ରାସ୍ତାରେ ଚାଲୁଥିବା ବିଭିନ୍ନ ପ୍ରକାରର ଗାଡ଼ି ମଧ୍ୟରେ କିଛି ବିଶେଷ ଗାଡ଼ିର ରଙ୍ଗ ଆମ ଆଖିରେ ତୁରନ୍ତ ଧରାପଡ଼ିଥାଏ। ଲାଲ୍ ରଙ୍ଗର ଦମକଳ, ହଳଦିଆ ରଙ୍ଗର ସ୍କୁଲ ବସ୍ କିମ୍ବା ଧଳା ରଙ୍ଗର ଆମ୍ବୁଲାନ୍ସ- ଏହି ଗାଡ଼ିଗୁଡ଼ିକର ରଙ୍ଗ କେବଳ ସଜାଇବା ପାଇଁ ଦିଆଯାଇନାହିଁ, ବରଂ ଏହା ପଛରେ ରହିଛି ଗଭୀର ବୈଜ୍ଞାନିକ, ବ୍ୟାବହାରିକ ଏବଂ ଜରୁରୀ ସୁରକ୍ଷା ସମ୍ବନ୍ଧୀୟ କାରଣ। ଆଲୋକର ତରଙ୍ଗଦୈର୍ଘ୍ୟ ଠାରୁ ଆରମ୍ଭ କରି କୁହୁଡ଼ିରେ ସ୍ପଷ୍ଟ ଦେଖାଯିବା ଏବଂ ସ୍ୱଚ୍ଛତା ରକ୍ଷା କରିବା ପର୍ଯ୍ୟନ୍ତ- ରଙ୍ଗ ଚୟନ ପଛରେ ଥିବା ଏହି ଆଶ୍ଚର୍ଯ୍ୟଜନକ କାରଣଗୁଡ଼ିକ ବିଷୟରେ ଆସନ୍ତୁ ଜାଣିବା।
ଦମକଳ ରଙ୍ଗ ଲାଲ୍:
ଲାଲ୍ ରଙ୍ଗର ୱେଲଲେନ୍ଥ ସବୁଠୁ ଅଧିକ। ଯେଉଁଥିପାଇଁ ସବୁଠୁ କମ୍ ଏନର୍ଜିରେ ଏହା ସହଜରେ ଦେଖାଯାଏ। ଏମିତିକି ବର୍ଷା, କୁହୁଡ଼ିରେ ବି ଏହି ରଙ୍ଗ ଦେଖାଯାଏ। ଯେହେତୁ ଦମକଳ ଏବଂ ଫାୟାର ସିଲିଣ୍ଡର ନିଆଁ ଲିଭାଇବା ଭଳି ଏମର୍ଜେନ୍ସି କାର୍ଯ୍ୟରେ ବ୍ୟବହାର କରାଯାଏ, ତେଣୁ ଭିଡ଼ରେ ସହଜରେ ଦେଖାଯିବା ପାଇଁ ଏହାକୁ ଲାଲ୍ ରଙ୍ଗ ଦିଆଯାଇଥାଏ। ତା’ଛଡ଼ା କେତେଜଣ ଐତିହାସିକଙ୍କ ମତରେ ୧୯୦୦ ମସିହା ଆରମ୍ଭ ବେଳକୁ ଯେବେ କାର୍ ଉତ୍ପାଦନ ଧୀରେ ଧୀରେ ବଢ଼ିଲା, ସେତେବେଳେ କେବଳ କଳା କାର୍ ହିଁ ବିକ୍ରି ହେଉଥିଲା। ତେଣୁ ରାସ୍ତାରେ କଳାଠାରୁ ସମ୍ପୂର୍ଣ୍ଣ ଭିନ୍ନ ଓ ଭଲ ଭାବେ ଅଲଗା ଦେଖାଯିବା ଲାଗି ଦମକଳକୁ ଲାଲ୍ ରଙ୍ଗ ଦିଆଯାଏ।
ହଳଦିଆ ସ୍କୁଲ୍ ବସ୍:
ବିଭିନ୍ନ ରଙ୍ଗ ମଧ୍ୟରୁ ସ୍କୁଲ୍ ବସ୍ଗୁଡ଼ିକ ପାଇଁ ହଳଦିଆ ରଙ୍ଗ କାହିଁକି ବଛାଯାଇଛି, ଏକଥା ଅନେକଙ୍କ ମନରେ ଆସିଥାଏ । ତେବେ ଏହା ପଛରେ ବୈଜ୍ଞାନିକ କାରଣ ମଧ୍ୟ ରହିଛି। ଏହାର ୱେଲଲେନ୍ଥ ଯଦିଓ ଲାଲ୍ରୁ କମ୍, ହେଲେ ଲାଟେରାଲ୍ ପେରିଫେରାଲ୍ ଭିଜନ୍ ବା ଏଲ୍ପିଭି ଲାଲ୍ ରଙ୍ଗ ତୁଳନାରେ ୧.୨୪ ଗୁଣ ଅଧିକ ହୋଇଥିବାରୁ ଏହା ଅନ୍ୟ ରଙ୍ଗ ମଧ୍ୟରେ ଦୂରରୁ ମଧ୍ୟ ସ୍ପଷ୍ଟ ଦେଖାଯାଇଥାଏ। ଏମିତିକି ବର୍ଷା ଏବଂ କୁହୁଡ଼ିରେ ବି ଏହି ରଙ୍ଗ ଦୂରରୁ ଦେଖାଯାଏ। ତେଣୁ ଦୁର୍ଘଟଣାରୁ ବଞ୍ଚିବା ପାଇଁ ସ୍କୁଲ୍ ବସ୍ଗୁଡ଼ିକୁ ହଳଦିଆ ରଙ୍ଗ ଦିଆଯାଇଥାଏ ।
ଆମ୍ବୁଲାନ୍ସ ରଙ୍ଗ ଧଳା:
ସାଧାରଣତଃ ଆମ୍ବୁଲାନ୍ସର ରଙ୍ଗ ଧଳା ରଖାଯାଇଥାଏ। ଏହା ପଛରେ ମଧ୍ୟ କେତେକ କାରଣ ରହିଛି। ଧଳା ରଙ୍ଗ ଦିବାଲୋକରେ ସ୍ପଷ୍ଟ ଦେଖାଯାଉଥିବା ବେଳେ ରାତିରେ ଲାଇଟ୍ ପଡ଼ିଲେ ଅନ୍ୟ ରଙ୍ଗ ଅପେକ୍ଷା ଭଲ ଭାବେ ଦେଖାଯାଏ। ଏହା ଉପରେ ବ୍ଲୁ ରଙ୍ଗରେ ଲେଖାଥିବା ଆମ୍ବୁଲାନ୍ସ ପଢ଼ିବା ସହଜ ହୋଇଥାଏ। ଧଳା ଶାନ୍ତି ଏବଂ ସ୍ୱଚ୍ଛତାର ପ୍ରତୀକ ହୋଇଥିବାରୁ ରୋଗୀଙ୍କୁ ନେବା ପାଇଁ ଏହି ରଙ୍ଗ ଗାଡ଼ି ବ୍ୟବହାର କରାଯାଏ। ରୋଗୀ ନେଉଥିବାରୁ ଆମ୍ବୁଲାନ୍ସର ହାଇଜିନ୍ ରକ୍ଷା କରିବା ଲାଗି ଏହାକୁ ମଇଳା ହେବା ମାତ୍ରେ ବାରମ୍ବାର ସଫା କରିବାକୁ ପଡ଼ିଥାଏ। ଯେହେତୁ ଧଳା ରଙ୍ଗ ଉପରେ ସାମାନ୍ୟ ମଳି ଲାଗିଲେ ସହଜରେ ଜଣାପଡ଼ିଥାଏ, ତେଣୁ ଏହାକୁ ସଫା କରିବା ସହଜ ହେଉଥିବାରୁ ଆମ୍ବୁଲାନ୍ସକୁ ଏହି ରଙ୍ଗ ରଖାଯାଇଥିବା ମଧ୍ୟ କୁହାଯାଏ।