ଭୁବନେଶ୍ବର: ଏଥର ନିର୍ବାଚନ ରଣାଙ୍ଗନରେ ଅବତିର୍ଣ୍ଣ ହେବେ ନାହିଁ ବିଜେପିର ବରିଷ୍ଠ ନେତା ବୈଜୟନ୍ତ ପଣ୍ଡା। ଅବଶ୍ୟ ସେ ଏ ନେଇ ସେମିିତି କିଛି ଘୋଷଣା କରି ନାହାଁନ୍ତି। ହେଲେ ଗତକାଲି ତାଙ୍କୁ ଉତ୍ତର ପ୍ରଦେଶ ପ୍ରଭାରୀ ଭାବେ ନିଯୁକ୍ତ ହେବା ପରେ ଏହି ସନ୍ଦେହ ବଢିଛି।
ଦେଶର ଉତ୍ତର ପ୍ରଦେଶ ହେଉଛି ଅଧିକ ଲୋକସଭା ଆସନ ଥିବା ରାଜ୍ୟ। ସେହି ରାଜ୍ୟରେ ଏଥର ବିଜେପି କିପରି ଅଧିକ ଆସନରେ ଜିତିବ ସେ ଦାୟିତ୍ବ ବର୍ତ୍ତମାନ ମୋଦୀଶାହା ଖୋଦ ପଣ୍ଡାଙ୍କ ଉପରେ ଲଦି ଦେଲେ। ତେଣୁ ସେଠାରେ ଦଳକୁ ଆହୁରି ସୁଦୃଢ କରିବାକୁ ହେଲେ ତାଙ୍କୁ ସେଠାରେ ରହିବାକୁ ପଡିବ। ସେଥିପାଇଁ ସେ ଏଥର ନିର୍ବାଚନରେ ନିଜେ ଛିଡା ହେବେ ନାହିଁ କି ପ୍ରଚାରକୁ ମଧ୍ୟ ଆସିପାରିବେ ନାହିଁ ବୋଲି ସନ୍ଦେହ ସୃଷ୍ଟି ହୋଇଛି।
ପୂର୍ବରୁ ବୈଜୟନ୍ତ ନିର୍ବାଚନ ରଣାଙ୍ଗନରେ ସାମିଲ ହେବେ ନାହିଁ ବୋଲି ଅନୁମାନ ମଧ୍ୟ କରାଯାଇଛି। କାରଣ ସେ ଓଡିଶା ରାଜନୀତିରୁ ନିଜକୁ ଦୂରେଇ ରଖିଥିଲେ। ତାଙ୍କୁ ଆସାମ ଓ ଦିଲ୍ଲୀ ପ୍ରଭାରୀ କରାଯାଇଥିବାରୁ ସେ ବେଶୀ ସମୟ ସେହି ଦୁଇ ରାଜ୍ୟରେ ନିଜକୁ ନିୟୋଜିତ ରଖିଛନ୍ତି। କେବଳ ଓଡିଶାରେ କେତେକ ଉପନିର୍ବାଚନରେ ଥରେ ଅଧେ ପ୍ରଚାରରେ ଆସି ନିଜର ସ୍ଥିତି ଜାହିର ରଖିଛନ୍ତି।
ହେଲେ ତାଙ୍କର ନିଜ ନିର୍ବାଚନ ମଣ୍ଡଳୀ କେନ୍ଦ୍ରାପଡାରେ ସେ ପୂର୍ଣ୍ଣ ମାତ୍ରାରେ ସକ୍ରିୟ ନାହାଁନ୍ତି। କେବଳ ତାଙ୍କର ଟିମ ସେହି ଅଞ୍ଚଳରେ ବୈଜୟନ୍ତଙ୍କ ସ୍ଥିତିକୁ ଜାହିର ରଖିଛନ୍ତି। ଅନ୍ୟପକ୍ଷରେ ବୈଜୟନ୍ତ କେନ୍ଦ୍ରୀୟ ସ୍ତରରେ ନିଜର ଦବଦବାକୁ ବୃଦ୍ଧି କରିବାରେ ଲାଗିଛନ୍ତି। ରାଷ୍ଟ୍ରୀୟ ଉପସଭାପତି ହେବା ସହ ଦୁଇଟି ରାଜ୍ୟର ପ୍ରଭାରୀ ଭାବେ ସେ ନିଯୁକ୍ତ ହୋଇଛନ୍ତି। ବର୍ତ୍ତମାନ ଉତ୍ତର ପ୍ରଦେଶ ପ୍ରଭାରୀ ତାଙ୍କର ଗୁରୁତ୍ବକୁ ଆହୁରି ବଢାଇ ଦେଇଛି।
ବୈଜୟନ୍ତଙ୍କୁ ନୂଆ ଦାୟିତ୍ବ ମିଳିବା ଏବଂ ସେ କେନ୍ଦ୍ରପଡାରୁ ଆଉ ଛିଡା ନ ହେବା ଆଶଙ୍କା ପରେ ବର୍ତ୍ତମାନ କେନ୍ଦ୍ରାପଡାରୁ କିଏ ବିଜେପି ପ୍ରାର୍ଥୀ ହେବ ସେ ନେଇ ଚର୍ଚ୍ଚା ଆରମ୍ଭ ହୋଇଗଲାଣି। ବୈଜୟନ୍ତଙ୍କ ହାତରେ କେନ୍ଦ୍ରପଡା ଲୋକସଭା ଥିବାରୁ ସେଠାରେ ଆଉ ଦ୍ବିତୀୟ ନେତା କେହି ସୃଷ୍ଟି ହୋଇ ନାହାଁନ୍ତି। ଫଳରେ ଦଳ ଏଥର ବୈଜୟନ୍ତ ପରିବର୍ତ୍ତେ କାହାକୁ ପ୍ରାର୍ଥୀ କରିବ ସେ ନେଇ ଚିନ୍ତା ବଢିଯାଇଛି।
