ସମୀକ୍ଷା ବ୍ୟୁରୋ
ଗତକାଲି ରାତିରେ ହୃଦ୍ଘାତରେ ଶେଷନିଃଶ୍ବାସ ତ୍ୟାଗ କରିଛନ୍ତି ବର୍ଷୀୟାନ୍ ସାମ୍ବାଦିକ ଦିଲ୍ଲୀପ ଶତପଥୀ । ତାଙ୍କ ପରଲୋକରେ ଓଡ଼ିଶା ସାମ୍ବାଦିକତା ଜଗତରେ ବଡ଼ ଶୂନ୍ୟସ୍ଥାନ ସୃଷ୍ଟି ହୋଇଛି । ତାଙ୍କର ହସ ହସ ମୁହଁକୁ ଦେଖିଲେ ସେ ଯେ ହୃଦ୍ଘାତ ଓ କ୍ୟାନସର ପରି ରୋଗରେ ପୀଡ଼ିତ ଥିଲେ, ଏହା ଅବିଶ୍ବାସ ଲାଗେ ।
ଅମାୟିକ ବ୍ୟକ୍ତିତ୍ବ ଅଧିକାରୀ ଦିଲ୍ଲୀପ ସାମ୍ବାଦିକତାରେ ଯେତିକି ଲୋକପ୍ରିୟ, ନିଜ ବ୍ୟକ୍ତିତ୍ବ ନେଇ ମଧ୍ୟ ସେତିକି ଜଣାଶୁଣା । ଦିଲ୍ଲୀପ ଜଣେ ସାମ୍ବାଦିକ ହେଲେ ମଧ୍ୟ ବିଭିନ୍ନ ମାମଲାକୁ ନେଇ ତାଙ୍କୁ ଟିଭି ଡିବେଟ୍ରେ ଦେଖିବାକୁ ମିଳୁଥିଲା । ତାଙ୍କ ତର୍କରେ ସବୁବେଳେ ଯୁକ୍ତିଯୁକ୍ତ ଏବଂ ନିରପେକ୍ଷ ମତ ରଖୁଥିଲେ । ସ୍ବଳ୍ପେର କହିବାକୁ ଗଲେ ଦିଲ୍ଲୀପଙ୍କୁ ଦର୍ଶକ ପସନ୍ଦ କରୁଥିଲେ । ବହୁ ଜଟିଳ ମାମଲାଗୁଡ଼ିକୁ ସେ ସହଜ ଅର୍ଥରେ ବୁଝାଇ ପାରୁଥିଲେ ।
ସେ କେବେ ଜାଣିବାକୁ ଦେଇନଥିଲେ ଯେ ଅତୀତରେ ଅର୍ଥନୀତି ଭଳି ବିଷୟ ପ୍ରିୟ ଥିଲେ ମଧ୍ୟ, ନିଜର ପକ୍ଷରେ କେବେ ବିଭିନ୍ନତା ନଥିଲା । ସେ ସମସ୍ତଙ୍କ ତର୍କକୁ ସମ୍ମାନ ଦେଉଥିଲେ ଏବଂ ଏହି ସୁନ୍ଦର ଗୁଣ ପାଇଁ ସେ ବେଳେବେଳେ ଈର୍ଷାର ପାତ୍ର ମଧ୍ୟ ହେଉଥିଲେ । ସେ ଅସୁସ୍ଥତା ଥାଇ ମଧ୍ୟ କେବେବି କାହାକୁ ଅସୁସ୍ଥ ଅଛନ୍ତି ବୋଲି ଜାଣିବାକୁ ଦେଇନାହାନ୍ତି । ଶେଷ ଜୀବନ ପର୍ଯ୍ୟନ୍ତ ସେ ବହୁତ ଆଶାବାଦୀ ରହିଥିଲେ । ନୈରାଶ୍ୟ ତାଙ୍କୁ ସ୍ପର୍ଶ ସୁଦ୍ଧା କରିପାରିନଥିଲା ।
ସେ ଏପରି ଏକ ବ୍ୟକ୍ତିତ୍ବ ଥିଲେ, ଯିଏ କେବେ ବି କାହା ବିରୋଧରେ ଚର୍ଚ୍ଚା କରିନଥିଲେ । ଏପରିକି କୌଣସି ହସକଥା କହିଲାବେଳେ ମଧ୍ୟ ଅନ୍ୟ ମନରେ ଦୁଃଖ ଦେଉନଥିଲେ, ଏହା ତାଙ୍କ ବ୍ୟକ୍ତିତ୍ବ ଏକ ବିଶେଷ ଗୁଣ ଥିଲା । କିନ୍ତୁ ତାଙ୍କ ଶରୀର ତାଙ୍କୁ ସାଥ୍ ଦେଇନଥିଲା ।
କିଛି ଦିନ ପୂର୍ବରୁ ସେ ଏକ ନିର୍ବାସିତ ଜୀବନ ଜୀଉଁଥିଲେ । କୌଣସି ତର୍କ ବିତର୍କରେ ଡେରି ରାତି ଯାଏଁ ରହୁନଥିଲେ କି କାହାର ସାହାଯ୍ୟ ନେଉନଥିଲେ ।
ସେ ସବୁବେଳେ ସଦ୍ୟ ତଥ୍ୟ ସହ ନିଜକୁ ପ୍ରସ୍ତୁତ ରଖୁଥିଲେ ଏବଂ ସେଥିପାଇଁ ଟିଭି ବିତର୍କରେ ସବୁବେଳେ ତାଙ୍କୁ ପ୍ରଥମେ ଖୋଜା ହୋଇଥା’ନ୍ତି । ସେ ସବୁବେଳେ ଜଣାଶୁଣା ପ୍ୟାନେଲିଷ୍ଟ୍ ଭାବରେ ସବୁ ଟିଭି ବିତର୍କରେ ରହୁଥିଲେ । ତାଙ୍କର ତର୍କ ହେଉ କି ବିତର୍କ ହେଉ ସବୁବେଳେ ଅପ୍ରିୟ ସତ୍ୟ କହୁଥିଲେ ଏବଂ କେବେ କୌଣସି ବିଭ୍ରାନ୍ତିକାରୀ ତଥ୍ୟ ଦେଇ କଥାକୁ ବାଆଁରେଇବା ଦେଖାଯାଇନାହିଁ । ସେ ସବୁବେଳେ ନିଜ ଇଚ୍ଛାକୁ ପ୍ରଦର୍ଶିତ କରିଆସିଛନ୍ତି । ତାଙ୍କ ସାମ୍ନାରେ ଥିବା ଲୋକ ଯେତେ ଜ୍ଞାନୀ ହେଲେ ମଧ୍ୟ ସେ ସହଜରେ ହାରିନାହାନ୍ତି ।
କିନ୍ତୁ ଭାଗ୍ୟର ଆଗରେ ତାଙ୍କୁ ନଇଁବାକୁ ପଡ଼ିଲା । ମାତ୍ର ୫୫ ବର୍ଷ ବୟସରେ ସେ ଏହି ଦୁନିଆକୁ ଚାଲିଗଲେ । କିନ୍ତୁ ତାଙ୍କ ଅବର୍ତ୍ତମାନରେ ତାଙ୍କର ସ୍ମୃତି ଓ କୃତି ସବୁବେଳେ ତାଙ୍କୁ ସବୁବେଳେ ଚିରଜୟୀ କରିବ ।