ମହାରାଷ୍ଟ୍ର ରାଜନୀତିରେ ପୁଣିଥରେ ଶିବସେନାର ଦୁଇ ପ୍ରମୁଖ ଗୋଷ୍ଠୀଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା ଏବଂ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଶିବସେନା ମଧ୍ୟରେ ସମ୍ଭାବ୍ୟ ମିଶ୍ରଣକୁ ନେଇ ଚର୍ଚ୍ଚା ଜୋର ଧରିଛି। ଏହି ପ୍ରସଙ୍ଗରେ ଶିବସେନା ବିଧାୟକ ଅବଦୁଲ ସତା ରଙ୍କ ମତାମତ ରାଜନୈତିକ ମହଲରେ ନୂଆ ଆଲୋଚନା ସୃଷ୍ଟି କରିଛି।
ଶିବସେନାର ଦୁଇ ଗୋଷ୍ଠୀ ପୁଣି ଏକାଠି ହେବା ନେଇ ଚର୍ଚ୍ଚା ମଧ୍ୟରେ ମନ୍ତ୍ରୀ ଅବଦୁଲ ସତାରଙ୍କ ବୟାନ ରାଜନୈତିକ ମହଳରେ ହଲଚଲ ସୃଷ୍ଟି କରିଛି। ରାଜ ଠାକରେ ଓ ଉଦ୍ଧବ ଠାକରେଙ୍କ ଉଦାହରଣ ଦେଇ ସେ କହିଛନ୍ତି ଯେ ରାଜନୀତିରେ କିଛି ବି ଅସମ୍ଭବ ନୁହେଁ, ଯଦିଓ ଏହି ପ୍ରସଙ୍ଗରେ ଚୂଡ଼ାନ୍ତ ନିଷ୍ପତ୍ତି ନେତୃତ୍ୱଙ୍କ ହାତରେ ରହିଛି।
ସତାର ଆହୁରି ମଧ୍ୟ କହିଛନ୍ତି, “ମାତୋଶ୍ରୀର ନିୟନ୍ତ୍ରଣ ଆଜି ଉଦ୍ଧବ ବାଲାସାହେବ ଠାକରେଙ୍କ ହାତରେ ଅଛି, ଏବଂ ଆମ ଦଳର ନିୟନ୍ତ୍ରଣ ଏକନାଥ ସିନ୍ଦେଙ୍କ ହାତରେ ଅଛି। ଏଭଳି ପରିସ୍ଥିତିରେ ଭବିଷ୍ୟତରେ କ’ଣ ହେବ, ତାହା କେବଳ ସେମାନେ ହିଁ ନିଷ୍ପତ୍ତି ନେଇପାରିବେ।”
ଅବଦୁଲ ସତାର ମିଶ୍ରଣ ସମ୍ଭାବନାକୁ ସମ୍ପୂର୍ଣ୍ଣ ଭାବେ ଖାରଜ କରିନଥିଲେ। ବରଂ ସେ ଇଙ୍ଗିତ କରିଥିଲେ ଯେ ରାଜନୀତିରେ ପରିସ୍ଥିତି ଯେକୌଣସି ସମୟରେ ବଦଳିପାରେ। ସେ ଉଦାହରଣ ଦେଇ କହିଥିଲେ ଯେ ଗତ କିଛି ବର୍ଷ ଧରି ଉଦ୍ଧବ ଠାକରେ ଏବଂ ରାଜ ଠାକରେଙ୍କ ମଧ୍ୟରେ ଦୂରତା ଓ ମତଭେଦ ରହିଥିଲା, କିନ୍ତୁ ସମୟ ସହିତ ସେହି ସମ୍ପର୍କରେ ମଧ୍ୟ ସକାରାତ୍ମକ ପରିବର୍ତ୍ତନ ଦେଖାଯାଇଛି।
ସେ କହିଥିଲେ, “କିଏ ଭାବିଥିଲା ଯେ ରାଜ ଠାକରେ ଏବଂ ଉଦ୍ଧବ ଠାକରେ ଏକ ମଞ୍ଚରେ ଆସିପାରିବେ? ସେମାନଙ୍କ ମଧ୍ୟରେ ବହୁତ ମତଭେଦ ଥିଲା। ତେଣୁ ଆଜି କୌଣସି ନିଷ୍କର୍ଷକୁ ପହଞ୍ଚିବା ଠିକ୍ ହେବ ନାହିଁ। ଭବିଷ୍ୟତରେ କ’ଣ ହେବ, ତାହା କେବଳ ନେତାମାନେ ହିଁ ଜାଣନ୍ତି।”
ତେବେ ସତାର କହିଛନ୍ତି ଯେ କିଛି ଶକ୍ତିଶାଳୀ ରାଜନୈତିକ ଶକ୍ତି ଦୁଇ ଗୋଷ୍ଠୀକୁ ଏକାଠି ହେବାକୁ ମଧ୍ୟ ଦେବେ ନାହିଁ। ଯଦିଓ ସେ କାହାର ନାମ ଉଲ୍ଲେଖ କରିନଥିଲେ, ତାଙ୍କ ଏହି ବୟାନ ରାଜନୈତିକ ମହଲରେ ହଟଚମଟ ସୃଷ୍ଟି କରିଛି ।
ଅନ୍ୟପଟେ, ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଦୁଇ ଶିବସେନା ଗୋଷ୍ଠୀର ମିଶ୍ରଣ ସମ୍ପର୍କିତ ସମସ୍ତ ଜଳ୍ପନାକୁ ସ୍ପଷ୍ଟ ଭାବରେ ଖାରଜ କରିଛନ୍ତି । ସେ କହିଛନ୍ତି ଯେ ତାଙ୍କ ନେତୃତ୍ୱାଧୀନ ଶିବସେନା ହିଁ ସ୍ୱର୍ଗତ ବାଲାସାହେବ ଠାକରେଙ୍କ ପ୍ରକୃତ ବିଚାରଧାରାକୁ ଆଗକୁ ନେଉଛି।
ସିନ୍ଦେ ଦାବି କରିଛନ୍ତି ଯେ ତାଙ୍କ ଦଳ ଲୋକଙ୍କ ଜନାଦେଶ ପାଇଛି ଏବଂ ହିନ୍ଦୁତ୍ୱ, ବିକାଶ ଓ ତୃଣମୂଳ ରାଜନୀତିର ଐତିହ୍ୟକୁ ଆଗକୁ ବଢ଼ାଉଛି। ତେଣୁ ମିଶ୍ରଣ ନେଇ ଚାଲିଥିବା ଚର୍ଚ୍ଚାର କୌଣସି ଆଧାର ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ଏହା ପୂର୍ବରୁ ଶିବସେନାର ବିଧାନ ପରିଷଦ ସଦସ୍ୟ ଅମ୍ବାଦାସ ଦାନଭେ ମଧ୍ୟ ଦୁଇ ଶିବସେନା ଗୋଷ୍ଠୀ ଏକାଠି ହେବା ଉଚିତ ବୋଲି ନିଜ ବ୍ୟକ୍ତିଗତ ମତ ପ୍ରକାଶ କରିଥିଲେ। ସେ କହିଥିଲେ ଯେ ସେ ପ୍ରାୟତଃ ଭାବନ୍ତି ଯେ ଦୁଇ ଗୋଷ୍ଠୀର ଏକତା ଶିବସେନାର ମୂଳ ଶକ୍ତିକୁ ପୁଣିଥରେ ମଜବୁତ କରିପାରିବ। ଯଦିଓ ସେ ଏହା ମଧ୍ୟ ସ୍ୱୀକାର କରିଥିଲେ ଯେ ଏହା କେବଳ ତାଙ୍କ ବ୍ୟକ୍ତିଗତ ମତ ଏବଂ ଚୂଡ଼ାନ୍ତ ନିଷ୍ପତ୍ତି ଦଳର ଶୀର୍ଷ ନେତୃତ୍ୱ ହିଁ ନେବେ।
ଏଭଳି ପରିସ୍ଥିତିରେ ଅବଦୁଲ ସତାର ଓ ଅମ୍ବାଦାସ ଦାନଭେଙ୍କ ବୟାନ ମହାରାଷ୍ଟ୍ରର ରାଜନୀତିରେ ନୂଆ ଚର୍ଚ୍ଚାର ସୃଷ୍ଟି କରିଥିବାବେଳେ, ଏକନାଥ ସିନ୍ଦେଙ୍କ ସ୍ପଷ୍ଟ ଅସ୍ୱୀକାର ଏହି ସମ୍ଭାବନାକୁ ଫିଲହାଲ ଅନିଶ୍ଚିତତାରେ ରଖିଛି। ଆଗାମୀ ଦିନରେ ଦୁଇ ଗୋଷ୍ଠୀର ନେତୃତ୍ୱ କେଉଁ ଦିଗକୁ ଗତି କରିବ, ତାହା ଉପରେ ମହାରାଷ୍ଟ୍ରର ରାଜନୀତି ନିର୍ଭର କରିବ ।