ନୂଆଦିଲ୍ଲୀ: ଶନିବାର ରାତିରେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଏକ ଭୟଙ୍କର ସୀମା ସଂଘର୍ଷ ହୋଇଛି, ଯାହା ଫଳରେ ଉଭୟ ଦେଶ ପାଇଁ ଭାରୀ କ୍ଷତି ହୋଇଛି। ପାକିସ୍ତାନ ୨୦୦ ରୁ ଅଧିକ ଆଫଗାନିସ୍ତାନ ତାଲିବାନ ଲଢ଼ୁଆଙ୍କୁ ହତ୍ୟା କରିଥିବା ଦାବି କରିଛି, ଯେତେବେଳେ ୨୩ ଜଣ ପାକିସ୍ତାନୀ ସୈନିକ ମଧ୍ୟ ନିହତ ହୋଇଛନ୍ତି। ଆଫଗାନିସ୍ତାନ କହିଛି ଯେ, ୫୮ ଜଣ ପାକିସ୍ତାନୀ ସୈନିକ ନିହତ ହୋଇଛନ୍ତି ଏବଂ ୨୫ ପାକିସ୍ତାନୀ ସେନା ପୋଷ୍ଟ କବଜା କରାଯାଇଛି।
ଆଫଗାନ ସରକାରଙ୍କ ମୁଖପାତ୍ର ଜାବିହୁଲ୍ଲା ମୁଜାହିଦ କହିଛନ୍ତି ଯେ, ସାଉଦି ଆରବ ଏବଂ କତର ହସ୍ତକ୍ଷେପ କରିବା ପରେ ଶନିବାର ରାତି ୧୨:୦୦ ଟାରେ ପାକିସ୍ତାନ ବିରୁଦ୍ଧରେ ଅପରେସନ ବନ୍ଦ କରାଯାଇଥିଲା। ସେ କହିଛନ୍ତି ଯେ, “ସମସ୍ତ ଆଫଗାନିସ୍ତାନ ସୀମାରେ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣରେ ଅଛି, ଏବଂ ବେଆଇନ କାର୍ଯ୍ୟକଳାପ ପ୍ରାୟତଃ ବନ୍ଦ କରାଯାଇଛି।”
୨୫ ଜଣ ପାକିସ୍ତାନୀ ପୋଷ୍ଟ କବଜା କରିଥିବା ଦାବି
ମୁଜାହିଦ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଆଫଗାନିସ୍ତାନ ସୈନ୍ୟ ୨୫ ଜଣ ପାକିସ୍ତାନୀ ସାମରିକ ପୋଷ୍ଟ କବଜା କରିଛନ୍ତି। ଏହି ସପ୍ତାହର ଆରମ୍ଭରେ, ଆଫଗାନିସ୍ତାନ ଅଧିକାରୀମାନେ ପାକିସ୍ତାନ ଉପରେ ରାଜଧାନୀ କାବୁଲ ଏବଂ ଦେଶର ପୂର୍ବ ଭାଗରେ ଥିବା ଏକ ବଜାରରେ ବୋମା ବିସ୍ଫୋରଣ କରିଥିବା ଅଭିଯୋଗ କରିଥିଲେ, ଯଦିଓ ପାକିସ୍ତାନ ଏହି ଘଟଣାକୁ ସ୍ୱୀକାର କରିନାହିଁ।
ଭାରତ ଗସ୍ତରେ ଥିବା ଆଫଗାନିସ୍ତାନ ବୈଦେଶିକ ମନ୍ତ୍ରୀ ଅମିର ଖାନ ମୁତାକି କହିଛନ୍ତି ଯେ, ଆଫଗାନିସ୍ତାନ ଏହି ଅଞ୍ଚଳରେ ଶାନ୍ତି ଚାହୁଁଛି। ସେ କହିଛନ୍ତି ଯେ, “ଆମର ଦ୍ୱାର ଆଲୋଚନା ପାଇଁ ଖୋଲା ଅଛି। ଆମେ ଆଫଗାନିସ୍ତାନରେ ଶାନ୍ତି ଆଣିଛୁ ଏବଂ ସମଗ୍ର ଅଞ୍ଚଳରେ ଶାନ୍ତି ପାଇଁ ଚେଷ୍ଟା କରୁଛୁ। ଆମେ ପରିସ୍ଥିତିର ଏକ ଶାନ୍ତିପୂର୍ଣ୍ଣ ସମାଧାନ ଚାହୁଁଛୁ, କିନ୍ତୁ ଯଦି ଶାନ୍ତି ପ୍ରୟାସ ସଫଳ ନହୁଏ, ତେବେ ଆମ ପାଖରେ ଅନ୍ୟ ବିକଳ୍ପ ଅଛି।”
୧୯ଟି ଆଫଗାନିସ୍ତାନ ପୋଷ୍ଟ କବଜା କରିଥିବା ଦାବି କଲା ପାକିସ୍ତାନ:
ପାକିସ୍ତାନ ସୁରକ୍ଷା ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପାକିସ୍ତାନ ପ୍ରତିଶୋଧ ସ୍ୱରୂପ ୧୯ ଟି ଆଫଗାନିସ୍ତାନ ସାମରିକ ପୋଷ୍ଟ ଏବଂ “ଆତଙ୍କବାଦୀ ଆଡ୍ଡା” କବଜା କରିଛି। ପାକିସ୍ତାନ ଏହି ଆକ୍ରମଣଗୁଡ଼ିକୁ “ଆଫଗାନିସ୍ତାନ ବାହିନୀ ଦ୍ୱାରା ବିନା ପ୍ରରୋଚନାରେ କାର୍ଯ୍ୟାନୁଷ୍ଠାନ” ବୋଲି ବର୍ଣ୍ଣନା କରିଛି।