ମୁମ୍ବାଇ, 23/11 ( ଆଇଏଏନଏସ) : ମହାରାଷ୍ଟ୍ର ରାଜନୀତିର ମହାନାଟକରେ ଯବନିକା ପଡିଛି । ନିର୍ବାଚନ ଫଳାଫଳର ଏକ ମାସ ପରେ ମହାରାଷ୍ଟ୍ରକୁ ମିଳିଛି ଏହାର ମୁଖ୍ୟମନ୍ତ୍ରୀ । ବିଜେପି ମୁଖ୍ୟମନ୍ତ୍ରୀ ପ୍ରାର୍ଥୀ ଦେବେନ୍ଦ୍ର ଫଡନବିସ୍ ପରିଶେଷରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି । ଏନ୍ସିପି ସହିତ ମେଣ୍ଟ କରି ବିଜେପି ମହାରାଷ୍ଟ୍ରରେ ସରକାର ଗଠନରେ ସଫଳ ହୋଇଛି । ଫଡନବିସ୍ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିବା ବେଳେ ଏନ୍ସିପି ନେତା ଅଜିତ୍ ପଓ୍ବାର ଉପ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି । ରାଜ୍ୟପାଳ ଭଗତ ସିଂ କୋସ୍ୟାରୀଙ୍କ ଆମନ୍ତ୍ରଣରେ ରାତି ଅଧିଆ ଶପଥ ପାଠ କରିଥିଲେ ଉଭୟ ନେତା । ବର୍ତ୍ତମାନ ବିଧାନସଭାରେ ଫଡନବିସ୍ଙ୍କୁ ସଂଖ୍ୟାଗରିଷ୍ଠତା ପ୍ରମାଣ କରିବାକୁ ପଡିବ । ଏହାର ଗୋଟିଏ ଦିନ ପରେ କ୍ୟାବିନେଟ ସଂପ୍ରସାରଣ ହେବ ବୋଲି ଫଡନବିସ୍ ସୂଚନା ଦେଇଛନ୍ତି ।
ନିର୍ବାଚନ ପରଠାରୁ ମହାରାଷ୍ଟ୍ରରେ ସରକାର ଗଠନ ନେଇ ଚାଲିଥିଲା ଅଙ୍କକଷା। ତେବେ ନିକଟରେ ଏନସିପି ମୁଖ୍ୟ ଶରଦ ପାୱାର ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିବା ନେଇ ବିଭିନ୍ନ ମହଲରେ ସନ୍ଦେହ ସୃଷ୍ଟି ହୋଇଥିଲା। ବିଜେପି ଏନସିପି ମେଣ୍ଟ ସରକାର ହେବ କି ବୋଲି ପ୍ରଶ୍ନବାଚୀ ସୃଷ୍ଟି ହୋଇଥିଲା। ଏଥିସହିତ ଖୋଦ ପ୍ରଧାନମନ୍ତ୍ରୀ ସଂସଦରେ ଏନସିପିକୁ ପ୍ରସଂଶା କରିବା ପରେ ଏହି ସନ୍ଦେହ ଆହୁରି ଦୃଢି ଭୂତ ହୋଇଥିଲା। ବର୍ତ୍ତମାନ ଏନସିପି ଓ ବିଜେପି ମେଣ୍ଟ ସରକାର ହେବା ପରେ ଏହା ସତ ବୋଲି ପ୍ରମାଣିତ ହୋଇଛି।