ଭୁବନେଶ୍ବର: ଶେଷରେ ‘ଜୀ ଓଡିଶା ନ୍ୟୁଜ’ ଡିଜିଟାଲ ଚ୍ୟାନେଲ ମଧ୍ୟ ବନ୍ଦ ହୋଇଗଲା। ପୂର୍ବରୁ ଜୀ ମିଡିଆ କର୍ରପୋରେସନ ତାହାର ଓଡିଶା ସାଟେଲାଇଟ ଚ୍ୟାନେଲ ବନ୍ଦ କରି ଦେଇଥିଲା। ତା ବଦଳରେ ଓଡିଆ ଭାଷାରେ ଡିଜିଟାଲ ଚ୍ୟାନେଲ ଚାଲିବ ବୋଲି କୁଯାଇଥିଲା। ହେଲେ ତାହାକୁ ମଧ୍ୟ କଂପାନୀ ବନ୍ଦ କରିବାକୁ ନିଷ୍ପତି କରିଛି।
ଏ ନେଇ ଜୀ ଓଡିଶା ନ୍ୟୁଜରେ କାର୍ଯ୍ୟରତ ସମସ୍ତ କର୍ମଚାରୀଙ୍କୁ ଇସ୍ତଫା ପ୍ରଦାନ କରିବା ପାଇଁ ନିର୍ଦ୍ଦେଶ ଦିଆଯାଇଛି। ହଠାତ ଏପରି ନିର୍ଦ୍ଦେଶ ପାଇବାରେ ପରେ କର୍ମଚାରୀଙ୍କ ମହଲରେ ଆତଙ୍କ ଖେଳିଯାଇଛି। କାରଣ ଏ ନେଇ କଂପାନୀ କର୍ତ୍ତପକ୍ଷ ପୂର୍ବରୁ କୌଣସି ସୂଚନା ଦେଇ ନ ଥିଲେ। ଇସ୍ତଫା ନିର୍ଦ୍ଦେଶ ଆସିବା ପରେ ଅନେକ କର୍ମଚାରୀ ଇସ୍ତଫା ପ୍ରଦାନ କରିଥିବା ମଧ୍ୟ ଜଣାପଡିଛି।
ଏହି ଜାତୀୟ ଚ୍ୟାନେଲର ଉଭୟ ଭୁବନେଶ୍ବର ଏବଂ ଦିଲ୍ଲୀ ଅଫିସରେ ପ୍ରାୟ 30 ଜଣ ଓଡିଆ କର୍ମଚାରୀ କାର୍ଯ୍ୟ କରୁଥିଲେ। ନୂଆଦିଲ୍ଲୀରେ କାର୍ଯ୍ୟରତ କର୍ମଚାରୀଙ୍କୁ ମାନବସମ୍ବଳ ବିଭାଗ ଜଣ ଜଣଙ୍କୁ ଡାକି ଇସ୍ତଫା ପତ୍ର ଦେବାକୁ ବାଧ୍ୟ କରିଛନ୍ତି। ଫଳରେ ଦିଲ୍ଲୀ ଅଫିସରେ ପ୍ରାୟ ସମସ୍ତ ଓଡିଆ କର୍ମଚାରୀ ଇସ୍ତଫା ଦେଇସାରିଛନ୍ତି। ସେହିପରି ଓଡିଶାରେ କାର୍ଯ୍ୟରତ କର୍ମଚାରୀମାନ ମଧ୍ୟ ଇସ୍ତଫା ଦେଇଥିବାର ଜଣାପଡିଛି। ଜୀ ମିଡିଆର ଏପରି ନିଷ୍ପତିକୁ ବିଭିନ୍ନ ମହଲରେ ନିନ୍ଦା କରାଯାଇଛି।
