ଭୁବନେଶ୍ବର, ଆଜି ଅର୍ଥମନ୍ତ୍ରୀ ନିରଂଜନ ପୂଜାରୀ ଚଳିତ 2020-21 ବର୍ଷର ରାଜ୍ୟ ବଜେଟ ଉପସ୍ଥାପନ କରିଛନ୍ତି। ଚଳିତ ବଜେଟ କେତେକ କ୍ଷେତ୍ରରେ ବିଗତ ବଜେଟଠାରୁ ଟିକିଏ ଅଲଗା ରହିଛି। ପ୍ରଥମତଃ ଏଥର ବଜେଟ ସଂପୂର୍ଣ୍ଣ ହାଇଟେକ୍ ହୋଇଛି। ପରଂପରା ଅନୁସାରେ ବଜେଟ ବହି ନ ପଢାଯାଇ ଏଥର ଆଇପ୍ୟାଡ ମାଧ୍ୟରେ ବଜେଟ ପଢାଯାଇଛି। ସେହିପରି ପୂର୍ବବର୍ଷ ପରି ଚଳିତ ବର୍ଷ ବଜେଟର ସଂପୂର୍ଣ୍ଣ ବିବରଣୀ ପେନଡ୍ରାଇଭ ମାଧ୍ୟମରେ ଗୃହର ସଦସ୍ୟ ଓ ସଦସ୍ୟାଙ୍କୁ ପ୍ରଦାନ କରାଯାଇଛି।
ତେବେ ବିଗତ ବର୍ଷ ପରି ଏଥର ମଧ୍ୟ ଅର୍ଥମନ୍ତ୍ରୀ ନିରଂଜନ ପୂଜାରୀ କୃଷି ବଜେଟ ଆରମ୍ଭରେ ଏକ କବିତା ଏବଂ ଶେଷରେ ଏକ କବିତା ବୋଲିଛନ୍ତି। ବଜେଟ ଆରମ୍ଭରେ ପ୍ରଖ୍ୟାତ ନାରୀକବି କୁନ୍ତଳା କୁମାରୀ ସାବତଙ୍କ ଏକ କବିତାକୁ ପଢିଥିଲେ। ତାହା ଥିଲା
ନବ ଆଲୋକେ,ନବ ପୁଲକେ
ନିଖିଳ ଅବନୀ ହସିବ
ଫୁଟିବ ପ୍ରସୂନ ବନେ ଉପବନେ
ନବଗାନେ ପିକ ରସିବ
ସେହିପରି କୃଷି ବଜେଟ ସରିବା ପରେ ମଧ୍ୟ ଅର୍ଥମନ୍ତ୍ରୀ ନିରଂଜନ ପୂଜାରୀ ଆଉ ଏକ କବିତା ପାଠ କରିଥିଲେ। ତାହାଥିଲା ସ୍ବଭାବ କବି ଗଂଗାଧର ମେହେରଙ୍କ ଏକ କବିତା ଥିଲା। ତାହା ହେଲା
“ଛାଡିଦେଲେ କୃଷିକି ସବୁ ହେବ ନାଶ,
ନ ମିଳିବ ର୍ଗାସ ଯେ ନ ମିଳିବ ବାସ
କୃଷି ତୋର ବେଦ ରେ କୃଷି ତୋ ପୁରାଣ.
କୃଷି ବିନା ନ ରହି ପାରଇ ପରାଣ”
ଏହାପରେ ସାଧାରଣ ବଜେଟ ପଢା ଶେଷରେ ଅର୍ଥମନ୍ତ୍ରୀ ଆଉ ଏକ କବିତା ପଢି ବଜେଟ ଭାଷଣ ଶେଷ କରିଥିଲେ। ତାହାଥିଲା ଜାତୀୟକବି ବୀର କିଶୋର ଦାସଙ୍କ ଏକ କବିତା। ତାହା ହେଲା..
“ଜୀବସେବା ଭାଇ,
ଅହିଂସା ନୀତିର ଅସଲ ଭିତ୍ତି,
ଜୀବସେବାରେ ଯେ ଜୀବନ ସଂପିଛି
ସବୁଠାରେ ପାରେ ସଭିଙ୍କି ଜିତି”