ବିଧାନସଭାରୁ ପ୍ରଭୁକଲ୍ୟାଣ ମହାପାତ୍ର
ରାଜ୍ୟର ଢାବାଗୁଡ଼ିକ କଞ୍ଚା କୋଇଲା ବ୍ୟବହାର ନ କରିବା ଲାଗି ଜାରି ସରକାରୀ ନିର୍ଦ୍ଦେଶକୁ କଡାକଡି କାର୍ଯ୍ୟକାରୀ କରିବା ନିମନ୍ତେ ବାଚସ୍ପତି ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।
ଆଜି ବିଧାନସଭାରେ ଶୂନ୍ୟକାଳରେ ଏ ପ୍ରସଙ୍ଗ ଉଠିଥିଲା। ଶାସକ ଦଳ ବିଧାୟକ ନୃସିଂହ ଚରଣ ସାହୁ ଅଭିଯୋଗ କରିଥିଲେ ଯେ, ରାଜ୍ୟର ଢାବାଗୁଡ଼ିକ ବେଆଇନ ଭାବେ କଞ୍ଚା କୋଇଲା ବ୍ୟବହାର କରୁଛନ୍ତି। ତେବେ କଞ୍ଚା କୋଇଲା ଉପଯୋଗ ନ କରିବା ପାଇଁ ରାଜ୍ୟ ଜଙ୍ଗଲ ଓ ପରିବେଶ ବିଭାଗ 2016 ମସିହାରୁ ନିର୍ଦ୍ଦେଶ ଜାରି କରିଛନ୍ତି। ପ୍ରଥମେ କୋଇଲା ଗଚ୍ଛିତ ଥିବା ସୁନ୍ଦରଗଡ, ଝାରସୁଗୁଡା, ସମ୍ବଲପୁର, ଢେଙ୍କାନାଳ, ଅନୁଗୁଳ ପ୍ରଭୃତି ଜିଲ୍ଲାର ଢାବାଗୁଡ଼ିକ କଞ୍ଚା କୋଇଲା ଜାଳେଣି ହିସାବରେ ବ୍ୟବହାର କରିପାରିବେ ନାହିଁ ବୋଲି ବିଭାଗୀୟ ନିର୍ଦ୍ଦେଶ ଜାରି ହୋଇଥିଲା। ପରବର୍ତ୍ତୀ କାଳରେ ତାହା ସମଗ୍ର ରାଜ୍ୟ ପାଇଁ ଲାଗୁ ହୋଇଥିଲା। ତେବେ ରାଜ୍ୟର ଢାବାଗୁଡ଼ିକ ଅବିଚାରିତ ଭାବେ କଞ୍ଚା କୋଇଲା ଉପଯୋଗ କରୁଥିଲେ ସୁଦ୍ଧା ବିଭାଗୀୟ କର୍ମକର୍ତ୍ତା ସେଥିପ୍ରତି ଆଖିବୁଜି ଦେଇଛନ୍ତି। ଅନ୍ୟ ପକ୍ଷରେ କଞ୍ଚା କୋଇଲା ଜାଳିବା ଯୋଗୁଁ ପ୍ରଚୁର ପରିମାଣରେ ଧୂଆଁ ନିର୍ଗତ ହୋଇ ପରିବେଶ ପ୍ରଦୂଷିତ ହେଉଛି ଏବଂ ରାସ୍ତା ଦୁର୍ଘଟଣା ମଧ୍ୟ ବୃଦ୍ଧି ପାଇଛି।
ଫଳରେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ଟିପ୍ପଣୀ ଦେଇଥିଲେ ଯେ, ବିଭାଗୀୟ ନିର୍ଦ୍ଦେଶ ପାଳନ କରିବାକୁ ଜଙ୍ଗଲ ମନ୍ତ୍ରୀ ଅଫିସରମାନଙ୍କୁ ଆଦେଶ ଦିଅନ୍ତୁ। ବାଚସ୍ପତିଙ୍କ ଏହି ମନ୍ତବ୍ୟ ପରେ ସେଥିନେଇ ସଭ୍ୟମାନଙ୍କ ଉଦ୍ବେଗ ପ୍ରଶମିତ ହୋଇଥିଲା।
