ଭୁବନେଶ୍ବର: ଆଜି ବିଜୁ ଜନତା ଦଳ ତାହାର ୨୯ ତମ ପ୍ରତିଷ୍ଠା ଦିବସ ପାଳନ କରିଛି। ଭୁବନେଶ୍ବରର ରାଜ୍ୟ କାର୍ଯ୍ୟାଳୟ ଶଙ୍ଖ ଭବନରେ ଦଳ ଏହି ଦିବସ ପାଳନ କରିଛି। ଏଥିରେ ବିଜେଡି ସୁପ୍ରିମୋ ତଥା ବିରୋଧୀ ଦଳର ନେତା ନବୀନ ପଟ୍ଟନାୟକ ଯୋଗ ଦେଇ ନେତା ଓ କର୍ମିଙ୍କ ମନୋବଳକୁ ସୁଦୃଢ କରିଛନ୍ତି। ତେବେ ପ୍ରତିଷ୍ଠା ଦିବସରେ ନବୀନ କିଛି ବଡ ଘୋଷଣା କରିବେ ବୋଲି ଯେଉଁ ସମ୍ଭାବନା ଥିଲା ସେଥିରେ ପୂର୍ଣ୍ଣଛେଦ ପଡିଛି।
ପ୍ରତିଷ୍ଠା ଦିବସରେ ନବୀନ ସୁଜାତା କାର୍ତ୍ତିକେୟନଙ୍କୁ ଦଳର ମୁଖିଆ କରିବେ ବୋଲି ବହୁ ଚର୍ଚ୍ଚା ଚାଲିଥିଲା। ଏପରିକି କେତେକ ଭେ କେ ପାଣ୍ଡିଆନଙ୍କୁ ମଧ୍ୟ ପୁଣି ଦାୟିତ୍ବ ଦେବେ ବୋଲି କୁହାଯାଉଥିଲା। ହେଲେ ସେଥିରେ ନବୀନ ପୂର୍ଣ୍ଣଛେଦ ପକାଇଛନ୍ତି। ସେ ତାଙ୍କର ଉତ୍ତାରଧିକାରୀ ଭାବେ କାହାକୁ ବି ବାଛିଲେ ନାହିଁ କି ଘୋଷଣା କିଛି କଲେ ନାହିଁ। ଫଳରେ ଏହାକୁ ନେଇ ନେତା ମହଲରେ ବେଶ ଖୁସି ପ୍ରକଟ କରାଯାଇଥିବା ଜଣାପଡିଛି।
ତେବେ ନବୀନ ଯେଉଁ ବଡ କଥା କହିଲେ ତାହା ହେଲା ଯେ, ବିଜୁ ଜନତା ଦଳ ଆହୁରି ଶହେ ବର୍ଷ ପର୍ଯ୍ୟନ୍ତ ଜନସେବା ଜାରୀ ରଖିବ। ବିରୋଧୀମାନେ ବିଜେଡି ଭାଙ୍ଗି ଖଣ୍ଡଖଣ୍ଡ ହୋଇଯିବ ବୋଲି ପ୍ରଚାର କରୁଥିଲେ। ହେଲେ ବିଜେଡି ଭାଙ୍ଗିବ ନାହିଁ, ଏହି ଦଳ ଆହୁରି ଶହେ ବର୍ଷ ପର୍ଯ୍ୟନ୍ତ ଲୋକଙ୍କର କାମ କରିବ ବୋଲି ନବୀନ କହିଛନ୍ତି। ଫଳରେ ଏହାକୁ ନେଇ କର୍ମି ମହଲରେ ବେଶ ଉତ୍ସାହ ପରିଲକ୍ଷିତ ହୋଇଛି।
ସେ କହିଥିଲେ ଯେ, ୧୯୯୭ ରୁ ବିଜେଡି ବିଜୁ ବାବୁଙ୍କ ଆଦର୍ଶ ରେ ଓଡିଶା ବାସୀଙ୍କ ସେବା କରିଚାଲିଛି। ୨୦୦୦ ରୁ ୨୦୨୪ ପର୍ଯ୍ୟନ୍ତ ବିଜେଡି ଶାସନ କ୍ଷମତାରେ ଥିଲା ଓଡିଶା ର ବିକାଶ ଇତିହାସରେ ଏହା ଥିଲା ସୁବର୍ଣ୍ଣ ଯୁଗ। ଦାରିଦ୍ର୍ୟ, କ୍ଷୁଧା, ଶିଶୁ ମୃତ୍ୟୁ ଓ ପ୍ରାକୃତିକ ବିପତ୍ତି ସହ ଲଢ଼ି ସଫଳ ହୋଇଛୁ। ଓଡିଶା କୁ ନୂଆ ପରିଚୟ ଦେଇଛୁ। ମା ମାନଙ୍କୁ ସଶକ୍ତ କରିଛୁ। ଚାଷୀଙ୍କ ରୋଜଗାର ଵୃଦ୍ଧି କରିଛୁ। BSKY ପରି ମାଗଣା ସ୍ୱାସ୍ଥ୍ୟ ସେବା ଦେଇଛୁ। ରାଜ୍ୟ କୁ ପୁଞ୍ଜି ଆଣିଛୁ। ଯୁବ ସମାଜ କୁ ନିଯୁକ୍ତି ଦେଇଛୁ। ଓଡିଶା କୁ ବିଜେଡି ସରକାର ନୂଆ ପରିଚୟ ଦେଇଛି।
ନବୀନ କହିଛନ୍ତି ଯେ, ବର୍ତ୍ତମାନ ର ବିଜେପି ସରକାର କହିବୁଲୁଛନ୍ତି ଯେ ଏଵେ ଡବଲ ଇଞ୍ଜିନ ସରକାର ଚାଲିଛି। କିନ୍ତୁ ବିକାଶ କାହିଁ ବୋଲି କହି ସେ ପ୍ରଶ୍ନ କରିଥିଲେ। ସେ କହିଥିଲେ ଯେ ଏଵେ ଚାଷୀ କୁ ସାର ମିଳୁନି। ମଣ୍ଡି ଖୋଲୁନି। ମିଶନ ଶକ୍ତି ମା ମାନେ ହଇରାଣ। ଯୁବ ସମାଜ ହତାଶ। ଗତ ଅଠର ମାସ ରେ ଅଠର ଥର ନିଯୁକ୍ତି ପରୀକ୍ଷା ପ୍ରଶ୍ନ ପ୍ରଘଟ ହେଲାଣି। ଆଇନ ଶୃଙ୍ଖଳା କଥା ନ କହିବା ଭଲ। ମହିଳା ମାନଙ୍କ ଉପରେ ଅତ୍ୟାଚାର ବଢ଼ି ଚାଲିଛି। ଏପରିକି ଛୋଟ ଛୋଟ ଝିଅ ମାନେ ମଧ୍ୟ ନିରାପଦ ନୁଁହନ୍ତି। ରାଜ୍ୟରେ ଏକ ସରକାର ଥିବା ପରି ଅନୁଭବ ହେଉ ନାହିଁ ବୋଲି ଶ୍ରୀ ପଟ୍ଟନାୟକ କ୍ଷୋଭ ପ୍ରକାଶ କରିଥିଲେ।
କର୍ମିମାନଙ୍କୁ ଆହ୍ବାନ ଦେଇ ନବୀନ କହିଛନ୍ତି ଯେ, ଆମର ସାମାଜିକ ଗଣମାଧ୍ୟମକୁ ସଶକ୍ତ କରିବାର ଆବଶ୍ୟକତା ରହିଛି। ବିଜେପି ସରକାର ସାମାଜିକ ଗଣମାଧ୍ୟମରେ ଆମ ଦଳ ବିରୋଧରେ ଅପ୍ରଚାର କରିବାରେ ଲାଗିଛି। ତାହାକୁ ମୁକାବିଲା କରିବାର ଆବଶ୍ୟକତା ରହିଛି। ସେହିପରି ସେ କହିଥିଲେ ଯେ, ରାଜନୀତିରେ ଧର୍ଯ୍ୟ ହେଉଛି ସବୁଠାରୁ ବଡ କଥା। ଆପଣମାନେ ଧର୍ଯ୍ୟ ଧରି ଦଳପାଇଁ କାମ କରନ୍ତୁ ତାହାର ମୂଲ୍ୟ ନିଶ୍ଚିତ ମିଳିବ।