ନୂଆଦିଲ୍ଲୀ: ପ୍ରତିବର୍ଷ ହ୍ୱାଇଟ୍ ହାଉସ୍ ରେ ଭାରତୀୟ ପର୍ବ ଦୀପାବଳି ପାଳନ କରାଯାଏ। ପୂର୍ବତନ ଆମେରିକା ରାଷ୍ଟ୍ରପତି ଜୋ ବାଇଡେନ୍ ୨୦୨୪ ରେ ଦୀପାବଳି ପାଳନ କରିଥିଲେ। ଏହି ବର୍ଷ ହ୍ୱାଇଟ୍ ହାଉସ୍ ରେ ଦୀପାବଳି ପାଳନ ହେବ ବୋଲି କଳ୍ପନାଜଳ୍ପନା ମଧ୍ୟରେ, BCCI ଉପାଧ୍ୟକ୍ଷ ରାଜୀବ ଶୁକ୍ଲା ମଙ୍ଗଳବାର ଦିନ କିଛି ଟ୍ୱିଟ୍ କରିଥିଲେ ଯାହା କିଛି ସମୟ ପାଇଁ ହଇଚଇ ସୃଷ୍ଟି କରିଥିଲା।
ଚଳିତ ବର୍ଷ ହ୍ୱାଇଟ୍ ହାଉସ୍ ରେ ଦୀପାବଳି ପାଳନ ନକରିବା ସମ୍ପର୍କରେ ରାଜୀବ ଶୁକ୍ଲା X ରେ ଏକ ପୋଷ୍ଟରେ ଲେଖିଥିଲେ ଯେ, “ଏହି ବର୍ଷ ହ୍ୱାଇଟ୍ ହାଉସ୍ ରେ କୌଣସି ଦୀପାବଳି କାର୍ଯ୍ୟକ୍ରମ ହୋଇନଥିଲା। ଅଧିକାଂଶ ରାଷ୍ଟ୍ରପତି ଏହା ପାଳନ କରିଆସୁଥିଲେ। ଟ୍ରମ୍ପ କ’ଣ ଭାରତ ଉପରେ ଏତେ ରାଗିଛନ୍ତି?”
ଟ୍ୱିଟ୍ ଡିଲିଟ୍ କରିଦେଲେ ରାଜୀବ ଶୁକ୍ଲା
ସୋସିଆଲ୍ ମିଡିଆରେ ଏହି ପ୍ରସଙ୍ଗ ଘୁରିବୁଲିବା ମାତ୍ରେ ଟ୍ରମ୍ପ ଓଭାଲ୍ ଅଫିସ୍ ରେ ଏକ ଛୋଟ ଦୀପାବଳି କାର୍ଯ୍ୟକ୍ରମ ଆୟୋଜନ କରିଥିଲେ। ଭାରତୀୟ-ଆମେରିକୀୟ ସମ୍ପ୍ରଦାୟର ସଦସ୍ୟମାନେ କାର୍ଯ୍ୟକ୍ରମରେ ଯୋଗ ଦେଇଥିଲେ ଏବଂ ରାଷ୍ଟ୍ରପତି ଟ୍ରମ୍ପ ସେମାନଙ୍କୁ ଦୀପାବଳିର ଶୁଭେଚ୍ଛା ଜଣାଇଥିଲେ।
ହ୍ୱାଇଟ୍ ହାଉସରେ ଦୀପାବଳି କାର୍ଯ୍ୟକ୍ରମ ପରେ ରାଜୀବ ଶୁକ୍ଳା ଟ୍ୱିଟରରେ ତାଙ୍କର ଟ୍ୱିଟ୍ ଡ଼ିଲିଟ କରି ଏକ ନୂତନ ପୋଷ୍ଟରେ କହିଥିଲେ ଯେ, “ମୁଁ ଶୁଣିଲି ଯେ ସେ ଓଭାଲ୍ ଅଫିସରେ ଦୀପାବଳି ପାଳନ କରିଛନ୍ତି। ଭଲ, ମୋର ଟ୍ୱିଟ୍ ଫେରାଇନେଉଛି।”
ଆମେରିକା ଭାରତ ସହିତ ଭଲ ସମ୍ପର୍କ ଚାହୁଁଛି
ହ୍ୱାଇଟ୍ ହାଉସରେ ଦୀପାବଳି ପାଳନ ନ ହେବା ବିଷୟରେ ପ୍ରଶ୍ନ ଉଠିବା ସତ୍ତ୍ୱେ ଏହି କାର୍ଯ୍ୟକ୍ରମ ସ୍ପଷ୍ଟ କରିଛି ଯେ, ଆମେରିକା ରାଷ୍ଟ୍ରପତି ଟ୍ରମ୍ପଙ୍କର ଭାରତ ସହିତ ସମ୍ପର୍କ ପ୍ରତି ଏକ ସକାରାତ୍ମକ ଦୃଷ୍ଟିକୋଣ ଅଛି ଏବଂ ଡୋନାଲ୍ଡ ଟ୍ରମ୍ପ ଭାରତ ସହିତ ଭଲ ସମ୍ପର୍କ ବଜାୟ ରଖିବାକୁ ଚାହାଁନ୍ତି।
ଭାରତ ଏବଂ ଆମେରିକା ମଧ୍ୟରେ ଦ୍ୱିପାକ୍ଷିକ ସମ୍ପର୍କ ସର୍ବଦା ଗୁରୁତ୍ୱପୂର୍ଣ୍ଣ ରହିଛି, କିନ୍ତୁ କିଛି ସମୟ ଧରି ବାଣିଜ୍ୟ ନୀତି ଯୋଗୁଁ ଦୁଇ ଦେଶ ମଧ୍ୟରେ ଉତ୍ତେଜନା ଦେଖାଯାଇଛି। ଏହି ଉତ୍ତେଜନାର ମୁଖ୍ୟ କାରଣ ହେଉଛି ଟିକସ ଶୁଳ୍କ ଏବଂ ବାଣିଜ୍ୟ ବିବାଦ।