ସୀତାରାମ ଅଗ୍ରଓ୍ବାଲ
ବାଣପୁର: ବାଣପୁରର ଝିଅ ଅନୀଶା ଏବେ ଜୀ ସାଥର୍କ ଚ୍ୟାନେଲ୍ରେ ପ୍ରସାରିତ ହେଉଥିବା ଲୋକପ୍ରିୟ ଧାରାବାହିକ ’ଅଞ୍ଜଳି’ରେ ଅଭିନୟ କରୁଛନ୍ତି। ପିତା ଦିଲ୍ଲୀପ କୁମାର ପଟ୍ଟନାୟକ ଓ ମାତା ସଂଯୁକ୍ତା ଦାସଙ୍କ କନ୍ୟା ଅନୀଶା ଅଧୁନା ବିଜେବି ସ୍ବୟଂଶାସିତ କଲେଜର ସାମ୍ବାଦିକତା ଓ ଗଣ ଯୋଗାଯୋଗ ବିଭାଗର ଦ୍ବିତୀୟ ବର୍ଷର ଛାତ୍ରୀ। ପାଠ ପଢା ସାଙ୍ଗକୁ ଅଭିନୟ ମଧ୍ୟ କରୁଛନ୍ତି ଅନୀଶା। ଅନିଶାଙ୍କ ହାଇସ୍କୁଲ ପଢାପଢି ସରସ୍ବତୀ ଶିଶୁ ବିଦ୍ୟା ମନ୍ଦିର ବାଣପୁର ରେ ସମାପ୍ତ ହୋଇଥିବାବେଳେ ଯୁକ୍ତ ଦୁଇ(ବିଜ୍ଞାନ) ଏବଂ ଯୁକ୍ତ ତିନି(ପ୍ରାଣୀ ବିଜ୍ଞାନ ସମ୍ମାନ) ଗୋଦାବରୀଶ ମହାବିଦ୍ୟାଳୟରେ ସମାପ୍ତ ହୋଇଛି। ପିଲାଟିବେଳୁ ଅନୀଶା ବହୁ ପ୍ରତିଭାର ଅଧିକାରୀ ଅଟନ୍ତି ଏବଂ ବିଦ୍ୟାଳୟ ଓ ମହାବିଦ୍ୟାଳୟ ସ୍ତରରେ ବହୁ ପ୍ରତିଯୋଗିତା ରେ ଅଂଶ ଗ୍ରହଣ କରି ଏକାଧିକ ପୁରସ୍କାର ପାଇଛନ୍ତି। ଅନୀଶା ଜୀ ସାର୍ଥକ ଚ୍ୟାନେଲ୍ରେ ପ୍ରସାରିତ ହେଉଥିବା ଲୋକପ୍ରିୟ ମେଗା ଧାରାବାହିକ ’ଅଞ୍ଜଳି’ରେ ଅମ୍ରିତା ଚରିତ୍ରରେ ଅଭିନୟ କରୁଛନ୍ତି। ତାଙ୍କ ଅଭିନୟକୁ ଦର୍ଶକେ ବେଶ୍ ପସନ୍ଦ କରିଛନ୍ତି।
ବାଣପୁର ଅଞ୍ଚଳର ଏକ ପ୍ରତିଷ୍ଠିତ ପରିବାରର ଝିଅ ହେଉଛନ୍ତି ଅନୀଶା। ଅନୀଶାଙ୍କ ପିତା ଗୋଦାବରୀଶ ମହାବିଦ୍ୟାଳୟର ଅବସରପ୍ରାପ୍ତ ଇତିହାସ ଅଧ୍ୟାପକ ରହିଥିବାବେଳେ ତାଙ୍କ ମା’ ବାଣପୁର ବଡହନ୍ତୁଆଡ ସ୍ଥିତ ଉର୍ଦ୍ଦୁ ସରକାରୀ ବିଦ୍ୟାଳୟର ଶିକ୍ଷୟିତ୍ରୀ। ସେହିପରି ତାଙ୍କ ପିଉସା ପ୍ରଫେସର ନଳିନକାନ୍ତ ପଟ୍ଟନାୟକ ଗୋଦାବରୀଶ ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷ ତଥା ବାଣପୁର ଅଞ୍ଚଳର ଜଣେ ପ୍ରତିଷ୍ଠିତ ଲୋକ।
ଅନୀଶା ପାଣ୍ଟାଲୁନ୍ସ ମିସ୍ ରଜ ୨୦୧୯ ରେ ଫାଇନାଲିଷ୍ଟ ରହିଥିବାବେଳ ମିସ୍ ଟିନ୍ ଇଣ୍ଡିଆନ୍ରେ ଓଡ଼ିଶା ତରଫରୁ ମନୋନୀତ ହୋଇଥିଲେ ସୁଦ୍ଧା ସେମିଷ୍ଟାର ପରୀକ୍ଷା ପାଇଁ ଅଂଶଗ୍ରହଣ କରିପାରିନଥିଲେ। ନାଚ, ଗୀତ, ଚିତ୍ରରେ ବିଶେଷ ରୁଚି ରଖିଥିବା ଅନୀଶା ମିମିକ୍ରି ଓ ଅଭିନୟ କରିବାକୁ ବହୁତ ପସନ୍ଦ କରିଥାନ୍ତି।
ଗୁରୁ ହରିପ୍ରିୟାଙ୍କଠାରୁ କିଛି ଦିନର ଓଡ଼ିଶୀ ଶିଖିଥିବା ଅନୀଶା ଉଭୟ କ୍ଲାସିକାଲ ଓ ମଡର୍ଣ୍ଣ ଡ୍ୟାନ୍ସକୁ ପସନ୍ଦ କରିଥାନ୍ତି। କେବଳ ନୃତ୍ୟ, ଗୀତ ନୁହେଁ ବାଣପୁର ଗୋଦାବରୀଶ ମହାବିଦ୍ୟାଳୟ ରେ ଯୁକ୍ତ ତିନି ପଢୁଥିବା ସମୟରେ ସେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିଭିପି) ର ସକ୍ରିୟ କାର୍ଯ୍ୟକର୍ତା ଥିଲେ ଏବଂ କ୍ୟାମ୍ପସ ଛାତ୍ରୀ ପ୍ରମୁଖ ଦାୟିତ୍ୱରେ ଥିଲେ ତତ୍ସହିତ ବାଣପୁର-ବାଲୁଗାଁ ରେ ଏବିଭିପି ର ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିଚାଳନା ମଧ୍ୟ କରିଥିଲେ।
ବାଣପୁରର ଝିଅ ନିଜର ପ୍ରତିଭା ବଳରେ ଓଡ଼ିଶାର ଏକ ପ୍ରମୁଖ ଟେଲିଭଜନ ଚାନେଲ୍ରେ ନିଜର ଅଭିନୟ ପ୍ରଦର୍ଶନ କରି ବାଣପୁରୀବାସୀଙ୍କ ପାଇଁ ଗୌରବ ଓ ଉଦାହରଣ ବିଷୟ ପାଲଟିଛନ୍ତି। ଆଗାମୀ ସମୟରେ ଅଭିନୟ ଜଗତରେ ନିଜର ଏକ ସ୍ବତନ୍ତ୍ର ପରିଚିତ ହାସଲ କରିବା ପାଇଁ ଅନୀଶାଙ୍କୁ ବାଣପୁରବାସୀ ଅଶେଷ ଶୁଭକାମନା ଜଣାଇଛନ୍ତି।