ନୂଆଦିଲ୍ଲୀ: କଂଗ୍ରେସ, ବାମପନ୍ଥୀ ଏବଂ ଟିଏମସି ସମେତ ୧୯ଟି ବିରୋଧୀ ଦଳ ଆଜି ନୂଆ ସଂସଦ ଭବନ ଉଦଘାଟନ ସମାରୋହକୁ ବର୍ଜନ କରିବା ପାଇଁ ଘୋଷଣା କରିଛନ୍ତି। ସେମାନେ ଏକ ମିଳିତ ପ୍ରେସ ବିଜ୍ଞପ୍ତି ମାଧ୍ୟମରେ ଏହା ଜଣାଇଛନ୍ତି।
ଏଥିରେ କୁହାଯାଇଛି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ବାରା ନୂତନ ସଂସଦ ଭବନ ଆସନ୍ତା ୨୮ ତାରିଖରେ ଉଦ୍ଘାଟନ କରିବାକୁ ନିଷ୍ପତ୍ତି ନିଆଯାଇଛି। ଏହାକୁ ରାଷ୍ଟ୍ରପତିଙ୍କ ପ୍ରତି ଅପମାନ ସଦୃଶ୍ୟ। କାରଣ ଗଣତନ୍ତ୍ରର ମନ୍ଦିରକୁ ଗଣତନ୍ତ୍ରର ମୁଖ୍ୟ ରାଷ୍ଟ୍ରପତି ଉଦଘାଟନ କରିବା କଥା। ହେଲେ ତାହା ହେଉ ନାହିଁ। ମିଳିତ ବିବୃତ୍ତିରେ ସେମାନେ କହିଛନ୍ତି ଯେ ସଂସଦ ଭବନର ଉଦଘାଟନ ଏକ ମହତ୍ବପୂର୍ଣ୍ଣ ଘଟଣା ହୋଇଥିଲେ ମଧ୍ୟ କେନ୍ଦ୍ର ସରକାରଙ୍କ ସେଥିରେ ଖାତିର ନାହିଁ।
କେଉଁ କେଉଁ ଦଳ ଏହି ଉତ୍ସବକୁ ବର୍ଜନ କରୁଛନ୍ତି
କଂଗ୍ରେସ, ତୃଣମୂଳ କଂଗ୍ରେସ, ଡିଏମକେ, ଜନତା ଦଳ (ୟୁନାଇଟେଡ୍), ଆପ୍, ସିପିଆଇଏମ, ସିପିଆଇ,ଏସପି, ଏନସିପି, ଏସଏସ( ୟୁବିଟି), ଆରଜେଡି, ଆଇୟୁଏମଏଲ, ଜେଏମଏମ, ଏନସି, କେସିଏମ, ଆରଏସପି, ଭିସିକେ, ଏମଡିଏମକେ ଏବଂ ଆରଏଲଡି ଏହି ଉତ୍ସବକୁ ବର୍ଜନ କରିବା ପାଇଁ ଘୋଷଣା କରିଛନ୍ତି।
ମେ ୨୮ ତାରିଖରେ ନୂତନ ସଂସଦ ଭବନ ହେବ ଉଦଘାଟନ
ଲୋକସଭା ବାଚସ୍ପତି ଓମ ବିର୍ଲାଙ୍କ ନିମନ୍ତ୍ରଣ ପରେ ମୋଦୀ ଆସନ୍ତା ୨୮ ରେ ନୂତନ ସଂସଦ ଭବନର ଉଦଘାଟନ କରିବେ। ସେହିଦିନ ସାବରକର ଜନ୍ମ ବାର୍ଷିକୀ ମଧ୍ୟ ରହିଛି। ଫଳରେ ନୂତନ ସଂସଦ ଭବନ ଉଦଘାଟନ ଦିନକୁ ନେଇ ମଧ୍ୟ ବିରୋଧୀ ଖପ୍ପା। ନୂଆ ସଂସଦ ଭବନକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଦଘାଟନ କରିବା ପାଇଁ ବିରୋଧୀ ଅଡି ବସିଛନ୍ତି। ହେଲେ ସଂସଦ ଭବନ ଉଦଘାଟନ ପାଇଁ ନିମନ୍ତ୍ରଣ କାର୍ଡରେ ପ୍ରଧାନମନ୍ତ୍ରୀ ଉଦଘାଟନ କରୁଥିବାରୁ ତାହାକୁ ନେଇ ବିରୋଧୀ ବିରୋଧ କରିବା ସହ ବର୍ଜନ ଘୋଷଣା କରିଛନ୍ତି।
ସେମାନେ କହିଛନ୍ତି ଯେ, ରାଷ୍ଟ୍ରପତି ହେଉଛନ୍ତି ସମ୍ବିଧାନର ମୁଖ୍ୟ। ଆଉ ସଂସଦ ଭବନ ମଧ୍ୟ ସେହିପରି ସମ୍ବିଧାନର ଅବିଚ୍ଛେଦ ଅଂଗ। ଏଥିରେ ପ୍ରଧାନମନ୍ତ୍ରୀ କଣ ପାଇଁ ଉଦଘାଟନ କରିବେ ବୋଲି ବିରୋଧୀ ପ୍ରଶ୍ନ କରିଛନ୍ତି। ଏହାଦ୍ବାରା ରାଷ୍ଟ୍ରପତିଙ୍କୁ ଅପମାନିତ କରାଯାଉଛି ବୋଲି ବିରୋଧୀ ଅଭିଯୋଗ କରିଛନ୍ତି।
