ପୁରୀ, ଶ୍ରୀଜଗନ୍ନାଥଙ୍କ ପରଂପରା ବଡ ଅନନ୍ୟ ଏବଂ ବିଚିତ୍ର ମଧ୍ୟ। ଓଡିଆ ଘରର ଚାଲିଚଳନି ସହିତ ଶ୍ରୀଜଗନ୍ନାଥ ସଂସ୍କୃତି ସଂପୂର୍ଣ୍ଣ ଭାବେ ଜଡିତ ରହିଛି। ଘରେ ଦେହ ଖରାପ ହେଲେ ଯେପରି ବନ୍ଧୁଙ୍କ ଘରୁ ଫଳମୂଳ ଆସିଥାଏ, ଠିକ୍ ସେହିପରି ପରଂପରା ଜଗନ୍ନାଥ ସଂସ୍କୃତିରେ ମଧ୍ୟ ରହିଛି। ବର୍ତ୍ତମାନ ମହାପ୍ରଭୁ ଜ୍ବରରେ ପିଡିତ ଥିବାରୁ ତାଙ୍କୁ ଚେରମୂଳି ଔଷଧ ଦେଇ ସୁସ୍ଥ କରାଯାଇଛି। ଏହାପରେ ଆଜି ଦଶମୀତିଥୀରେ ଚର୍ତ୍ତୁଦ୍ଧାମୂର୍ତ୍ତିଙ୍କୁ ଚକା ବିଜେ କରାଯାଇଛି। ଏହି ସମୟରେ ପ୍ରଭୁ ଫଳ ଆହାର କରିବାର ବିଧି ରହିଛି।
ସେଥିପାଇଁ କାକଟପୁରର ମହର୍ଷି ବିଶ୍ବାମିତ୍ର ମଠରୁ ବିଭିନ୍ନ ପ୍ରକାରର ଫଳମୂଳ ଅଣାଯିବାର ପରଂପରା ରହିଛି। ମଠ କର୍ମଚାରୀମାନେ ଆମ୍ବ,ପଣସ, ସପୁରୀ, କଦଳୀ, ପଇଡ ଏବଂ ତୁଳସୀ ଧରି ବଡଦାଣ୍ଡରେ କିର୍ତ୍ତନ କରି ପହଁଚିଥିଲେ। ସେଠାରେ ସେମାନେ ସିଂହଦ୍ବାର ପର୍ଯ୍ୟନ୍ତ ଏହି ଭାର ଧରି ଯାଇଥିଲେ। ହେଲେ କରୋନା କଟକଣା ଯୋଗୁଁ ଶ୍ରୀମନ୍ଦିର ପ୍ରବେଶ ନିଷେଧ ଥିବାରୁ ସେମାନେ ଭାର ନେଇ ଭିତରେ ପ୍ରବେଶ କରିପାରି ନ ଥିଲେ। ହେଲେ ଶ୍ରୀମନ୍ଦିର ତରଫରୁ ବୋଝିଆମାନେ ଏହି ଫଳ ଭାର ଗ୍ରହଣ କରି ମନ୍ଦିର ଭିତରକୁ ନେଇଥିଲେ। ଏହାପରେ ମହାପ୍ରଭୁଙ୍କୁ ଏହା ଲାଗି କରାଯାଇଥିଲା। ଏହି ପରଂପରା କାହିଁ କେଉଁ କାଳରୁ ଶ୍ରୀମନ୍ଦିରରେ ପ୍ରଚଳିତ ହୋଇ ଆସୁଅଛି।
କାକଟପୁରର ଏହି ମଠ ଶ୍ରୀମନ୍ଦିର ପରଂପରା ସହିତ କାହିଁ କେଉଁ କାଳରୁ ଜଡିତ ରହିଛି। ମହାପ୍ରଭୁଙ୍କ ଦାରୁ ଚିହ୍ନଟ ବେଳେ ଏହି ମଠର ଗୁରୁତ୍ବ ମଧ୍ୟ ରହିଛି। ଦାରୁ ଶିଘ୍ର ମିଳିବା ପାଇଁ ଏହି ମଠରେ ବିଭିନ୍ନ ପ୍ରକାରର ପୂଜାପାଠ କରାଯାଇଥାଏ। ଏଥିସହିତ ମହାପ୍ରଭୁ ଅଣସର ଘରୁ ସୁସ୍ଥ ହୋଇ ଚକାବିଜେ ବେଳେ ମଠ ତରଫରୁ ଏପରି ଫଳ ଭାର ମଧ୍ୟ ପଠାଇବାର ପରଂପରା ରହିଛି। ଏହି ସମୟରେ ବିଭିନ୍ନ ମଠ ମନ୍ଦିର ଏବଂ ଭକ୍ତମାନେ କାକଟପୁର ମଠକୁ ଏହି ଫଳ ମଧ୍ୟ ଦାନ କରିଥାନ୍ତି। ସେସବୁକୁ ସଂଗ୍ରହ କରି ମଠ ତରଫରୁ ଜଗନ୍ନାଥଙ୍କୁ ଫଳଭାର ଦିଆଯାଇଥାଏ।