ଲସ ଏଞ୍ଜେଲସ: ଆମେରିକାର ଲସ ଏଞ୍ଜେଲସ ସହରରେ ଗୋଟିଏ ସନ୍ଧ୍ୟାରେ ଦୁଇଟି ପୃଥକ ଭୟଙ୍କର ଦୁର୍ଘଟଣା ଘଟିଯାଇଛି। ପ୍ରଥମେ ଏକ ବସ ଓ ଯାତ୍ରୀବାହୀ ଗାଡ଼ି ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ, ଏହି ଦୁର୍ଘଟଣାର ଖବର ସଂଗ୍ରହ କରୁଥିବା ଏକ ଟେଲିଭିଜନ ନ୍ୟୁଜ ଚ୍ୟାନେଲର ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇ ଖସିପଡ଼ିବାରୁ ଅନ୍ୟ ତିନି ଜଣ ପ୍ରାଣ ହରାଇଛନ୍ତି। ଫଳରେ ମୋଟ ୫ ଜଣଙ୍କର ଜୀବନ ଯାଇଥିବା ବେଳେ ଅନେକ ଲୋକ ଗୁରୁତର ଆହତ ହୋଇ ଚିକିତ୍ସାଧୀନ ଅଛନ୍ତି।
ସୂଚନା ଅନୁସାରେ, ଲସ ଏଞ୍ଜେଲସର ଚାଟସୱର୍ଥ ଅଞ୍ଚଳରେ ଏକ ଯାତ୍ରୀବାହୀ କାର ଓ ଏମଟିଏ ବସ ମଧ୍ୟରେ ଭୟଙ୍କର ଦୁର୍ଘଟଣା ଘଟିଥିଲା। ବସର ଚାଳକ ପାର୍ଶ୍ୱରେ କାରଟି ପିଟି ହୋଇଯିବାରୁ ଘଟଣାସ୍ଥଳରେ ଦୁଇ ଜଣଙ୍କର ମୃତ୍ୟୁ ଘଟିଥିଲା ଏବଂ ୬ ଜଣ ଗୁରୁତର ଆହତ ହୋଇଥିଲେ। ଅଗ୍ନିଶମ ବିଭାଗ ତୁରନ୍ତ ପହଞ୍ଚି ଆହତମାନଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଥିଲା।
ଏହି ବସ ଦୁର୍ଘଟଣାର ଆକାଶମାର୍ଗରୁ ଦୃଶ୍ୟ ସଂଗ୍ରହ ଓ ଖବର ପରିବେଷଣ କରୁଥିବା ଏନବିସି-୪ ଏବଂ ଟେଲିମୁଣ୍ଡୋ-୫୨ ନ୍ୟୁଜ ଚ୍ୟାନେଲର ଏକ ହେଲିକପ୍ଟର ସନ୍ଧ୍ୟା ପ୍ରାୟ ୭ଟା ପୂର୍ବରୁ ହଠାତ ଦୁର୍ଘଟଣାଗ୍ରସ୍ତ ହୋଇ ୯୧୫୧ ନର୍ଥ ମେସନ ଆଭେନ୍ୟୁସ୍ଥିତ ଦୁଇଟି ବ୍ୟବସାୟିକ କୋଠା ମଝିରେ ଖସିପଡ଼ିଥିଲା। ହେଲିକପ୍ଟରଟି ଖସିପଡ଼ିବା କ୍ଷଣି ସେଥିରେ ନିଆଁ ଲାଗିଯାଇଥିଲା, ଯାହା ଫଳରେ ନିକଟରେ ଥିବା ୪ଟି ଚାରିଚକିଆ ଗାଡ଼ି ଏବଂ ୨ଟି ଷ୍ଟୋରେଜ କଣ୍ଟେନର ପୋଡ଼ି ନଷ୍ଟ ହୋଇଯାଇଥିଲା। ଅଗ୍ନିଶମ ବାହିନୀ ସାଢ଼େ ୭ଟା ସୁଦ୍ଧା ନିଆଁକୁ ଆୟତ୍ତ କରିଥିଲେ ହେଁ, ଘଟଣାସ୍ଥଳରେ ୩ ଜଣଙ୍କର ମୃତ୍ୟୁ ଘଟିଥିଲା ଏବଂ ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିଲା। ମୃତକମାନେ ହେଲିକପ୍ଟର ଭିତରେ ଥିଲେ ନା ତଳେ ଗାଡ଼ିରେ ଥିଲେ, ସେ ନେଇ ପୁଲିସ ତଦନ୍ତ ଜାରି ରଖିଛି।
ଏହି ଦୁଃଖଦ ଘଟଣାରେ ଲସ ଏଞ୍ଜେଲସର ମେୟର କାରେନ ବାସ ଗଭୀର ଶୋକ ପ୍ରକାଶ କରିଛନ୍ତି। ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇବା ସହ ସାଧାରଣ ଜନତାଙ୍କୁ ଉଦ୍ଧାର କାର୍ଯ୍ୟ ଚାଲିଥିବା ଅଞ୍ଚଳରୁ ଦୂରେଇ ରହିବାକୁ ସେ ଅନୁରୋଧ କରିଛନ୍ତି। ସେହିପରି ଏନବିସି ନ୍ୟୁଜ ସଂସ୍ଥା ଏବଂ ମେଟ୍ରୋ ବସ କର୍ତ୍ତୃପକ୍ଷ ମଧ୍ୟ ମୃତକଙ୍କ ପରିବାର ପ୍ରତି ସମବେଦନା ପ୍ରକାଶ କରିଛନ୍ତି। ନ୍ୟାସନାଲ ଟ୍ରାନ୍ସପୋର୍ଟେସନ ସେଫଟି ବୋର୍ଡର ତଦନ୍ତକାରୀ ଦଳ ଘଟଣାସ୍ଥଳରେ ପହଞ୍ଚି ହେଲିକପ୍ଟର କ୍ରାସର ମୂଳ କାରଣ ସମ୍ପର୍କରେ ତଦନ୍ତ ଆରମ୍ଭ କରିଛନ୍ତି।