ନନ୍ଦିନୀ ଶତପଥୀ ଓଡିଶାର ‘ପ୍ରଥମ’ ମହିଳା ମୁଖ୍ୟମନ୍ତ୍ରୀ କି ?

ମୁଁ ପହଁଛିବାର କିଛି ସମୟ ପରେ ସଭା କାଯ୍ୟ ଆରମ୍ଭ ହୋଇଥିଲା। ଏଥିରେ ସମସ୍ତେ ସେମାନଙ୍କର ଭାଷଣ ଦେବା ବେଳେ ନନ୍ଦିନୀ ଶତପଥୀଙ୍କୁ ଓଡିଶାର ପ୍ରଥମ ମହିଳା ମୁଖ୍ୟମନ୍ତ୍ରୀ ଭାବେ ସମ୍ବୋଧିତ କରୁଥିଲେ। ଏପରି ସମ୍ବୋଧନ କରିବାରେ କିଛି ଭୁଲ ମଧ୍ୟ ନ ଥିଲା। କାରଣ ସେ ଥିଲେ ମହିଳା ଭାବେ ଓଡିଶାର ପ୍ରଥମ ମୁଖ୍ୟମନ୍ତ୍ରୀ। ତେବେ ଯେତେବେଳେ ନନ୍ଦିନୀ ଶତପଥୀଙ୍କ କହିବାର ପାଳି ଆସିଲା, ସେତେବେଳେ ସେ ପ୍ରଥମେ ଏହି ‘ପ୍ରଥମ ମହିଳା ମୁଖ୍ୟମନ୍ତ୍ରୀ’ ସମ୍ବୋଧନକୁ ନେଇ ବିରକ୍ତି ପ୍ରକାଶ କରିଥିଲେ। ନନ୍ଦିନୀ ଦେବୀଙ୍କ ଏପରି ବିରକ୍ତି ଭାବ ଦେଖି ଆୟୋଜକ ତଥା ସେଠାରେ ଥିବା ଦର୍ଶକମାନେ ମଧ୍ୟ ଆଶ୍ଚର୍ଯ୍ୟ ହୋଇ ଯାଇଥିଲେ।

ନନ୍ଦିନୀଦେବୀ କହିଲେ ଯେ, ମୋତେ ସମସ୍ତେ ଓଡିଶାର ପ୍ରଥମ ମହିଳା ମୁଖ୍ୟମନ୍ତ୍ରୀ ଭାବେ ସମ୍ବୋଧିତ କଲ। ଭଲ କଥା। ହେଲେ ମୁଁ ଜାଣିପାରୁ ନାହିଁ ଆପଣମାନେ ମୋତେ ଓଡିଶାର ପ୍ରଥମ ମହିଳା ମୁଖ୍ୟମନ୍ତ୍ରୀ ବୋଲି କାହିଁକି କହୁଛନ୍ତି। ହଠାତ୍ ନନ୍ଦିନୀ ଦେବୀଙ୍କ ଏପରି ପ୍ରଶ୍ନରେ ସମସ୍ତେ ସ୍ତବ୍ଧ ହୋଇପଡିଥିଲେ। ତାପରେ ନନ୍ଦିନୀ ଦେବୀ କହିଲେ, ଯେଉଁମାନେ ମୋତେ ଏପରି ସମ୍ବୋଧନ କଲେ ସେହିମାନଙ୍କୁ ମୋର ପ୍ରଶ୍ନ ମୁଁ ଯଦି ପ୍ରଥମ ହେଲି ତେବେ ଓଡିଶାର ଦ୍ବିତୀୟ ମହିଳା ମୁଖ୍ୟମନ୍ତ୍ରୀ କିଏ ? ଯଦି କେହି ନାହାଁନ୍ତି ତେବେ ମୁଁ ପ୍ରଥମ କାହିଁକି ହେବି ? ପ୍ରେକ୍ଷାଳୟରେ ସମସ୍ତେ ପରସ୍ପରକୁ ଅନେଇଲେ। ଭାବିଲେ ସେମାନେ କଣ କିଛି ଭୁଲ କହିଛନ୍ତି କି ? କିଛି ସମୟ ପାଇଁ ଦର୍ଶକରେ ଭରପୁର ସେହି ପ୍ରେକ୍ଷାଳୟଟି ନିରବି ଯାଇଥିଲା। ନନ୍ଦିନୀଦେବୀ ମଧ୍ୟ ପ୍ରଶ୍ନଟି ଫୋପାଡି ଦେଇ କିଛି ସମୟ ପାଇଁ ଚୁପ ରହି ସମସ୍ତଙ୍କୁ ଅନାଉଥିଲେ।

କିଛି ସମୟର ନିରବତା ପରେ ନନ୍ଦିନୀଦେବୀ କହିଲେ ଯେ, ବର୍ତ୍ତମାନ ସୁଦ୍ଧା ଓଡିଶାରେ ଦ୍ବିତୀୟ କିମ୍ବା ତୃତୀୟ ମହିଳା ମୁଖ୍ୟମନ୍ତ୍ରୀ ନାହାଁନ୍ତି। ଯଦି ଥାଆନ୍ତେ ତେବେ ମୁଁ ପ୍ରଥମ ମହିଳା ମୁଖ୍ୟମନ୍ତ୍ରୀ ହୋଇଥାଆନ୍ତି। ଯେ ପର୍ଯ୍ୟନ୍ତ ଓଡିଶାରେ କେହି ମହିଳା ମୁଖ୍ୟମନ୍ତ୍ରୀ ହୋଇ ନାହାଁନ୍ତି, ସେ ପର୍ଯ୍ୟନ୍ତ ମୁଁ ହେଉଛି ଓଡିଶାର ‘ଏକମାତ୍ର’ ମହିଳା ମୁଖ୍ୟମନ୍ତ୍ରୀ। ପ୍ରଥମ ନୁହଁ ଏକମାତ୍ର। ଏପରି ଉତ୍ତରରେ ସେଠାରେ ଉପସ୍ଥିତ ସମସ୍ତ ବିଜ୍ଞ ଅତିଥି ତଥା ଦର୍ଶକମାନେ ନିରବରେ ନିଜର ଭୁଲ ବୁଝି ନନ୍ଦିନୀଦେବୀଙ୍କ କଥାକୁ ସମର୍ଥନ କରିଥିଲେ। ସେଦିନର ନନ୍ଦିନୀ ଦେବୀ ସେହି ଭାଷଣ ମୋ ପାଇଁ ଏକ ସ୍ମରଣୀୟ ହୋଇ ରହିଛି।

( ଗତକାଲି ଓଡିଶାର ପୂର୍ବତନ ମୁଖ୍ୟମନ୍ତ୍ରୀ ନନ୍ଦିନୀ ଶତପଥୀଙ୍କ ୧୫ ତମ ଶ୍ରାଦ୍ଧ ଦିବସ ଉପଲକ୍ଷେ ଏହି ଲେଖାଟି ବରିଷ୍ଠ ସାମ୍ବାଦିକ ଶରତ ପାଇକରାୟଙ୍କ ଫେସବୁକ ପୋଷ୍ଟରୁ ପ୍ରକାଶିତ କରାଯାଇଛି।)