ଚିଲିକାର ଗୋଳିଆ ରାଜନୀତିରେ କଣ ପାରିକୁଦ ରାଜା ପାରିବେ ??

Published: Mar 10, 2023, 5:44 pm IST
ଚିଲିକା

ଭୁବନେଶ୍ବର: ଦୋଳ ଉତ୍ସବ ବେଳେ ପାରିକୁଦ ରାଜା ସନ୍ତୋଷ କୁମାର ଦେବ ଘୋଷଣା କଲେ ଯେ ସେ ଚିଲିକାରୁ ବିଜେଡି ପ୍ରାର୍ଥୀ ହେବାକୁ ଆଗ୍ରହୀ ଅଛନ୍ତି। ଏମିତି ତ ସେହି ନିର୍ବାଚନ ମଣ୍ଡଳୀ ପାଇଁ ବହୁ ନେତା ବିଧାୟକ ପ୍ରାର୍ଥୀ ହେବେ ବୋଲି ସ୍ବପ୍ନ ଦେଖିବାରେ ଲାଗିଛନ୍ତି। ହେଲେ ହଠାତ ପରିକୁଦ ରାଜା କାହିଁକି ଆଗ୍ରହୀ ହେଲେ। ଏହା ଭିତରେ କିଛି ଗୁପ୍ତ ରହସ୍ୟ ରହିଛି କି ? ବର୍ତ୍ତମାନ ଚିଲିକା ରାଜନୀତି ଯାହା ସେଥିରେ ରାଜା ସାହେବ କଣ ସେ ପାରିବେ ?

ଏହିପରି ବିଭିନ୍ନ ପ୍ରଶ୍ନ ବର୍ତ୍ତମାନ ଚିଲିକା ନିର୍ବାଚନ ମଣ୍ଡଳୀରେ ଘୁରିବାରେ ଲାଗିଛି। ଅନେକ ସେହି ପାରିକୁଦ ରାଜା କିଏ, ସେ କେଉଁଠି ରୁହନ୍ତି ବୋଲି ଅନ୍ୟମାନଙ୍କୁ ପଚାରିବାରେ ଲାଗିଛନ୍ତି। କାରଣ ପାରିକୁଦ ରାଜାଙ୍କର ବାଲୁଗାଁ ବାଣପୁର ବା ଚିଲିକା ନିର୍ବାଚନ ମଣ୍ଡଳୀରେ କୌଣସି ପରିଚିତି ନାହିଁ। ସେ ସମସ୍ତଙ୍କ ପାଇଁ ଚିହ୍ନା ମୁହଁ ନୁହଁନ୍ତି। ତାଙ୍କର ବଂଶଧରଙ୍କ ରାଜ ଶାସନରେ ଚିଲିକା ନିର୍ବାଚନ ମଣ୍ଡଳୀ ଆସୁ ନ ଥିଲା। ତାଙ୍କ ପୂର୍ବପୁରୁଷ ରାଜାମାନଙ୍କ ଶାସନ କିପରି ତାହା କେହି ଜାଣନ୍ତି ନାହିଁ।

ଏପରି କ୍ଷେତ୍ରରେ ରାଜା ସାହେବ ଚିଲିକାର ଗୋଳିଆ ରାଜନୀତିରେ କାହିଁକି ପଶିବେ ତାହା ବୁଝି ହେଉ ନାହିଁ। ବର୍ତ୍ତମାନ ଚିଲିକାର ରାଜନୀତି ତଥା ବିଜେଡିର ପରିସ୍ଥିତି ଭଲ ନାହିଁ। ପୂର୍ବତନ ବିଧାୟକ ରଘୁନାଥ ସାହୁ ବିଦ୍ରୋହୀ ବିଜେଡି ଭାବେ ଉଭା ହୋଇଛନ୍ତି। ସେ କେତେକ କର୍ମିଙ୍କୁ ଧରି ନାଚିବାରେ ଲାଗିଛନ୍ତି। ଏପଟେ ବିଧାୟକ ପ୍ରଶାନ୍ତ ଜଗଦେବ ତାଙ୍କ ଧର୍ମପତ୍ନୀଙ୍କ ମାଧ୍ୟମରେ ନିଜର ପତିୟାରାକୁ ଜାହିର କରିବାରେ ଲାଗିଛନ୍ତି।

ଏପରି ଛକା ପଞ୍ଚା ଭିତରେ ରାଜା ସାହେବ କେଉଁ ଆଡୁ ଚିଲିକା ଡଙ୍ଗାର ମଙ୍ଗ ଧରିବେ ତାହା ପ୍ରଶ୍ନବାଚୀ ସୃଷ୍ଟି କରିଛି। ଚିଲିକାରେ ତାଙ୍କର ନା ପତିୟାରା ନା ଲୋକ ପ୍ରିୟତା ରହିଛି। ନା ସେ କେବେ ରାଜନୈତିକ ମଞ୍ଚକୁ ଓହ୍ଲାଇଛନ୍ତି ନା ସେ କେବେ ସମାଜସେବା କରିବାକୁ ଆଗେଇ ଆସିଛନ୍ତି। ଏପରିକି ରାଜା ସାହେବଙ୍କୁ ଚିଲିକାର ଗାଁ ଗହଳି ଲୋକ କଥା ଛାଡନ୍ତୁ, ସହରର ଉଚ୍ଚ ଶିକ୍ଷିତ ବ୍ୟକ୍ତି ମଧ୍ୟ ଜାଣନ୍ତି ନାହିଁ।

ହେଲେ ରାଜା ସାହେବ କାହିଁକି ଏପରି ଘୋଷଣା କଲେ ବୋଲି ସମସ୍ତଙ୍କ ମନରେ ଏକ ପ୍ରଶ୍ନ ଉଙ୍କି ମାରିଛି। ତେବେ ତଥ୍ୟ ଅନୁସାରେ ଏହା ପଛରେ ବିଜେଡିର କେତେକ କୁଚକ୍ରି ଗୋଷ୍ଠୀ ଅଛନ୍ତି ବୋଲି ଅନୁମାନ କରାଯାଇଛି। ଏହି ଗୋଷ୍ଠୀ ନା ରଘୁ ସାହୁଙ୍କୁ ସମର୍ଥନ କରନ୍ତି ନା ପ୍ରଶାନ୍ତ ଜଗଦେବଙ୍କୁ। ଏହି ଦୁଇ ଜଣଙ୍କୁ ଛାଡି ଆଉ ଜଣେ ତୃତୀୟ ଲୋକ ଅନୁସନ୍ଧାନରେ ଏହି ଗୋଷ୍ଠୀ ଅଛନ୍ତି।

ସେଥିପାଇଁ ସେମାନେ ମିଳିମିଶି ରାଜା ସାହେବଙ୍କ ମୁଣ୍ଡରେ ନଡିଆ ଭାଙ୍ଗି ଦେଇଛନ୍ତି। ହେଲେ ଚିଲିକା ରାଜନୀତିରେ ରାଜା ସାହେବ ସଫଳ ହେବା ସମ୍ଭାବନା ଆଦୌ ନାହିଁ ବୋଲି କହିଲେ ଭୁଲ ହେବ ନାହିଁ।

Related posts