![election](https://thesamikhsya.com/odia/wp-content/uploads/2023/07/election.jpg)
ଭୁବନେଶ୍ବର: ସାଧାରଣ ନିର୍ବାଚନ ପାଖେଇ ଆସୁଥିବାବେଳେ ସମ୍ବଲପୁର ଲୋକସଭା ଆସନ ପାଇଁ ୩ ପ୍ରମୁଖ ରାଜନୈତିକ ଦଳ ନିଜର ପ୍ରାର୍ଥୀ ଚୟନ ନେଇ ହରଡ଼ଘଣାରେ ପଡ଼ିଯାଇଛନ୍ତି। ବିଜେପି-ବିଜେଡି-କଂଗ୍ରେସ ଆଗାମୀ ନିର୍ବାଚନରେ ଗତଥରର ପ୍ରାର୍ଥୀଙ୍କୁ ଟିକେଟ ଦେବେ କି ନୂଆ ପ୍ରାର୍ଥୀ ଦେବେ ସେ ନେଇ ଅଙ୍କକଷା ଆରମ୍ଭ ହୋଇଛି।
କଂଗ୍ରେସରୁ ଆସି ବିଜେପିରୁ ସମ୍ବଲପୁର ଲୋକସଭା ପାଇଁ ପ୍ରାର୍ଥୀ ହୋଇଥିବା ନିତେଶ ଗଙ୍ଗଦେବ ନଳିନୀକାନ୍ତଙ୍କଠାରୁ ୯,୧୬୨ ଖଣ୍ଡ ଅଧିକ ଭୋଟ ପାଇ ବିଜୟୀ ହୋଇଥିଲେ। ସେ ୪ଲକ୍ଷ ୭୩ ହଜାର ୭୭୦ ଖଣ୍ଡ (୪୨.୧୩%) ଭୋଟ ପାଇଥିଲେ। ଇତି ମଧ୍ୟରେ ପାରିବାରିକ ବିବାଦରେ ଛନ୍ଦି ହୋଇଥିବା ନିତେଶଙ୍କୁ ଭୋଟ ପରେ ନିର୍ବାଚନ ମଣ୍ଡଳୀର ମତଦାତାମାନେ ଦେଖିବାକୁ ପାଉନାହାନ୍ତି।
ନିତେଶ ଲୋକଙ୍କ ସମସ୍ୟାକୁ ଅଣଦେଖା କରି ଅଧିକାଂଶ ସମୟ ଦେବଗଡ଼ କିମ୍ବା ଦିଲ୍ଲୀରେ ବିତାଇବାକୁ ପସନ୍ଦ କରୁଛନ୍ତି। ତେଣୁ, ବିଜେପି ତାଙ୍କୁ ପୁଣିଥରେ ଏଠାରୁ ପ୍ରାର୍ଥୀ କରିବ ନାହିଁ ବୋଲି ଆଲୋଚନା ହେଉଛି।
ଏଭଳି ସ୍ଥିତିରେ ସମ୍ବଲପୁର ଜିଲ୍ଲାର ୪ଟି, ଦେବଗଡ଼ ଜିଲ୍ଲାର ଗୋଟିଏ ଓ ଅନୁଗୁଳ ଜିଲ୍ଲାର ୨ଟି ବିଧାନସଭା କ୍ଷେତ୍ରକୁ ନେଇ ଗଠିତ ସମ୍ବଲପୁର ଲୋକସଭା ଆସନରେ ଗ୍ରହଣୀୟ ହେଲା ଭଳି ଅନ୍ୟଜଣେ ନେତା ହେଉଛନ୍ତି ବିରୋଧୀ ଦଳର ନେତା ଜୟ ନାରାୟଣ ମିଶ୍ର। ସ୍ୱାସ୍ଥ୍ୟଗତ ସମସ୍ୟା କାରଣରୁ ଜୟ ନାରାୟଣ ତାଙ୍କ ସୁରକ୍ଷିତ ସମ୍ବଲପୁର ବିଧାନସଭା କ୍ଷେତ୍ର ଛାଡ଼ି ଲୋକସଭା ନିର୍ବାଚନ ଲଢ଼ିବାକୁ କଦାପି ରାଜି ହେବେ ନାହିଁ।
ତେବେ, ଯୁବାବସ୍ଥାରେ ବହୁ ବର୍ଷ ସମ୍ବଲପୁରରେ ବିତାଇଥିବା ଧର୍ମେନ୍ଦ୍ର ପ୍ରଧାନଙ୍କୁ ବିଜେପି ଏଠାରୁ ପ୍ରାର୍ଥୀ କଲେ ଦଳ ସୁବିଧାଜନକ ସ୍ଥିତିରେ ରହିବ କୁହାଯାଉଛି। ନିଜ ଗୃହ ଜିଲ୍ଲା ଅନୁଗୁଳର ଦୁଇଟି ବିଧାନସଭା କ୍ଷେତ୍ରରେ ବିଜେଡିର ଭୋଟ ବିଭାଜନରେ ସେ ସଫଳ ହେବେ। ପୁନର୍ଗଠନ ପୂର୍ବରୁ ସେ ଥରେ ଦେବଗଡ଼ ଲୋକସଭା କ୍ଷେତ୍ରର ସାଂସଦ ଥିଲେ। ଦେବଗଡ଼ ଏବେ ସମ୍ବଲପୁର ଲୋକସଭା କ୍ଷେତ୍ରରେ ଆସୁଛି। ତେବେ, ଧର୍ମେନ୍ଦ୍ର ସମ୍ବଲପୁର ଓ ନିଜ ଗୃହ ଲୋକସଭା କ୍ଷେତ୍ର ଢେଙ୍କାନାଳ ମଧ୍ୟରୁ କାହାକୁ ବାଛିବେ ତାଙ୍କ ଉପରେ ନିର୍ଭର କରୁଛି।
୨୦୧୯ ମସିହା ନିର୍ବାଚନରେ ଅନୁଗୁଳ ଜିଲ୍ଲାରେ ଜନ୍ମିତ ଓ ସମ୍ବଲପୁରରେ ବହୁ ସମୟ ବିତାଇଥିବା ବିଜେଡି ପ୍ରାର୍ଥୀ ହୋଇଥିଲେ ନଳିନୀକାନ୍ତ ପ୍ରଧାନ। ତାଙ୍କୁ ଛେଣ୍ଡିପଦା ଓ ଆଠମଲ୍ଲିକରୁ ଅଧିକ ଭୋଟ ମିଳିଥିଲେ ହେଁ ସମ୍ବଲପୁର ଜିଲ୍ଲାରୁ ଆଶାନୁରୂପ ଭୋଟ ନ ମିଳିବା ଯୋଗୁ ସେ ପରାଜିତ ହୋଇଥିଲେ। ସେ ୪ଲକ୍ଷ ୬୪ ହଜାର ୬୦୮ଖଣ୍ଡ ଭୋଟ (୪୧.୩୨%) ପାଇ ଦ୍ୱିତୀୟ ସ୍ଥାନରେ ଥିଲେ।
ନିର୍ବାଚନରେ ପରାଜିତ ହେବା ପରେ ନଳିନୀକାନ୍ତ ପ୍ରଧାନ ସମ୍ବଲପୁର ଲୋକସଭା କ୍ଷେତ୍ରରେ ଅଧିକ ସକ୍ରିୟ ଥିଲେ। ଗତ ପଞ୍ଚାୟତ ନିର୍ବାଚନ ସମୟରୁ ତାଙ୍କୁ ସମ୍ବଲପୁର ଅପେକ୍ଷା ଆଠମଲ୍ଳିକ ବିଧାନସଭା କ୍ଷେତ୍ରର ରାଜନୀତିରେ ଅଧିକ ସକ୍ରିୟ ରହୁଥିବା ଦେଖିବାକୁ ମିଳୁଛି।ଶାସକ ବିଜେଡି ସମ୍ବଲପୁର ଲୋକସଭା ଆସନରେ ଆଗାମୀ ନିର୍ବାଚନରେ କାହାକୁ ପ୍ରାର୍ଥୀ କରିବ, ଏବେଠୁ ଆକଳନ କରିବା ମୁସ୍କିଲ।
ତଥାପି, ନଳିନୀ ପ୍ରଧାନଙ୍କ ସହିତ ପୂର୍ବତନ ସାଂସଦ ନଗେନ୍ଦ୍ର ପ୍ରଧାନ, ସମ୍ବଲପୁର ଜିଲ୍ଲା ପରିଷଦ ସଭାପତି କୁମୋଦିନୀ ନାୟକ ଓ ଯୁବନେତା ସଂଜିତ ମହାନ୍ତି ପ୍ରମୁଖଙ୍କ ସହିତ ବହୁ ନେତାଙ୍କ ନାମ ଚର୍ଚ୍ଚାରେ ରହିଛି।
ଗତ ନିର୍ବାଚନରେ ମାତ୍ର ୧ଲକ୍ଷ ୩୫ହଜାର ୯୬୯ (୧୨.୦୯%) ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଥିବା କଂଗ୍ରେସ ପ୍ରାର୍ଥୀ ଶରତ ପଟ୍ଟନାୟକ ଏବେ ଓଡ଼ିଶା ପ୍ରଦେଶ କଂଗ୍ରେସ କମିଟିର ସଭାପତି ଅଛନ୍ତି। ସମ୍ବଲପୁର ଲୋକସଭା କ୍ଷେତ୍ର ତାଙ୍କର ନିର୍ବାଚନ ମଣ୍ଡଳୀ ନୁହେଁ। ସେ ବଲାଙ୍ଗୀରରୁ ଆସି ସମ୍ବଲପୁରରୁ ଲଢ଼ୁଥିଲେ। ଦିଲ୍ଲାରେ କଂଗ୍ରେସର ସଂଗଠନ ବହୁତ ଦୁର୍ବଳ ରହିଛି। ଏଭଳି ସ୍ଥିତିରେ ଶରତ ପୂରା ରାଜ୍ୟର ନିର୍ବାଚନ ଦାୟିତ୍ୱ ସମ୍ଭାଳିବାକୁ ଥିବାରୁ ସେ ନିଶ୍ଚିତଭାବେ ନିଜ ପାଇଁ କୌଣସି ସୁରକ୍ଷିତ ଆସନ ଦେଖିବେ।
ପୂର୍ବରୁ ସମ୍ବଲପୁର ଆସନରୁ ପ୍ରାର୍ଥୀ ହୋଇଥିବା ସଂଜୟ ଭୋଇ ଏବେ ବିଜେପି ଯୋଗ ଦେଇଛନ୍ତି। ତେଣୁ କଂଗ୍ରେସ ପାଇଁ ସମ୍ବଲପୁରରେ ପ୍ରାର୍ଥୀ ମଡ଼କ ପଡ଼ିଛି ବୋଲି କହିଲେ ଭୁଲ ହେବ ନାହିଁ। ଏଭଳି ସ୍ଥିତିରେ କିଏ ପ୍ରାର୍ଥୀ ହେବ ଦଳୀୟ ନେତାମାନେ କିଛି କହିପାରୁନାହାନ୍ତି।