କେଦାର ମିଶ୍ର
ଆଗରୁ ସବୁ କଥାରେ ଓଡିଶାର ଗରିବୀକୁ ନେଇ ଚର୍ଚ୍ଚା କରୁଥିବା ଆମର ଜାତୀୟ ଗଣମାଧ୍ୟମ ପ୍ରାକୃତିକ ବିପର୍ୟୟ ତଥା କରୋନା ଭଳି ବିଶ୍ଵର ଏକ ଭୟଙ୍କର ସଙ୍କଟକୁ ମୁକାବିଲା କରିବାରେ ଓଡିଶାର ଦକ୍ଷତାକୁ ଦେଖିବା ଉଚିତ। କରୋନା ମୁକାବିଲା ଲାଗି ଯେତେବେଳେ ଭାରତ ସରକାର ଚିନ୍ତା କରିବା ଆରମ୍ଭ କରିନଥିଲେ, ସେତେବେଳେ ଏହାକୁ ଗୁରୁତ୍ଵର ସହିତ ନେବା ଆରମ୍ଭ କରି ବିଦେଶରୁ ଫେରୁଥିବା ପ୍ରତ୍ୟେକ ଯାତ୍ରୀଙ୍କୁ ସ୍କ୍ରିନିଙ୍ଗ କରିବା ଆରମ୍ଭ କରିଥିଲେ। ସେମାନଙ୍କର ରହଣି ତଥା ଗତାଗତ ଉପରେ ଓଡିଶା ସରକାର ତୀବ୍ର ନଜର ରଖିବା ଆରମ୍ଭ କରିଥିଲେ। ୧୪ ଦିନିଆ କ୍ଵାରେଣ୍ଟାଇନ ବ୍ୟବସ୍ଥାକୁ ବାଧ୍ୟତାମୂଳକ କରିବା ସହିତ ଏହା ଉପରେ କଡା ନଜର ରଖା ଯାଇଥିଲା । ପ୍ରତିଦିନ କରୋନା ଭୂତାଣୁ ସମ୍ପର୍କରେ ଲୋକଙ୍କୁ ସୂଚନା ଦେବା ଓ ଗଣମାଧ୍ୟମରେ ସବୁ ତଥ୍ୟକୁ ତୁରନ୍ତ ପହଞ୍ଚାଇବାର ସବୁ ବ୍ୟବସ୍ଥା କରା ଯାଇଥିଲା। ଦେଶରେ କରୋନା ସଂକ୍ରମଣ ବଢି ଚାଲିଥିବା ବେଳେ ପ୍ରଥମେ ଓଡିଶା ସାମାଜିକ ଦୂରତା ତଥା ଲକ ଡାଉନ ବ୍ୟବସ୍ଥା ଗ୍ରହଣ କରିଥିଲା।
ତେବେ ଓଡିଶାରେ ଏହି ବ୍ୟବସ୍ଥା ଆରମ୍ଭ ହେବା ବେଳକୁ କେରଳ, ମହାରାଷ୍ଟ୍ର, ରାଜସ୍ଥାନ, ପଞ୍ଜାବ ଓ ଦିଲ୍ଲୀର ରାଜ୍ୟ ସରକାରମାନେ ମଧ୍ୟ ଏ ପ୍ରକାର ପଦକ୍ଷେପ ନେବା ଆରମ୍ଭ କରିଥିଲେ। ଦିଲ୍ଲୀ, କେରଳ, ପଞ୍ଜାବ ଓ ମହାରାଷ୍ଟ୍ରରେ ଏବେ କରୋନା ସଂକ୍ରମଣ ର ବ୍ୟାପକତାକୁ ସାମ୍ନା କରୁଛନ୍ତି। ତେବେ ଆଜି ସୁଦ୍ଧା ଓଡିଶାରେ କରୋନା ସଂକ୍ରମଣ ମାତ୍ର ତିନୋଟି ପୋଜିଟିଭ କେସ ରେ ସୀମିତ ରହିଛି। କରୋନାର ବିଶ୍ଵବ୍ୟାପୀ ସଂକ୍ରମଣର ସ୍ଥିତି କୁ ଦେଖି କେତେବେଳେ ଯେ କଣ ଘଟିବ ତାହା କହିହେବା ନାହିଁ। ତେବେ ଏଥି ପାଇଁ ନିଜକୁ ସରକାର ପ୍ରସ୍ତୁତ କରି ସାରିଛନ୍ତି। ଦେଶର ଅନ୍ୟାନ୍ୟ ଆଗୁଆ ରାଜ୍ୟ ତୁଳନାରେ ଓଡିଶା ଏବେ ଏକ ବଡ ଉଦାହରଣ ପ୍ରସ୍ତୁତ କରିଛି। କରୋନା ସଂକ୍ରମିତ ରୋଗୀଙ୍କ ସ୍ବତନ୍ତ୍ର ଚିକିତ୍ସା ଲାଗି ସମ ହସପିଟାଲ- ମେଡିକାଲ କଲେଜ ଓ କିମ୍ସ ହସପିଟାଲ-ମେଡିକାଲ କଲେଜର ସହାୟତାରେ ୧୦୦୦ ଶଯ୍ୟା ବିଶିଷ୍ଟ ଡାକ୍ତରଖାନାର ପ୍ରସ୍ତୁତି ପର୍ବ ଆରମ୍ଭ ହୋଇଛି।ଏହି ଡାକ୍ତରଖାନା ଆସନ୍ତା ୧୫ଦିନ ଭିତରେ କାର୍ଯକ୍ଷମ ହେବ ବୋଲି ଜଣା ଯାଇଛି। ଇତି ମଧ୍ୟରେ କଟକ ବଡ ଡାକ୍ତରଖାନାରେ ମଧ୍ୟ ୭୦୦ ରୁ ୧୦୦୦ ଶଯ୍ୟା ପ୍ରସ୍ତୁତ କରାଯାଉଛି।
ବର୍ତ୍ତମାନ କରୋନା ସଂକ୍ରମଣକୁ ସୀମିତ ରଖିବା ରାଜ୍ୟ ତଥା ଦେଶର ପ୍ରାଥମିକ ଆବଶ୍ୟକତା ରହିଛି। ତେବେ ଆଗାମୀ ଦିନରେ କରୋନା ରୋଗୀଙ୍କ ସଂକ୍ରମଣ ବଢିବାର ସମ୍ଭାବନାକୁ ଆଖିରେ ରଖି ଏ ପ୍ରକାର ପ୍ରସ୍ତୁତି ନିତାନ୍ତ ଆବଶ୍ୟକ। ସ୍ଵତନ୍ତ୍ର ଡାକ୍ତରଖାନା ସହିତ ଜିଲା ଡାକ୍ତରଖାନାଗୁଡିକରେ ମଧ୍ୟ ଏଥିପାଇଁ ପ୍ରସ୍ତୁତି ଜୋରଦାର କରାଯାଇଛି। ତେବେ କରୋନା ପରୀକ୍ଷଣ ଲାଗି ଓଡିଶା ଏକମାତ୍ର କେନ୍ଦ୍ରୀୟ ଲାବୋରେଟରୀ ଉପରେ ନିର୍ଭର କରୁଛି। ଏହାକୁ ଅଧିକ ବ୍ୟାପକ କରିବା ଜରୁରୀ।
କରୋନା ଭଳି ଏକ ବ୍ୟାପକ ସଙ୍କଟକୁ ମୁକାବିଲା କରିବାରେ ଓଡିଶା ଯେଉଁ ମଡେଲ ତିଆରି କରିଛି, ତାକୁ ପରବର୍ତ୍ତୀ ସମୟରେ କେନ୍ଦ୍ର ସରକାର କିଛିଟା ଅନୁସରଣ କରିଛନ୍ତି। ଓଡିଶା ପୋଲିସ ରାଜ୍ୟରେ ଲକ ଡାଉନକୁ ଲାଗୁ କରିବାରେ ସଫଳ ଭୂମିକା ନିର୍ବାହ କରୁଛି। ଗୋଟେ ଦୁଇଟି ଅପ୍ରିୟ ଘଟଣାକୁ ବାଦ ଦେଲେ ପୋଲିସ କର୍ତ୍ତୃପକ୍ଷ ସଂଯମ ରଖି ଲୋକଙ୍କୁ ନିୟନ୍ତ୍ରିତ କରୁଛନ୍ତି। ତେବେ ଲୋକଙ୍କୁ ମାଡ ଦେଇ, ଦଣ୍ଡିତ କରି ବା ଅପମାନିତ କରି ଲକ ଡାଉନର ଉପଯୋଗିତା ବୁଝାଇ ହେବନାହିଁ। ଏଥିଲାଗି ପୋଲିସକୁ ଅଧିକ ସଂବେଦନଶୀଳ ଓ ସଂଯତ ହେବାକୁ ପଡିବ।
ଆଉ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇ ଓଡିଶା ମୁଖ୍ୟମନ୍ତ୍ରୀ ଅନ୍ୟ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ଚିଠି ଲେଖି ସେହି ସବୁ ରାଜ୍ୟରେ ରହିଥିବା ଓଡିଆ ଲୋକମାନଙ୍କର ଦାୟିତ୍ଵ ନେବାକୁ ଅନୁରୋଧ କରିଛନ୍ତି। ଏଥିପାଇଁ ସମ୍ପୃକ୍ତ ରାଜ୍ୟ ଗୁଡିକ ଯାହା ଖର୍ଚ୍ଚ କରିବେ, ଓଡିଶା ସରକାର ତାକୁ ଭରଣା କରିବେ ବୋଲି ନବୀନ ବାବୁ କହିଛନ୍ତି। ଏହା ନିଶ୍ଚିତ ଭାବରେ ଏକ ସଂବେଦନଶୀଳ ନିଷ୍ପତ୍ତି।ପ୍ରବାସୀ ଓଡିଆଙ୍କୁ ସାହାଯ୍ୟ କରିବା ଲାଗି ଓଡିଶା ସରକାର ସ୍ଵତନ୍ତ୍ର ହେଲ୍ପ ଲାଇନ ନମ୍ବର ମଧ୍ୟ ଜାରି କରିଛନ୍ତି। (0674-2392115 ଓ 9438915986)
ରାଜ୍ୟ ଓ କେନ୍ଦ୍ର ସରକାରଙ୍କ ଭିତରେ ସମନ୍ବୟର ସ୍ଥିତି ଅବଶ୍ୟ ରହିଛି। ହେଲେ କେନ୍ଦ୍ର ସରକାରଙ୍କ କାମ କରିବାର ଢଙ୍ଗରେ ଅତ୍ୟଧିକ ଅହମିକା ଦେଖିବାକୁ ମିଳୁଛି। ରାଜ୍ୟ ସରକାର ଗୁଡିକ ମଇ-ଜୁନ ମାସ ପର୍ୟନ୍ତ ନିଜକୁ ପ୍ରସ୍ତୁତ କରୁଥିବା ବେଳେ ପ୍ରଧାନମନ୍ତ୍ରୀ ୨୧ ଦିନ ଭିତରେ ଏହି ଯୁଦ୍ଧ ଜିଣି ହୋଇଯିବ ବୋଲି କହୁଛନ୍ତି। ଏହା ମାତ୍ର ୨୧ ଦିନରେ ସମାପ୍ତ ହେବନାହିଁ, ଏକଥା ପ୍ରଧାନମନ୍ତ୍ରୀ ଭଲ ଭାବରେ ଜାଣିଛନ୍ତି। ସାରା ଦେଶରେ ଦିନକୁ ଅତି କମରେ ଲକ୍ଷେ ଲୋକଙ୍କର କରୋନା ପରୀକ୍ଷା ହୋଇପାରିବା ଭଳି ଭିତ୍ତିଭୂମି ତିଆରି ହେବା ଆଜି ସର୍ବ ପ୍ରଥମ ଆବଶ୍ୟକତା। ଏହା ଯେମିତି ଭାରତର ଗ୍ରାମାଞ୍ଚଳକୁ ନ ବ୍ୟାପେ, ତାହା ଦେଖିବା ଲାଗି କେନ୍ଦ୍ର ସରକାର ସ୍ଵତନ୍ତ୍ର ରଣନୀତି ପ୍ରସ୍ତୁତ କରିବା ଦରକାର। ତେବେ କରୋନା ମୁକାବିଲା କ୍ଷେତ୍ରରେ ଓଡିଶା ଭଳି ରାଜ୍ୟକୁ ଆଦର୍ଶ ଭାବରେ କେନ୍ଦ୍ର ସରକାର ଗ୍ରହଣ କରିବା ଉଚିତ ହେବ। ଓଡିଶା ସମେତ କେରଳ, ମହାରାଷ୍ଟ୍ର ଓ ଦିଲ୍ଲୀ ମଡେଲକୁ ସାରା ଦେଶରେ ଲାଗୁ କରିବାର ସାହସ କେନ୍ଦ୍ର ସରକାରଙ୍କର ରହିଛି କି ?