ଦିଲ୍ଲୀ: ଅନ୍ତର୍ଜାତୀୟ ଯୋଗ ଦିବସର (ଆଇଡିୱାଇ) ଅଷ୍ଟମ ସଂସ୍କରଣ “ଯୋଗ ଫର ହ୍ୟୁମାନିଟି”/ “ମାନବତା ପାଇଁ ଯୋଗ”କୁ ଥିମ୍ (ବିଷୟ) ଭାବରେ ନେଇ ପାଳନ କରାଯିବ। ଆୟୁଷ ମନ୍ତ୍ରଣାଳୟ ୨୧ ଜୁନ୍ ୨୦୨୨ରେ ଭାରତ ଏବଂ ସମଗ୍ର ବିଶ୍ୱରେ ଆୟୋଜିତ ହେବାକୁ ଯାଉଥିବା ଅଷ୍ଟମ ଅନ୍ତର୍ଜାତୀୟ ଯୋଗ ଦିବସ ୨୦୨୨ ନିମନ୍ତେ ଏହି ବିଷୟକୁ ଚୟନ କରିଛନ୍ତି। ଆଇଡିୱାଇ ୨୦୨୨ର ପ୍ରଦର୍ଶନର ମୁଖ୍ୟ କାର୍ଯ୍ୟକ୍ରମ କର୍ଣ୍ଣାଟକର ମହୀଶୂରରେ ଆୟୋଜିତ କରାଯିବ। କୋଭିଡ୍ – ୧୯ ମହାମାରୀ ସମୟରେ ଆୟୋଜିତ ଗତ ବର୍ଷର ଆଇଡିୱାଇର ବିଷୟ “ଯୋଗ ଫର ୱେଲନେସ୍”/ “ସୁସ୍ଥତା ପାଇଁ ଯୋଗ” ରହିଥିଲା।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜର “ମନ୍ କି ବାତ୍” ସମ୍ବୋଧନରେ ଏହି ଥିମ୍ (ବିଷୟ) ସମ୍ପର୍କରେ ଘୋଷଣା କରିଛନ୍ତି। ଚଳିତ ବର୍ଷର ଆଇଡିୱାଇ ନିମନ୍ତେ ବିଷୟକୁ ବହୁତ ବିଚାର – ବିମର୍ଶ/ ପରାମର୍ଶ ପରେ ଚୟନ କରାଯାଇଛି ଏବଂ ଏହା ଉଚିତ୍ ଢଙ୍ଗରେ ଚିତ୍ରିତ କରିବାର ଅଛି ଯେ, କିଭଳି କୋଭିଡ୍ – ୧୯ ମହାମାରୀ ଚରମ ସୀମାରେ ପହଂଚିଥିବା ସମୟରେ, ଯନ୍ତ୍ରଣାକୁ କମ୍ କରିବା କ୍ଷେତ୍ରରେ ଯୋଗ ମାନବତାର ସେବା କରିଛି ଏବଂ ପୁଣି ଥରେ ମୁଣ୍ଡ ଟେକୁଥିବା ପୋଷ୍ଟ କୋଭିଡ୍ରେ ଭୌଗୋଳିକ – ରାଜନୈତିକ ଦୃଶ୍ୟପଟ୍ଟରେ ମଧ୍ୟ ଏହା କରୁଣା, ଦୟା ମାଧ୍ୟମରେ ଲୋକ ମାନଙ୍କୁ ଏକାଠି କରିବ, ଏକତାର ଭାବନାକୁ ପ୍ରୋତ୍ସାହିତ କରିବ ଏବଂ ସାରା ବିଶ୍ୱରେ ଲୋକ ମାନଙ୍କ ମଧ୍ୟରେ ସହନଶୀଳତା ସୃଷ୍ଟି କରିବ।
କେନ୍ଦ୍ର ଆୟୁଷ, ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରୀ, ସର୍ବାନନ୍ଦ ସୋନୋୱାଲ କହିଥିଲେ ଯେ ଆମର ପ୍ରଧାନମନ୍ତ୍ରୀ ଏହି ବର୍ଷର ଆଇଡିୱାଇ ଥିମ୍କୁ “ମାନବତା ନିମନ୍ତେ ଯୋଗ” ଭାବରେ ଘୋଷଣା କରିଛନ୍ତି। ଯେମିତିକି ଆମେ ଜାଣିଛେ ଯେ, ଯୋଗ ଏମିତି ଏକ ଅଭ୍ୟାସ ଅଟେ, ଯାହା ଭିତରୁ ଆନନ୍ଦ, ସୁସ୍ଥତା ଏବଂ ଶକ୍ତି ଆଣିଥାଏ ଏବଂ ଏହା ବ୍ୟକ୍ତିର ଅନ୍ତର୍ନିହିତ ଚେତନା ଏବଂ ବାହ୍ୟ ଜଗତ ମଧ୍ୟରେ ନିରନ୍ତର ସମ୍ବନ୍ଧର ଭାବନାକୁ ଗଭୀର କରିଥାଏ। ଆଇଡିୱାଇ ୨୦୨୨ ଏହି ବିଷୟକୁ ଉପଯୁକ୍ତ ଭାବରେ ପ୍ରଚାରିତ କରିବା କ୍ଷେତ୍ରରେ ସଫଳ ହେବ।
ମାନବତା ନିମନ୍ତେ ଯୋଗ ଉପରେ ଧ୍ୟାନ କେନ୍ଦ୍ରିତ କରି, ଚଳିତ ବର୍ଷ ବିଶେଷ ରୂପରେ ଦିବ୍ୟାଙ୍ଗ ଲୋକ ମାନଙ୍କ ପାଇଁ, ତୃତୀୟ ଲିଙ୍ଗର ବ୍ୟକ୍ତି ବିଶେଷ, ମହିଳା ଏବଂ ଶିଶୁ ମାନଙ୍କ ନିମନ୍ତେ ବିଶେଷ କାର୍ଯ୍ୟକ୍ରମ ପ୍ରସ୍ତୁତ କରାଯାଇଛି। ମାନବିକ ମୂଲ୍ୟବୋଧ ହେଉଛି ବିଦ୍ୟାଳୟ ଗୁଡିକରେ ଯୋଗ ଶିକ୍ଷାର ଏକ ଅବିଚ୍ଛେଦ୍ୟ ଅଙ୍ଗ। ଚଳିତ ବର୍ଷ ଆମର ଗ୍ରାମ/ ଗ୍ରାମ ପଂଚାୟତ ଗୁଡିକରେ ମଧ୍ୟ ଅଧିକରୁ ଅଧିକ ଭାଗୀଦାରୀ ରହିବ, କାରଣ ସାଧାରଣ ସେବା କେନ୍ଦ୍ର (ସିଏସ୍ସି) ସାମାନ୍ୟ ଯୋଗ ପ୍ରୋଟୋକଲ୍ (ସିୱାଇପି) ର ଅଭ୍ୟାସ ଏବଂ ପ୍ରଶିକ୍ଷଣକୁ ପ୍ରୋତ୍ସାହିତ କରୁ ଅଛନ୍ତି ଏବଂ ଆଶା ରହିଛି ଯେ ଆଇଡିୱାଇ ୨୦୨୨ରେ ଲକ୍ଷ ଲକ୍ଷ ପରିମାଣରେ ଗ୍ରାମର ଲୋକମାନେ ଅଂଶଗ୍ରହଣ କରିବେ।
ଅନ୍ତର୍ଜାତୀୟ ଯୋଗ ଦିବସର ଅଷ୍ଟମ ସଂସ୍କରଣରେ ଅନେକ ଜିନିଷ ପ୍ରଥମ ଥର ପାଇଁ ଦେଖିବାକୁ ମିଳିବ, ସେଥି ମଧ୍ୟରୁ “ଗାର୍ଡିଅନ୍ ରିଙ୍ଗ” ନାମକ ଏକ ଯୋଗ ଏକ ଅଭିନବ କାର୍ଯ୍ୟକ୍ରମ ଅଟେ, ଯାହା ସୂର୍ଯ୍ୟଙ୍କର ଗତିକୁ ପ୍ରଦର୍ଶିତ କରିବ, ଯୋଗ କରୁଥିବା ଲୋକ ମାନଙ୍କର ଭାଗୀଦାରୀ ସୂର୍ଯ୍ୟଙ୍କର ଗତି ଭଳି ରହିବ, ବିଭିନ୍ନ ଦେଶରୁ, ଅର୍ଥାତ୍ ପୂର୍ବରୁ ଆରମ୍ଭ ହୋଇ ପଶ୍ଚିମ ଆଡକୁ ଗତିଶୀଳ ହେବ। ଏହା ଏକ ଅଦ୍ଭୁତ ରିଲେ ଯୋଗ ଷ୍ଟ୍ରିମିଂ କାର୍ଯ୍ୟକ୍ରମ ହେବ, ଯାହା ଡିଡି ନ୍ୟାସନାଲ୍ରେ ସିଧା ପ୍ରସାରଣ କରାଯିବ।
ଯେମିତିକି ଦେଶ “ଆଜାଦୀର ଅମୃତ ମହୋତ୍ସବ” ମଧ୍ୟ ପାଳନ କରୁଛି, ତେଣୁ ୭୫ଟି ଜାତୀୟ ସ୍ତରରେ ପ୍ରତିଷ୍ଠିତ ସ୍ଥାନରେ ମଧ୍ୟ ୨୧ ଜୁନ୍ରେ ବହୁତ ବଡ ଆକାରରେ ସିୱାଇପିର ପ୍ରଦର୍ଶନ କରାଯିବ, ଯେତେବେଳେ କି ସମ୍ବନ୍ଧିତ ରାଜ୍ୟ ମଧ୍ୟ ନିଜର ପସନ୍ଦ ଅନୁସାରେ ୭୫ଟି ମହତ୍ୱପୂର୍ଣ୍ଣ ସ୍ଥାନ ଗୁଡିକରେ ଏହି ପ୍ରକାରର କାର୍ଯ୍ୟକ୍ରମ ଆୟୋଜିତ କରିବେ।
ମୋରାରଜୀ ଦେଶାଇ ଜାତୀୟ ଯୋଗ ସଂସ୍ଥାନର ସହଯୋଗରେ ଆୟୁଷ ମନ୍ତ୍ରଣାଳୟ ଦ୍ୱାରା ଅନ୍ତର୍ଜାତୀୟ ଯୋଗ ଦିବସ (ଆଇଡିୱାଇ୨୦୨୨)ର ଅଷ୍ଟମ ସଂସ୍କରଣକୁ କିଛି କାର୍ଯ୍ୟକ୍ରମ ମାଧ୍ୟମରେ ବ୍ୟାପକ କରାଯାଉଛି। ୧୩ ମାର୍ଚ୍ଚ ୨୦୨୨ରେ ଯୋଗ ଦିବସର ୧୦୦ ଦିନର ଓଲଟା ଗଣନା (କାଉଂଟ୍ଡାଉନ୍) ନିମନ୍ତେ ଏକ କାର୍ଯ୍ୟକ୍ରମ ପାଳନ କରାଯାଇଛି, ଯେଉଁଥିରେ ସାରା ବିଶ୍ୱରେ ୧୩ ମାର୍ଚ୍ଚରୁ ୨୧ ଜୁନ୍, ୨୦୨୨ ପର୍ଯ୍ୟନ୍ତ ପାଳନ କରାଯିବାକୁ ଥିବା ଯୋଗ ଦିବସର ୧୦୦ ଦିବସରେ, ୧୦୦ ସହରରେ ଏବଂ ୧୦୦ ସଙ୍ଗଠନରେ ଅଭିଯାନ ଆରମ୍ଭ କରାଯାଇଥିଲା। ନୂଆଦିଲ୍ଲୀର ଲାଲକିଲ୍ଲାରେ ୭୫ ଦିବସୀୟ କାଉଂଟ୍ଡାଉନ୍ କାର୍ଯ୍ୟକ୍ରମ ଆୟୋଜିତ କରା ଯାଇଛି। ୫୦ ତମ ଦିବସରେ କାଉଂଟଡାଉନ୍ ଆସାମର ଶିବସାଗରରେ ପାଳନ କରା ଯାଇଥିଲା ଏବଂ ୨୫ତମ ଦିବସର କାଉଂଟ୍ଡାଉନ୍ ହାଇଦ୍ରାବାଦ, ତେଲେଙ୍ଗାନାରେ ପାଳନ କରାଯାଇଥିଲା।
