ସମୀକ୍ଷା ବ୍ୟୁରୋ
ଭାରତର ଦଶମ ନିର୍ବାଚନ କମିଶନର ଭାବରେ ନିର୍ବାଚନ ବ୍ୟବସ୍ଥା ରେ ବ୍ୟାପକ ପରିବର୍ତ୍ତନ ଆଣିଥିବା ଟି.ଏନ.ଶେଷାନଙ୍କ ପରଲୋକ ଘଟିଛି। ୧୯୯୦ ରୁ ୧୯୯୬ ଯାଏ ଦେଶର ନିର୍ବାଚନ କମିଶନର ଦାୟିତ୍ବ ରେ ଥିବା ସମୟରେ ଶ୍ରୀ ଶେଷାନ ରାଜନେତାଙ୍କ ଲାଗି ଏକ ପ୍ରକାର ଆତଙ୍କ ପାଲଟି ଯାଇଥିଲେ। ରିଗିଙ୍ଗ ମୁକ୍ତ ନିର୍ବାଚନ ର ଯୁଗ ଶେଷାନଙ୍କ ସମୟରେ ଆରମ୍ଭ ହେଲା। ଭୋଟର ପରିଚୟ ପତ୍ର, ନିର୍ବାଚନ ଲଢ଼ୁଥିବା ପ୍ରାର୍ଥୀଙ୍କ ହିସାବ ଯାଞ୍ଚ ଲାଗି ଆର୍ଥିକ ପର୍ଯ୍ୟବେକ୍ଷକ ବ୍ୟବସ୍ଥା ଓ ପ୍ରଚାର ଉପରେ କଡ଼ା ନଜର ରଖିବା କାମ ସେ ଆରମ୍ଭ କରିଥିଲେ।
କେରଳରେ ଜନ୍ମଗ୍ରହଣ କରିଥିବା ଶେଷାନ ୧୯୫୫ ରେ ତାମିଲନାଡୁ କ୍ୟଡ଼ରର ଆଇଏଏସ ଅଧିକାରୀ ଭାବରେ ଯୋଗଦାନ କରିଥିଲେ। ରାଜୀବ ଗାନ୍ଧୀଙ୍କ ସରକାର ସମୟରେ ସେ କ୍ୟାବିନେଟ ସଚିବ ଦାୟିତ୍ୱ ତୁଲାଇ ଥିଲେ। ଅବସର ନେବା ପରେ ସେ ଅଳ୍ପ କିଛି ଦିନ ରାଜନୀତି ରେ ମଧ୍ୟ ଯୋଗଦାନ କରିଥିଲେ।