ଭୁବନେଶ୍ବର: ରଥଯାତ୍ରା ଆସିଲେ ତାଙ୍କ ମନ ହୁଏ କିଛି କରିବାକୁ। ଫଳରେ ଦୀର୍ଘ ଛଅ ବର୍ଷ ଧରି ରଥଯାତ୍ରା ବିେଳକୁ କିଛି ନା କିଛି ନୂଆ କଥା କରି ଚର୍ଚ୍ଚାକୁ ଆସିଥାନ୍ତି। ସେ ହେଉଛନ୍ତି ପିପିଲିର ଯୁବ ଶିଳ୍ପୀ ଅକ୍ଷୟ ମହାପାତ୍ର। ଚଳିତ ବର୍ଷ ସେ ସାର୍ଟ ବୋତାମରେ ତିନି ରଥ ନିର୍ମାଣ କରିଛନ୍ତି। ଯାହା ବେଶ ଆକର୍ଷଣୀୟ ହୋଇପାରିଛି। ରଙ୍ଗବେରଙ୍ଗର ବୋତାମ ସହିତ ତିନି ରଥରେ ତିନି ଠାକୁରଙ୍କୁ ସେ ବିରାଜମାନ କରାଇଛନ୍ତି। ଯାହା ସମସ୍ତଙ୍କ ପାଇଁ ବେଶ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି।
ଏହି ତିନି ରଥ ନିର୍ମାଣ କରିବାକୁ ଅକ୍ଷୟଙ୍କୁ ପ୍ରାୟ ଦେଢମାସ ସମୟ ଲାଗିଥିଲା। ସେ ଏହି ରଥରେ 5720 ଟି ବୋତାମ ବ୍ୟବହାର କରିଛନ୍ତି। ଏହି ରଥ ତିନିଟି ଦୁଇ ଫୁଟ ଉଚ୍ଚତା ବିଶିଷ୍ଠ ହୋଇଛି। ଏହି କାମରେ ତାଙ୍କର ମାଆ ମଧ୍ୟ ବେଶ ସାହାଯ୍ୟ କରିଛନ୍ତି। ପୁରୀର ରଥ ପରି ଅକ୍ଷୟ ଏଥିରେ ମଧ୍ୟ ଶୁଆ, ପୋଟଳ, ନୀଳଚକ୍ର, ଚାରମାଳ ପରି ବିଭିିନ୍ନ ଉପକରଣ ସ୍ଥାପନ କରିଛନ୍ତି। ଏହି ରଥକୁ ଦୂରରୁ ଦେଖିଲେ ବୋତାମରେ ତିଆରି ହୋଇଛି ବୋଲି କେହି ବି ଭାବି ପାରିବେ ନାହିଁ।
ପିପିଲିର ଦରଜୀ ସାହିରେ ରହୁଥିବା ଅକ୍ଷୟ ଏକ ଡ୍ରେସ ଦୋକାନରେ କାମ କରନ୍ତି। ବାପା ତାଙ୍କର ଜଣେ ଚାନ୍ଦୁଆ ଶିଳ୍ପୀ। ଅକ୍ଷୟ ରାତିରେ ଦୋକାନରୁ ଆସିବା ପରେ ଏହି ରଥ ନିର୍ମାଣ କାର୍ଯ୍ୟରେ ଲାଗିଯାଆନ୍ତି। ପ୍ରତିବର୍ଷ ରଥ ଯାତ୍ରା ଆସିଲେ ସେ କିଛି ନା କିଛି ନୂଆ ନୂଆ କଥା କରିବାକୁ ଇଚ୍ଛା ପ୍ରକାଶ କରନ୍ତି। ଫଳରେ ସେ ଦୀର୍ଘ ଛଅ ବର୍ଷ ଧରି ସେ ରଥଯାତ୍ରା ବେଳକୁ କିଛି ନା କିଛି ନୂଆ ନିର୍ମାଣ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥାଆନ୍ତି। କେତେବେଳେ ସୋଲ, କେତେବେଳ ଆଇସକ୍ରିମ କାଠି, କେତେବେଳେ ଡିଆସିଲି କାଠିରେ ସେ ରଥ ନିର୍ମାଣ କରିଛନ୍ତି। ଗତବର୍ଷ ସେ ଅରୁଆ ଚାଉଳରେ ରଥ ନିର୍ମାଣ କରି ଚର୍ଚ୍ଚାରେ ଥିଲେ।