ଭୁବନେଶ୍ବର: ଆଜି ସରକାରଙ୍କ ବିରୋଧରେ କଂଗ୍ରେସ ଏବଂ ଆଠଟି ଦଳର ଓଡିଶା ବନ୍ଦ ଡାକରା ବେଶ ସଫଳ ହୋଇଛି। କାରଣ କଟକରୁ କଳାହାଣ୍ଡି, ମାଲକାନଗିରିରୁ ମୟୁରଭଂଜ ସାରା ଓଡଶାରେ ଏହି ବନ୍ଦର ପ୍ରଭାବ ପରିଲକ୍ଷିତ ହୋଇଛି। ବାଲେଶ୍ବର ଛାତ୍ରୀ ମୃତ୍ୟୁ ଘଟଣା ନେଇ ବିରୋଧୀ ଦଳମାନେ ଏହି ବନ୍ଦ ଡାକରା ଦେଇଥିଲେ। କାଁ ଭାଁ ଗଣ୍ଡଗୋଳକୁ ଛାଡିଦେଲେ ବନ୍ଦ ଶାନ୍ତି ପୂର୍ଣ୍ଣ ଭାବେ ଶେଷ ହୋଇଛି।
ଆଜି ସକାଳ ଛଅଟାରୁ ଆରମ୍ଭ ହୋଇଥିଲା ଏହି ବନ୍ଦ। କଂଗ୍ରେସ କର୍ମିମାନେ ରାଜଧାନୀ ସମେତ ବିଭିନ୍ନ ଜିଲ୍ଲାରେ ସକାଳୁ ସକାଳୁ ରାସ୍ତା ଉପରକୁ ଚାଲିଆସିଥିଲେ। ପୂର୍ବରୁ ବନ୍ଦ ଡାକରା ଦିଆଯାଇଥିବାରୁ ବିଭିନ୍ନ ଦୋକାନ ବଜାର ବନ୍ଦ ରହିଥିଲା। ହେଲେ ରାସ୍ତାରେ ଗାଡିଚଳାଚଳକୁ ନେଇ ରୋକିଥିଲେ କଂଗ୍ରେସ କର୍ମି। ଯେଉଁମାନେ ଗାଡି ଚଳାଚଳ କରୁଥିଲେ ସେମାନଙ୍କୁ କର୍ମିମାନେ ବୁଝାଇ ଫେରାଇ ନେଉଥିଲେ।
ଆଜି ରାଜଧାନୀରେ ଏହାର ପ୍ରଭାବ ବେଶ ପରିଲକ୍ଷିତ ହୋଇଥିଲା। କଂଗ୍ରେସ କର୍ମିମାନେ ବାଣ୍ଟି ହୋଇ ବିଭିନ୍ନ ଛକରେ ଆନ୍ଦୋଳନ କରିଥିଲେ। ଯେଉଁମାନେ ଗାଡି ନେଇ ରାସ୍ତାକୁ ଆସୁଥିଲେ ସେମାନଙ୍କୁ କର୍ମିମାନେ ଗୋଲାପ ଫୁଲ ଏବଂ ଚକଲେଟ ଦେଇ ଏହି ଆନ୍ଦୋଳନକୁ ସମର୍ଥନ କରିବା ପାଇଁ ଅନୁରୋଧ କରୁଥିଲେ।
ଗାନ୍ଧୀ ମାର୍ଗରେ କଂଗ୍ରେସ ସଭାପତି ଭକ୍ତ ଦାସ ଏବଂ ପ୍ରଭାରୀ ଅଜୟ ଲାଲୁ ପ୍ରମୁଖ ନେତାମାନେ ଏକ ଶୋଭାଯାତ୍ରା କରିଥିଲେ। ସେମାନେ କଂଗ୍ରେସ ଭବନରୁ ଏକ ରାଲିରେ ବାହାରି ଲୋକସେବା ଭବନ ଆଡକୁ ମାଡି ଚାଲିଥିଲେ। ଏହାପରେ ସମସ୍ତେ ରାସ୍ତା ଉପରେ ବସି ଆନ୍ଦୋଳନ କରୁଥିଲେ। ତେବେ ବହୁ କର୍ମି ସେମାନଙ୍କୁ ଟପି ବ୍ୟାରିକେଟ ଭାଙ୍ଗିବାକୁ ଚେଷ୍ଠା କରିଥିଲେ। ଫଳରେ ପୋଲିସ ଏବଂ କଂଗ୍ରେସ କର୍ମିମଧ୍ୟରେ ଧସ୍ତା ଧସ୍ତି ହୋଇଥିଲା।
କିଛି ସମୟ ଧରି ପୋଲିସ ସହିତ ଟକ୍କର ହେବା ପରେ ନେତା ଓ କର୍ମିମାନଙ୍କୁ ପୋଲିସ ଉଠାଇ ନେଇଥିଲା। ତେବେ ଆଜି ପୋଲିସ ତରଫରୁ ସେମିତି କିଛି ବଡ ପଦକ୍ଷେପ ଗ୍ରହଣ କରାଯାଇ ନାହିଁ। ଗତକାଲି ବିଜେଡି ଆନ୍ଦୋଳନ ବେଳେ ଯେପରି ପାଣି ମାଡ ଏବଂ ଲୁହବୁହା ବାଷ୍ପ ପ୍ରୟୋଗ କରାଯାଇଥିଲା ସେପରି କିଛି ଦେଖିବାକୁ ମିଳି ନ ଥିଲା। କଂଗ୍ରେସ କର୍ମିମାନେ ଶାନ୍ତି ପୂର୍ଣ୍ଣ ଭାବେ ଏହି ବନ୍ଦକୁ ସଫଳ କରାଇଥିଲେ।