ଭୁବନେଶ୍ବର: କୋଭିଡ ମହାମାରୀ ସମସ୍ତଙ୍କ ଦୈନନ୍ଦିନ ଜୀବନର ଗତିଶୀଳତାକୁ ବ୍ୟାହତ କରିଛି। ସେହି ସମୟର କିଛି ବାସ୍ତବିକ କରୁଣ କାହାଣୀ ଉପରେ ପର୍ୟ୍ୟବେସିତ ସତ୍ୟ ଘଟଣାବଳୀକୁ ନେଇ ଜ୍ୟୋତି ପ୍ରଡକ୍ସନ୍ ଅଧୀନରେ ନିର୍ମିତ ଏକ ଭିନ୍ନ ଧରଣର ଚଳଚ୍ଚିତ୍ର “ଭୋକ” ଆଜି ଏସପ୍ଲାନେଡ଼ ମଲର ସିନେ ପୋଲିସ ମଲ୍ଟିପ୍ଲେକ୍ସଠାରେ ମୁକ୍ତିଲାଭ କରିଛି।
ଏହି ଅବସରରେ ରାଜ୍ୟ ଚଳଚ୍ଚିତ୍ର ନିଗମର ଅଧ୍ୟକ୍ଷ ସତ୍ୟବ୍ରତ ତ୍ରିପାଠୀ, ଚଳଚ୍ଚିତ୍ରର କାହାଣୀକାର ତଥା ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ନିର୍ଦ୍ଦେଶକ ଶ୍ରୀରଞ୍ଜନ କୁମାର ଦାସ, ଚଳଚ୍ଚିତ୍ର ନିର୍ଦ୍ଦେଶକ ରାଜୀବ ମହାନ୍ତି, ଅକ୍ଷୟ ପରିଜା, ଅଭିନେତ୍ରୀ କାବ୍ୟାକିରଣ, ସୁବୋଧ ଆଚାର୍ଯ୍ୟ, ମନସ୍ୱିନୀ ସାହୁ ଓ ବାସୁଦେବ ମାଳ ବିଶୋଇ ପ୍ରମୁଖ ଉପସ୍ଥିତ ଥିଲେ।
ମାନବ ଜାତି ପାଇଁ ଅଦୃଶ୍ୟ ଶତ୍ରୁ ଭାବେ ଉଭା ହୋଇ ଥିବା କରୋନା ସଂକ୍ରମଣକୁ ପ୍ରତିହତ କରିବା ପାଇଁ କରାଯାଇଥିବା ଲକଡାଉନ ଓ ସଟଡାଉନ ଯୋଗୁଁ ଜଣେ ସାଧାରଣ ବ୍ୟକ୍ତି ଜୀବିକା ହରେଇ ଉଭୟ ଆର୍ଥିକ ଅସୁବିଧା ଓ ସାମାଜିକ ଦ୍ଵେଷର ସମ୍ମୁଖୀନ ହୋଇ ବିଷମ ପରିସ୍ଥିତି ଦେଇ ଗତି କରୁଥିବାର କାହାଣୀକୁ ନେଇ ଏହି ଚଳଚ୍ଚିତ୍ର ଗତିଶୀଳ ହେଇଛି। ଅନେକଙ୍କ ଅଙ୍ଗେଲିଭା ଅନୁଭବକୁ ଚଳଚ୍ଚିତ୍ରର ଅଭିନେତା ଓ ଅଭିନେତ୍ରୀମାନେ ନିଜ ଅଭିନୟ ମାଧ୍ୟମରେ ଜୀବନ୍ତ କରିବାରେ ସଫଳ ହୋଇପାରିଛନ୍ତି।
