ଭୁବନେଶ୍ବର: କେନ୍ଦ୍ରାପଡା ଜିଲ୍ଲାର ଆଳି ନିର୍ବାଚନ ମଣ୍ଡଳି ବିଭିନ୍ନ ସମୟରେ ଚର୍ଚ୍ଚାରେ ରହିଥାଏ। କାରଣ ଏହି ନିର୍ବାଚନ ମଣ୍ଡଳିର ବିଧାୟକ ହେଉଛନ୍ତି ବିଜେଡିର ଟାଣୁଆ ନେତା ତଥା ମନ୍ତ୍ରୀ ପ୍ରତାପ ଦେବ। ତେବେ ଏଥର ନିର୍ବାଚନରେ ପ୍ରତାପଙ୍କ ସହିତ ଜଣେ ଯୁବତୀ ଲଢେଇ କରିବା ପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି। ଯାହାକୁ ନେଇ ପ୍ରତାପ ବର୍ତ୍ତମାନ ଚିନ୍ତାରେ ପଡିଯାଇଛନ୍ତି।
ଏଥର ନିର୍ବାଚନରେ ପ୍ରତାପଙ୍କୁ ଟକ୍କର ଦେବା ପାଇଁ ପ୍ରସ୍ତୁତ ହେଉଛନ୍ତି ଦେବସ୍ମିତା ଶର୍ମା। ସେ କଂଗ୍ରେସରୁ ପ୍ରାର୍ଥୀ ହେବେ ବୋଲି ଜଣାପଡିଛି। ଆଉ ସେ ହେଉଛନ୍ତି ଆଳିର ପୂର୍ବତନ କଂଗ୍ରେସ ବିଧାୟକ ଦେବେନ୍ଦ୍ର ଶର୍ମାଙ୍କ ଝିଅ। ଦେବେନ୍ଦ୍ର ଶର୍ମା ଏଥର ନିର୍ବାଚନରେ ପ୍ରତିଦ୍ବନ୍ଦିତା କରିବେ ନାହିଁ ବୋଲି ଘୋଷଣା କରିଛନ୍ତି। ତାଙ୍କ ବଦଳରେ ଝିଅ ଦେବସ୍ମିତା ଛିଡା ହେବ ବୋଲି କଂଗ୍ରେସ ସବୁଜ ସଙ୍କେତ ଦେଇଛି ବୋଲି ଜଣାପଡିଛି।
ଦେବେନ୍ଦ୍ର କହିଛନ୍ତି ଯେ ତାଙ୍କର ଦେହ ଭଲ ରହୁ ନ ଥିବାରୁ ସେ ଆଉ ନିର୍ବାଚନରେ ଭାଗ ନେବେ ନାହିଁ। ତେବେ ସେ ନିର୍ବାଚନ ମଣ୍ଡଳି ରାଜନୀତିରେ ସକ୍ରିୟ ରହିବେ। ବର୍ତ୍ତମାନ ଯୁବ ପିଢି ନିର୍ବାଚନକୁ ଆସିବା ଦରକାର ବୋଲି ଦେବେନ୍ଦ୍ର କହିଛନ୍ତି। ସେଥିପାଇଁ ଝିଅ ରାଜନୀତିରେ ପାଦ ଦେଇଛି। ବର୍ତ୍ତମାନ ଆଳି ଏବଂ ରାଜକନିକାରେ କଂଗ୍ରେସ ସଂଗଠନ ବେଶ ସୁଦୃଢ ରହିଛି। ସେଥିପାଇଁ ଦେବସ୍ମିତା ଜିତିବା ସହଜ ହେବ ବୋଲି ଦେବେନ୍ଦ୍ର ଆଶା ରଖିଛନ୍ତି।
ଦେବସ୍ମିତା ଏଥର ନିର୍ବାଚନରେ ଛିଡା ହେବେ ବୋଲି ଚାକିରୀରୁ ଇସ୍ତଫା ପ୍ରଦାନ କରିଛନ୍ତି। ସେ ବୃତିରେ ଜଣେ ଡାକ୍ତର। ନିକଟରେ ସେ ସରକାରୀ ଡାକ୍ତରୀ ପଦବୀରୁ ଇସ୍ତଫା ଦେଇଛନ୍ତି। ତେବେ ଦେବସ୍ମିତା ବହୁ ପୂର୍ବରୁ ନିର୍ବାଚନ ରଣାଙ୍ଗନରେ ଛିଡା ହେବେ ବୋଲି ନିଷ୍ପତି କରି ସେହି ଅଞ୍ଚଳରେ ଲୋକସଂପର୍କ ଜାରୀ ରଖିଛନ୍ତି। ସେ ଘରକୁ ଘର ବୁଲି ଲୋକଙ୍କ ସହିତ ବିଶେଷ କରି ମହିଳାଙ୍କ ସହିତ ଯୋଗାଯୋଗରେ ଅଛନ୍ତି।
ଏ ନେଇ ଦେବସ୍ମିତା କହୁନ୍ତି ଯେ ତାଙ୍କ ଜେଜେବାପା ଦିବାକର ଶର୍ମା ଡାକ୍ତର ଥାଇ ରାଜନୀତିରେ ପାଦ ଦେଇଥିଲେ। ଆଉ ବିଧାୟକ ମଧ୍ୟ ହୋଇଥିଲେ। ସେହିପରି ବାପା ଦେବେନ୍ଦ୍ର ଶର୍ମା ମଧ୍ୟ ବିଧାୟକ ଥିଲେ। ତେଣୁ ଆମ ପରିବାର ଗୋଟିଏ ରାଜନୈତିକ ପରିବାର। ଆମ ପରିବାର ପ୍ରତି ଆଳି ଜନସଧାରଣଙ୍କର ଭଲ ପାଇବା ରହିଛି। ପରବର୍ତ୍ତି ପିଢି ଭାବେ ତାହାକୁ ମୁଁ ଆଗକୁ ନେବେ ବୋଲି ଦେବସ୍ମିତା କହିଛନ୍ତି।
ଦେବସ୍ମିତା କଂଗ୍ରେସ ରାଜନୀତିରେ ପୂର୍ବରୁ ପାଦ ଥାପି ସାରିଛନ୍ତି। କାରଣ 2014 ମସିହାରେ ବାପା ଦେବେନ୍ଦ୍ର ଶର୍ମାଙ୍କ ପାଇଁ ସେ ପ୍ରଚାରର ମଙ୍ଗ ଧରିଥିଲେ। କଂଗ୍ରେସକୁ ଭୋଟ ଦେବା ପାଇଁ ସେ ଲୋକଙ୍କ ଘରକୁ ଘର ବୁଲିଥିଲେ। ବାପା ମଧ୍ୟ ସେତେବେଳେ ମୋତେ ରାଜନୀତିରେ ଆଗକୁ ଆଣିଥିଲେ ବୋଲି ଦେବସ୍ମିତା କହିଛନ୍ତି। ତେବେ ବର୍ତ୍ତମାନ ସେ ଚାକିରୀ ଛାଡି ଲୋକ ସଂପର୍କ ବଢାଇବା ପରେ ତାଙ୍କୁ ନେଇ ଆଳିରେ ବେଶ ଚର୍ଚ୍ଚା ଆରମ୍ଭ ହୋଇଯାଇଛି।
