ନୂଆଦିଲ୍ଲୀ, ରାଜ୍ୟରେ ବିଧାନସଭା ନିର୍ବାଚନ ଫଳାଫଳ ପରେ ହୋଇଥିବା ହିଂସା ସମ୍ପର୍କରେ କେନ୍ଦ୍ର ଗୃହ ମନ୍ତ୍ରଣାଳୟ ପଶ୍ଚିମବଙ୍ଗ ସରକାରଙ୍କଠାରୁ ରିପୋର୍ଟ ମାଗିଛି। ରାଜ୍ୟର ବିଭିନ୍ନ ଅଞ୍ଚଚଳରେ ତ୍ରୁଣମୂଳ କଂଗ୍ରେସ କର୍ମୀଙ୍କ ଆକ୍ରମଣରେ ଅନେକ ଲୋକ ପ୍ରାଣ ହରାଇଛନ୍ତି ଏବଂ ଅନେକ ଆହତ ହୋଇଛନ୍ତି। ନିର୍ବାଚନ ଫଳାଫଳ ପରେ ବିଜେପି ପ୍ରାର୍ଥୀଙ୍କ ସହ ହୋଇଥିବା ହିଂସା ସମ୍ପର୍କରେ ଗୃହ ମନ୍ତ୍ରଣାଳୟ ପଶ୍ଚିମବଙ୍ଗ ସରକାରଙ୍କୁ ଚିଠି ଲେଖିଛନ୍ତି।
ରାଜ୍ୟର ବିଭିନ୍ନ ସ୍ଥାନରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ବିଜେପି ନେତାଙ୍କ ଘରେ ନିଆଁ ଲଗାଇ ସେମାନଙ୍କ ସମ୍ପତ୍ତି ନଷ୍ଟ ହୋଇଥିବା ଅଭିଯୋଗ ହୋଇଛି। ପୂର୍ବ ବର୍ଦ୍ଧମାନ ଜିଲ୍ଲାର ଜମାଲପୁରରେ ତ୍ରୁଣମୂଳ କଂଗ୍ରେସ ଏବଂ ବିଜେପି କର୍ମୀଙ୍କ ମଧ୍ୟରେ ସଂଘର୍ଷରେ ତିନି ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି।
ଭାରତୀୟ ଜନତା ପାର୍ଟି ଦାବି କରିଛି ଯେ ତ୍ରୁଣମୂଳ କଂଗ୍ରେସ ସମର୍ଥକମାନେ ଜଣେ ବିଜେପି କର୍ମୀଙ୍କ ଘରକୁ ଭାଙ୍ଗି ଦେବା ପରେ ହିଂସା ଆରମ୍ଭ ହୋଇଛି। ଏହି ସଂଘର୍ଷରେ ବିଜେପି କର୍ମୀ ଆଶିଷ ଦସ୍ତିକରଙ୍କ ମା ମଧ୍ୟ ମୃତ୍ୟୁ ବରଣ କରିଛନ୍ତି। କିଛି ବିଜେପି ପ୍ରାର୍ଥୀଙ୍କ ଘର ଓ ଗାଡି ଉପରେ ଆକ୍ରମଣ କରାଯାଇଛି। ଆରାମ ବାଗରେ ଥିବା ବିଜେପି କାର୍ଯ୍ୟାଳୟରେ ମଧ୍ୟ ନିଆଁ ଲାଗିଯାଇଛି ବୋଲି ବିଜେପି ଅଭିଯୋଗ ହୋଇଛି।
ବିଜେପି ପ୍ରାର୍ଥୀ ମଧୁସୂଦନ ବାଗ ତ୍ରୁଣମୂଳ କଂଗ୍ରେସର ସୁଜାତା ମଣ୍ଡଳଙ୍କୁ ପରାସ୍ତ କରିବା ପରେ ଅରାମବାଗରେ ଥିବା ବିଜେପି କାର୍ଯ୍ୟାଳୟରେ ନିଆଁ ଲାଗିଯାଇଥିଲା। ନନ୍ଦିଗ୍ରାମରୁ ତ୍ରୁଣମୂଳ କଂଗ୍ରେସ ମୁଖ୍ୟ ମମତା ବାନାର୍ଜୀଙ୍କୁ ପରାସ୍ତ କରିଥିବା ଶୁଭେନ୍ଦୁ ଆଧିକାରୀଙ୍କ ଗାଡି ଉପରେ ମଧ୍ୟ ଆକ୍ରମଣ କରାଯାଇଥିଲା ବୋଲି ବିଜେପି କହିଛି।
ସେହିପରି ନାଟବାରୀରେ ବିଜେପି ପ୍ରାର୍ଥୀ ମିହିର ଗୋସ୍ୱାମୀଙ୍କ କାର ନଷ୍ଟ ହୋଇଯାଇଛି। ଗୋସ୍ୱାମୀ ତ୍ରୁଣମୂଳ କଂଗ୍ରେସ ପ୍ରାର୍ଥୀ ରବୀନ୍ଦ୍ର ନାଥ ଘୋଷଙ୍କୁ ପରାସ୍ତ କରି ନିର୍ବାଚନରେ ବିଜୟୀ ହୋଇଥିଲେ। ସେହି ରାଗରେ ଟିଏମସି କର୍ମିମାନେ ଏପରି କରିଛନ୍ତି ବୋଲି ବିଜେପି କହିଛି।
ତେବେ ବିଜେପିର ଏପରି ଅଭିଯୋଗ ଭିତ୍ତିହୀନ ବୋଲି ଟିଏମସିର ବରିଷ୍ଠ ନେତାମାନେ କହିଛନ୍ତି। ସେମାନେ କହିଛନ୍ତି ଯେ, ବିଜେପି ପଶ୍ଚିମ ବଂଗରେ ଜିତିବା ପାଇଁ ଆପ୍ରାଣ ଉଦ୍ୟମ କରିଥିଲା। ହେଲେ ସେଥିରେ ସଫଳ ନ ହେବାରୁ ସେମାନେ ରାଗରେ ହିଂସାକାଣ୍ଡ କରୁଛନ୍ତି ବୋଲି ଟିଏମସି କହିଛି। ନିର୍ବାଚନ ଫଳାଫଳ ବାହାରିବା ପରେ ବର୍ତ୍ତମାନ ପଶ୍ଚିମବଂଗର ବିଭିନ୍ନ ସ୍ଥାନରେ ଉତ୍ତେଜନ ଲାଗିରହିଛି।
