ନୂଆଦିଲ୍ଲୀ: ଅଭିନେତା ଥାଲାପଥି ବିଜୟ ତାଙ୍କ ଫ୍ୟାନ କ୍ଲବ ବିଜୟ ମକ୍କଲ ଇୟାକ୍କମର ସାଧାରଣ ପରିଷଦ ଅନୁମତି ଦେବା ପରେ ସେ ନିଜର ରାଜନୈତିକ ଦଳ ପଞ୍ଜୀକରଣ କରିବାକୁ ଯାଉଛନ୍ତି। ଗୁରୁତ୍ୱପୂର୍ଣ୍ଣ ଲୋକସଭା ନିର୍ବାଚନର କିଛିମାସ ପୂର୍ବରୁ ଏହି ଘଟଣା ଘଟିଛି। ଗୁରୁବାର ଚେନ୍ନାଇରେ ଅନୁଷ୍ଠିତ ଏହି ବୈଠକରେ କୋଲିଉଡ ମେଗା ଷ୍ଟାରଙ୍କୁ ତାଙ୍କ ଦଳ ପଞ୍ଜୀକରଣ, ନିଜକୁ ସଭାପତିଭାବେ ନାମିତ କରିବା ଏବଂ ଉପଆଇନର ଡ୍ରାଫ୍ଟ ପ୍ରସ୍ତୁତ କରିବା ପାଇଁ ଦାୟିତ୍ୱ ଦିଆଯାଇଥିବା ସୂତ୍ରରୁ ଜଣାପଡ଼ିଛି।
ଅଭିନେତା ବିଜୟଙ୍କର ତାମିଲନାଡୁ ଏବଂ କେରଳରେ ବିପୁଳ ପ୍ରଶଂସକ ଅଛନ୍ତି ଏବଂ ସେ ବିଭିନ୍ନ ଜନକଲ୍ୟାଣକାରୀ କାର୍ଯ୍ୟରେ ସମ୍ପୃକ୍ତ ଅଛନ୍ତି। ସେ ୨୦୧୮ରେ ଥୁଥୁକୁଡି ପୋଲିସ ଗୁଳିରେ ପ୍ରାଣ ହରାଇଥିବା ଲୋକଙ୍କ ପରିବାର ସଦସ୍ୟଙ୍କୁ ଭେଟିଥିଲେ, ଯାହା ତାଙ୍କ ରାଜନୈତିକ ପଦାର୍ପଣର ଗମ୍ଭୀରତାର ସଙ୍କେତ ଦେଇଥିଲା। ସେବେଠାରୁ ସାଉଥ୍ ସୁପରଷ୍ଟାରଙ୍କ ଫ୍ୟାନ୍ କ୍ଲବ୍ ବିଜୟ ମକ୍କାଲ ଇୟାକ୍କମ୍ ରାଜନୈତିକ କାର୍ଯ୍ୟକ୍ରମରେ ବେଶ୍ ସକ୍ରିୟ ରହିଛି ଏବଂ ତାମିଲନାଡୁ ସ୍ଥାନୀୟ ସଂସ୍ଥା ନିର୍ବାଚନରେ ମଧ୍ୟ ପ୍ରତିଦ୍ୱନ୍ଦ୍ୱିତା କରିଛି।
ପ୍ରଭାବିତ ଲୋକଙ୍କୁ ରିଲିଫ ସାମଗ୍ରୀ ଯୋଗାଇବା ପାଇଁ ଅଭିନେତା ଡିସେମ୍ବରରେ ବନ୍ୟାଦ୍ୱାରା କ୍ଷତିଗ୍ରସ୍ତ ତାମିଲନାଡୁର ଦକ୍ଷିଣ ଜିଲ୍ଲାଗୁଡିକ ମଧ୍ୟ ପରିଦର୍ଶନ କରିଥିଲେ। ଏହା ପୂର୍ବରୁ ଅଭିନେତା ବିଜୟ ୨୦୨୬ରେ ରାଜନୀତିରେ ଡେବ୍ୟୁ କରିବେ ବୋଲି ସଙ୍କେତ ଦେଇଥିଲେ। ତେବେ ତାଙ୍କ ପ୍ରଶଂସକମାନେ ତାଙ୍କୁ ଯଥାଶୀଘ୍ର ନିଜର ପାର୍ଟି ପଞ୍ଜୀକରଣ ଆରମ୍ଭ କରିବାକୁ ଅନୁରୋଧ କରିଥିଲେ।
