ଭୁବନେଶ୍ବର: ନିକଟରେ ଭୁବନେଶ୍ବରର ଧଉଳି ନିକଟରେ ଘଟିଯାଇଥିବା ନାବାଳିକା ଦୁଷ୍କର୍ମକୁ ନେଇ ରାଜ୍ୟ ରାଜନୀତି ବେଶ ସରଗରମ ହୋଇଉଠିଛି। ଏହି ମାମଲାରେ ସଂପୃକ୍ତ ଅଭିଯୁକ୍ତଙ୍କୁ ପୋଲିସ ଗିରଫ କରିବା ସତ୍ବେ ରାଜନୀତିରେ ଚର୍ଚ୍ଚା ଜୋରଦାର ଚାଲିଛି।
ଏହି ଘଟଣାକୁ ନେଇ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀଦଳର ନେତା ନବୀନ ପଟ୍ଟନାୟକ କଡା ସମାଲୋଚନା କରିଛନ୍ତି। ସେ କହିଛନ୍ତି ଯେ, ‘ଭୁବନେଶ୍ବରର ଛାତି ଉପରେ ନାବାଳିକାଙ୍କୁ ଗଣଦୁଷ୍କର୍ମ ଘଟଣା ଅତ୍ୟନ୍ତ ସ୍ପର୍ଶକାତର ଏବଂ ବିଚଳିତ କରିଦେବା ପରି ବିଷୟ। ବର୍ବରତା ଓ ଅରାଜକତା ସୀମା ଟପୁଛି, ରାଜ୍ୟ ରାଜଧାନୀ ଅସୁରକ୍ଷିତ ହେଉଛି। ଭୟଶୂନ୍ୟ ହେଉଛନ୍ତି ଅପରାଧୀ, ବିଶ୍ୱସନୀୟତା ହରାଉଛି ସରକାର।
ଆଇନଶୃଙ୍ଖଳା କେତେ ଆଉ ବିପର୍ଯ୍ୟସ୍ତ ହେଲେ ସରକାର ସଜାଗ ହେବେ? ଅପରାଧ ରୋକିବା ଦିଗରେ ସରକାରଙ୍କ ଅସମର୍ଥତା ସାଧାରଣ ଜନତାଙ୍କୁ ଭୟଭୀତ କରୁଛି। ରାଜଧାନୀରେ ମହିଳାଙ୍କ ପାଇଁ ସୁରକ୍ଷିତ ପରିବେଶ ସୁନିଶ୍ଚିତ କରି ନ ପାରିବା ବିଜେପି ସରକାରର ଅପାରଗତା ଓ ସମ୍ବେଦନହୀନ ଆଚରଣକୁ ଦର୍ଶାଉଛି। ମହିଳାଙ୍କ ସୁରକ୍ଷା ସହ ଅପରାଧ ପ୍ରବଣତାକୁ ରୋକିବା ପାଇଁ ସରକାର କଠୋର ପଦକ୍ଷେପ ନିଅନ୍ତୁ। ଘଟଣା ଘଟିବା ପରେ ନୁହେଁ, ପୂର୍ବରୁ ଏହାକୁ ରୋକିବା ଦିଗରେ ସରକାର ତତ୍ପର ହୁଅନ୍ତୁ। ‘
ଏହାକୁ ନବୀନ ନିଜ ସାମାଜିକ ଗଣମାଧ୍ୟମରେ ପକାଇବା ପରେ ତାହାକୁ ତୀବ୍ର ବିରୋଧ କରିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତି ପରିଡା। ସେ କହିଛନ୍ତି ଯେ, ‘ ଦୁଃଖଦ ଘଟଣା କୁ ନେଇ ରାଜନୀତି କରିବା ଆପଣଙ୍କ ଭଳି ବ୍ୟକ୍ତିତ୍ୱ ଙ୍କ ଠାରୁ ଓଡିଶା ଲୋକ ମାନେ କେବେ ବି ଆଶା କରି ନ ଥିବେ। ସତ ଆଉ କେବେ କହିବେ? ଏହି ଘଟଣା ରେ ତ୍ୱରିତ ପୋଲିସ ର ପଦକ୍ଷେପ ଓ ଅଭିଯୁକ୍ତ ଗିରଫ ଏହା ହେଉଛି ସତ। ଆପଣଙ୍କ ଦେଖେଇବା ରାସ୍ତାରେ ନୁହେଁ ଏବେ ସରକାରରେ ଆଇନ ତା ବାଟ ରେ ଯାଉଛି। ଅନୁଭବ ଆଧାରରେ ଚିଠି ଲେଖିଲେ ଖୁସି ହେବୁ ବୋଲ କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତି ପରିଡା।’
ସୂଚନା ଯୋଗ୍ୟ ଯେ, ଗତ ଦଶ ତାରିଖରେ ଜଣେ ନାବାଳିକା ତାଙ୍କର ପୁରୁଷ ବନ୍ଧୁଙ୍କ ସହିତ ଧଉଳି ବୁଲିବାକୁ ଆସିଥିଲେ। ସେମାନେ ବୁଲାବୁଲି ସାରି ଫେରିବା ବେଳେ କେତେକ ଯୁବକ ଅଟକାଇ ପଇସା ମାଗିଥିଲେ। ସେମାନେ ମନା କରିବାରୁ ପୁରୁଷ ବନ୍ଧୁଙ୍କୁ ସେମାନେ ମାଡ ମାରିଥିଲେ। ଏହାପରେ ଉଭୟଙ୍କୁ ନଇ ପଠାକୁ ନେଇ ପୁରୁଷ ବନ୍ଧୁଙ୍କୁ ଯୁବକମାନେ ବାନ୍ଧି ନାବାଳିକାକୁ ଦୁଷ୍କର୍ମ କରିଥିଲେ। ସିସି ଟିଭି ଫୁଟେଜ ଆଧାରରେ ପୋଲିସ ଦୁଇ ଜଣଙ୍କୁ ଗିରଫ କରିଥିବା ବେଳେ ଅନ୍ୟ ଅଭିଯୁକ୍ତଙ୍କୁ ଖୋଜୁଛି।