ନୂଆଦିଲ୍ଲୀ: ଋଷ ଏବଂ ଇରାନ ବିରୋଧରେ ଏକ କଠୋର ପ୍ରତିବନ୍ଧକ ଆଇନ ‘ଲିଣ୍ଡସେ ଓ. ଗ୍ରାହାମ ସାଙ୍କସନିଙ୍ଗ ଋଷ ଆଣ୍ଡ ଇରାନ ଆକ୍ଟ ଅଫ୍ ୨୦୨୬’ରେ ସ୍ୱାକ୍ଷର କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଏହି ନୂତନ ଆଇନ ବଳରେ ଋଷଠାରୁ ଅଶୋଧିତ ତେଲ ଓ ପ୍ରାକୃତିକ ଗ୍ୟାସ କିଣୁଥିବା ପ୍ରମୁଖ ଦେଶଗୁଡ଼ିକ (ବିଶେଷ କରି ଭାରତ ଓ ଚୀନ୍) ଉପରେ ଆମେରିକା ୧୦୦ ପ୍ରତିଶତ ପର୍ଯ୍ୟନ୍ତ କଠୋର ଆମଦାନୀ ଶୁଳ୍କ (ଟାରିଫ୍) ଲଗାଇବାର କ୍ଷମତା ହାସଲ କରିଛି। ହାଉସ ଅଫ୍ ରିପ୍ରେଜେଣ୍ଟେଟିଭ୍ସରେ ବୁଧବାର ଦିନ ଏହି ବିଲ୍ଟି ୨୬୨-୧୫୯ ଭୋଟରେ ପାରିତ ହୋଇଥିଲା। ଆମେରିକା ସିନେଟରେ ଗତ ମାସରେ ଏହା ୮୬-୧୧ ଭୋଟର ବିପୁଳ ବହୁମତରେ ଅନୁମୋଦିତ ହୋଇଥିଲା। ଋଷର ମୋଟ ଅଶୋଧିତ ତେଲ ରପ୍ତାନିର ୫୦ ପ୍ରତିଶତ ଚୀନ୍ ଏବଂ ୩୭ ପ୍ରତିଶତ ଭାରତ କ୍ରୟ କରିଥାଏ। ଋଷର ଶକ୍ତି ସମ୍ପଦ କିଣୁଥିବା ଶୀର୍ଷ ୫ଟି ଆମଦାନୀକାରୀ ଦେଶ ଉପରେ ଏହି ନୂଆ ନିୟମ ଅନୁସାରେ ୧୦୦% ପର୍ଯ୍ୟନ୍ତ ଶୁଳ୍କ ଲାଗୁ ହୋଇପାରେ। ୟୁକ୍ରେନ ଯୁଦ୍ଧ ପାଇଁ ଋଷ ଯେପରି ଆର୍ଥିକ ପାଣ୍ଠି ଯୋଗାଡ଼ ନ କରିପାରିବ, ସେଥିପାଇଁ ଏହି ଆଇନ ଜରିଆରେ ଋଷର ଶକ୍ତି ଓ ସମର କ୍ଷେତ୍ରକୁ ଟାର୍ଗେଟ କରାଯାଇଛି। ତେଲ ପରିବହନ କଟକଣାରୁ ବର୍ତ୍ତିବା ପାଇଁ ମସ୍କୋ ବ୍ୟବହାର କରୁଥିବା ‘ଛାୟା ଜାହାଜ ବାହିନୀ’ ଉପରେ ମଧ୍ୟ କଡ଼ା ପ୍ରତିବନ୍ଧକ ଲଗାଯାଇଛି। ଯେଉଁ ଦେଶଗୁଡ଼ିକ ଋଷଠାରୁ ୧୫ ପ୍ରତିଶତରୁ କମ୍ ପ୍ରାକୃତିକ ଗ୍ୟାସ ଆମଦାନୀ କରୁଛନ୍ତି କିମ୍ବା ଆମଦାନୀ ହ୍ରାସ କରିବାକୁ ସକ୍ରିୟ ପଦକ୍ଷେପ ନେଉଛନ୍ତି, ସେମାନଙ୍କୁ ଏହି ଶୁଳ୍କରୁ କିଛିଟା ଛାଡ଼ ମିଳିବାର ପ୍ରାବଧାନ ରହିଛି।
