏସି ପକ୍ଷରୁ ସୌନ୍ଦର୍ଯ୍ୟକରଣ ପାଇଁ ଏନଏସି ତରଫରୁ ୨୦ ଲକ୍ଷ ଟଙ୍କାର ଅନୁଦାନ ଦିଆଯାଇଥିବାର ଅଧ୍ୟକ୍ଷ ମିଟୁ ନାୟକ ସଭାରେ ମତ ପ୍ରକାଶ କରିଥିଲେ।
ଉପସଭାପତି ଗୋପୀନାଥ ମହାରଣା ପଞ୍ଚୁଦୋଳ କମିଟି ମାଧ୍ୟମରେ ଯାହା ଉନ୍ନତିର ଆବଶ୍ୟକତା ଅଛି ତାହା ଯୁଦ୍ଧ କାଳୀନ ଭିତିରେ ସମ୍ପନ୍ନ କରାଯିବାକୁ ଦୃଢୋକ୍ତି ପ୍ରକାଶ କରିଥିଲେ। ଅନୁରୂପ ଭାବେ ବହୁ ଉଠା ଦୋକାନୀ ଗତ ଦୁଇ ବର୍ଷ ହେଲା ବାଣପୁର ପଞ୍ଚଦୋଳରେ ନିଜ ଦୋକାନ ପକାଇବା ପାଇଁ ଚାତକ ପରି ଚାହିଁ ରହିଥିବା ବେଳେ ଚଳିତ ବର୍ଷ ସେମାନଙ୍କୁ ମଧ୍ୟ ଅନୁମତି ମିଳିବ ବୋଲି କମିଟି ତରଫରୁ କୁହାଯାଇଛି।
ଆଗାମୀ ଦିନରେ କମିଟିର କର୍ମକର୍ତ୍ତା ମାନେ ସ୍ଥାନୀୟ ପ୍ରଶାସନ ସହ ଆଲୋଚନା କରି ସମସ୍ତ ରୂପରେଖ ପ୍ରସ୍ତୁତ କରିବାକୁ ବୈଠକରେ ପ୍ରସ୍ତାବ ଗ୍ରହଣ କରାଯାଇଥିଲା।
ତେବେ ଚଳିତ ବର୍ଷ ଜିଲ୍ଲା ଓ ସ୍ଥାନୀୟ ପ୍ରଶାସନ ଉକ୍ତ କମିଟିର ସମ୍ମାନ ନିଶ୍ଚିତ ରଖିବା ସହ ଐତିହାସିକ ପଞ୍ଚଦୋଳକୁ ଧୁମଧାମରେ ପାଳନ କରିବା ପାଇଁ ସମସ୍ତ ସହଯୋଗ ଯୋଗାଇଦେବ ବୋଲି କମିଟି ଓ ବାଣପୁରବାସୀ ଆଶା ରଖିଛନ୍ତି।