ଭୁବନେଶ୍ୱର: ପୁରୀ, ବ୍ରହ୍ମଗିରି, ସତ୍ୟବାଦୀ, ପିପିଲି, ବାଲିପାଟଣା, ଚିଲିକା, ରଣପୁର, ନୟାଗଡ଼ ବିଧାନସଭା କ୍ଷେତ୍ରକୁ ନେଇ ପୁରୀ ଲୋକସଭା ଆସନ ଗଠିତ। ୧୯୯୮ରୁ ଏହି ଆସନଟି ଶାସକ ବିଜଦର କବ୍ଜାରେ ରହିଛି। ଏଠାରୁ ବିଜଦ ଏକାଦିକ୍ରମେ ୬ଥର ଜିତିଥିବାବେଳେ ବର୍ତ୍ତମାନର ସାଂସଦ ୩ଥର ବିଜୟୀ ହୋଇଛନ୍ତି। କିନ୍ତୁ ଗତ ନିର୍ବାଚନରେ ପୁରୀ ଲୋକସଭା ଆସନରୁ ଭାଜପା ପ୍ରାର୍ଥୀ ଡା. ସମ୍ବିତ ପାତ୍ର ବିଜଦ ପ୍ରାର୍ଥୀଙ୍କୁ କଡ଼ା ଟକ୍କର ଦେଇ ମାତ୍ର ୧୧,୭୧୪ ଭୋଟରେ ହାରିଯାଇଥିଲେ। ୨୦୧୯ ନିର୍ବାଚନ ହାରିବା ପରଠାରୁ ଡା. ପାତ୍ର ବସି ନ ଯାଇ ଲୋକସମ୍ପର୍କ ରକ୍ଷା କରିଆସୁଛନ୍ତି। ଯାହାଫଳରେ ସେ ଅନ୍ୟଦଳର ସମ୍ଭାବ୍ୟ ପ୍ରାର୍ଥୀମାନଙ୍କଠାରୁ ଚର୍ଚ୍ଚାରେ ଯଥେଷ୍ଟ ଆଗରେ ଅଛନ୍ତି।
୨୦୦୯ରେ ନର୍ବାଚନ ପୂର୍ବରୁ କଂଗ୍ରେସ ଛାଡ଼ି ବିଜଦରେ ଯୋଗଦେଇ ଲୋକସଭାକୁ ୩ଥର ନିର୍ବାଚିତ ହେଲେଣି ସାଂସଦ ପିନାକୀ ମିଶ୍ର। ନିଜର ବ୍ୟକ୍ତିଗତ କାରଣରୁ ସେ ଆଗାମୀ ନିର୍ବାଚନ ଲଢ଼ିବେ ନାହିଁ ବୋଲି ଦଳୀୟ ମହଲରେ ଆଲୋଚନା ହେଉଛି। କିନ୍ତୁ ପ୍ରକୃତ ପକ୍ଷେ ୩ଥର ସାଂସଦ ଭାବରେ ନିର୍ବାଚିତ ହେବାପରେ ସାଂସଦ ପିନାକୀ ମିଶ୍ରଙ୍କର ଲୋକପ୍ରିୟତା ହ୍ରାସ ପାଇଥିବା ଗତ ନିର୍ବାଚନରେ ଆଗକୁ ଆସିଥିଲା। ଏଠାରୁ ସେ ପୂର୍ବ ଦୁଇଟି ନିର୍ବାଚନରେ ୨ଲକ୍ଷରୁ ଅଧିକ ଭୋଟରେ ବିଜୟୀ ହୋଇଥିଲେ। କିନ୍ତୁ ୨୦୧୯ ନିର୍ବାଚନରେ ଭାଜପାର ନବାଗତ ପ୍ରାର୍ଥୀ ଡା.ସମ୍ବିତ ପାତ୍ୟଙ୍କଠାରୁ କଡ଼ା ମୁକ୍କାବିଲ୍ଲାର ସମ୍ମୁଖୀନ ହୋଇ ହାରୁ ହାରୁ ମାତ୍ର ୧୧ ହଜାରରୁ ଅଧିକ ଭୋଟରେ ଜିତି ଯାଇଥିଲେ। ଇତି ମଧ୍ୟରେ ବିଜଦ ସାଂସଦ ଶ୍ରୀ ମିଶ୍ର ନିଜର ଲୋକପ୍ରିୟତା ହ୍ରାସ ପାଇବା ଓ ବିଭିନ୍ନ ବିବାଦରେ ଛନ୍ଦି ହୋଇପଡ଼ିଥିବା କାରଣରୁ ସେ ପ୍ରାର୍ଥୀ ନ ହେବାକୁ ସ୍ଥିର କରିଛନ୍ତି। ତେଣୁ ନିକଟରେ ଆଦିତ୍ୟ ବିର୍ଲ୍ଲା କମ୍ପାନୀର ସିଇଓ ପଦବୀ ଛାଡ଼ି ସଂତୃପ୍ତ ମିଶ୍ର ଶାସକ ଦଳ ବିଜଦରେ ଯୋଗ ଦେଇଛନ୍ତି। ସେ ଯୋଗଦେବା ପରେ ରାଜ୍ୟସଭା ପାଇଁ ପ୍ରାର୍ଥୀ ହେବେ ବୋଲି ରାଜନୀତିକ ମହଲରେ ଯେଉଁ ଆଲୋଚନା ହେଉଥିଲା ତା’ର ଯବନିକା ପଡ଼ିଛି। ସଂତୃପ୍ତ ମିଶ୍ର ପୁରୀ ଜିଲ୍ଲାର ମୂଳ ଅଧିବାସୀ ହୋଇଥିବାରୁ ତେଣୁ ତାଙ୍କୁ ବିଜଦ ପକ୍ଷରୁ ପୁରୀ ଲୋକସଭା ଆସନରେ ପ୍ରାର୍ଥୀ କରାଯିବ ବୋଲି ଦଳୀୟ ମହଲରେ ଆଲୋଚନା ହେଉଛି। ଗତ କିଛିଦିନ ହେବ ପୁରୀ ଜିଲ୍ଲାରେ ବିଜଦର ସଂଗଠନରେ ଯେପରି ବିଶୃଙ୍ଗଳା ଦେଖାଦେଇଛି ତାହାକୁ କିପରି ସମାଧାନ କରି ସଂତୃପ୍ତ ମିଶ୍ର ନିଜର ସାଂଗଠନିକ କାମ ଆରମ୍ଭ କରିବେ ତାହା ବଡ଼ ପ୍ରଶ୍ନବାଚୀ ସୃଷ୍ଟି କରିଛି।
ବିଗତ ୩ଟି ନର୍ବାଚନରୁ ଗତଥର ପ୍ରଥମ ଥର ପାଇଁ ଭାଜପା ପ୍ରାର୍ଥୀ ଡା. ସମ୍ବିତ ପାତ୍ର ପ୍ରତିଦ୍ୱନ୍ଦ୍ୱୀତାକୁ ଆସି ବିଜଦ ପ୍ରାର୍ଥୀଙ୍କୁ କଡ଼ା ଟକ୍କର ଦେଇଥିଲେ। ମାତ୍ର ୧୧ ହଜାର ଭୋଟରେ ପରାଜିତ ହେବା ପରେ ଡା. ପାତ୍ର ୨୦୨୪ ନିର୍ବାଚନକୁ ଆଖି ଆଗରେ ରଖି ଜନସମ୍ପର୍କ ଅଭିଯାନ ଜାରୀ ରଖିଛନ୍ତି। କହିବାକୁ ଗଲେ ଅନ୍ୟଦଳର ସମ୍ଭାବ୍ୟ ପ୍ରାର୍ଥୀମାନଙ୍କ ପାଇଁ ଡା. ପାତ୍ର ଏକ ଆହ୍ୱାନ ସୃଷ୍ଟି କରିସାରଛନ୍ତି। କାରଣ ମତଦାତାମାନେ ଯାହାଙ୍କୁ ବିଗତ ୩ଟି ନିର୍ବାଚନରେ ବିଜୟୀ କରାଇଛନ୍ତି ତାଙ୍କୁ କେବେ ବି ଭେଟି ନିଜର ସମସ୍ୟା ସମାଧାନ କହିବାର ସୁଯୋଗ ପାଉନାହାନ୍ତି। ଅପର ପକ୍ଷରେ ଡା. ପାତ୍ର ହାରିଯାଇଥିଲେ ବି ଲୋକମାନଙ୍କ ସମସ୍ୟା ସମାଧାନ ଦିଗରେ ପଦକ୍ଷେପ ନେଉଛନ୍ତି। ତେଣୁ ଆଗାମୀ ନିର୍ବାଚନରେ ଡା. ପାତ୍ର ପ୍ରଚାର ଓ ଜନ ସମ୍ପର୍କ ରଖିବା ଦୃଷ୍ଟିରୁ ବହୁ ଆଗରେ ରହିଛନ୍ତି। ଏହି ଦୃଷ୍ଟିରୁ ଆଗାମୀ ନିର୍ବାଚନରେ ତାଙ୍କର ଜିତିବା ସମ୍ଭାବନା ଅଧିକ ବୋଲି ସାଧାରଣରେ ଆଲୋଚନା ହେଉଛି।
ପୁରୀ ଲୋକସଭା ଆସନରେ କଂଗ୍ରେସ ଦଳ ପୂର୍ବରୁ ୬ଥର ବିଜୟୀ ହୋଇଥିଲେ ହେଁ ଗତ ନିର୍ବାଚନରେ ଦଳର ପ୍ରାର୍ଥୀ ସତ୍ୟପ୍ରକାଶ ନାୟକ ପୂର୍ବରୁ ମିଳୁଥିବା କଂଗ୍ରେସର ପକେଟ ଭୋଟ ହାସଲ କରିବାରେ ବିଫଳ ହୋଇଥିଲେ। ତେଣୁ ଆଗାମୀ ନିର୍ବାଚନରେ ତାଙ୍କୁ ପୁଣିଥରେ ପ୍ରାର୍ଥୀ କରାଯିବାର ସମ୍ଭାବନା ନାହିଁ। ଏପରି କ୍ଷେତ୍ରରେ କଂଗ୍ରେସ କାହାକୁ ପ୍ରାର୍ଥୀ କରିବ ତାହା ଏପର୍ଯ୍ୟନ୍ତ ଆଲୋଚନାକୁ ଆସିପାରିନାହିଁ। ନିର୍ବାଚନ ପୂର୍ବରୁ ବାହାଘରବେଳେ ବାଇଗଣ ରୋଇଲା ଭଳି ଉପରୁ ସବୁଥର ଭଳି ଜଣେ ନେତାଙ୍କୁ ପ୍ରାର୍ଥୀ ଭାବରେ ଘୋଷଣା କରାଯିବ। ଯିଏକି ସଂଗଠନ ସମ୍ଭାଳିବା ଓ ପ୍ରଚାର କରିବା ପାଇଁ ସମୟ ପାଇବେ ନାହିଁ। ଏଭଳି ସ୍ଥିତିରେ କଂଗ୍ରେସ କେବଳ ପୁରୀ ଲୋକସଭା ଆସନରେ ନିଜର ଔପଚାରିକତା ପୂରା କରିବ ବୋଲି ଆଲୋଚନା ହେଉଛି।
