ଭୁବନେଶ୍ବର: ବହୁ ଦିନ ଧରି ଓଡିଶାରେ ବିଜେଡି ବିଜେପି ମଧ୍ୟରେ ମେଣ୍ଟ ହେବ ବୋଲି ଚର୍ଚ୍ଚା ଚାଲିଥିଲା। ହେଲେ ବର୍ତ୍ତମାନ ତାହା ସତ ହେବାକୁ ଯାଉଛି। କାରଣ ଗତକାଲି ଉଭୟ ଦଳର ବୈଠକ ଏବଂ ନେତାଙ୍କ ମନ୍ତବ୍ୟରୁ ତାହା ସ୍ପଷ୍ଟ ହୋଇଛି। ହେଲେ ସେହି ନେତାମାନେ ପୂର୍ବରୁ ମେଣ୍ଟ ହେବ ନାହିଁ ବୋଲି ସଫେଇ ଦେଉଥିଲେ। ଆମେ ଏକା ଲଢିବୁ ବୋଲି କହି ହେଉଥିଲେ।
ତେବେ ବର୍ତ୍ତମାନ ସାଧାରଣରେ ଏକ ପ୍ରଶ୍ନ ଉଠିଲାଣି ଯେ, ପ୍ରକୃତରେ ଏହି ମେଣ୍ଟ ହେବାକୁ କିଏ ଚାହୁଁଛି। ନିଜେ ବିଜେଡି ଏହି ମେଣ୍ଟ ହେଉ ବୋଲି ଆଗ୍ରହ ପ୍ରକାଶ କରୁଛି ନା ବିଜେପିର ଏପରି ପଦକ୍ଷେପ। ସେମାନେ ବାହାରକୁ ମେଣ୍ଟ ହେବ ନାହିଁ ବୋଲି କହି ହେଉଥିବା ବେଳେ କଣ ଭିତରେ ଭିତରେ ମେଣ୍ଟ ପାଇଁ ପ୍ରୟାସ କରୁଛନ୍ତି କି ବୋଲି ସନ୍ଦେହ ରହିଥିଲା।
ସାଧାରଣରେ ଦେଖିବାକୁ ଗଲେ ବିଜେଡି ମେଣ୍ଟ ପାଇଁ କାହିଁକି ଆଗ୍ରହ ପ୍ରକାଶ କରିବ। କାରଣ ବର୍ତ୍ତମାନ ନବୀନ ପଟ୍ଟନାୟକଙ୍କ ଶାସନରେ ଓଡିଶା ଲୋକେ ଅନ୍ୟ କାହାକୁ ଭୋଟ ଦେବେ ସେପରି ସନ୍ଦେହ ନାହିଁ। ବିଜେଡି ନିଜେ ଜାଣିସାରିଛି ଯେ ନବୀନ ହିଁ ଷଷ୍ଠଥର ଶାସନ ଭାର ଗ୍ରହଣ କରିବେ। ସେମାନଙ୍କ ସର୍ଭେ ମଧ୍ୟ ସେହି ରିପୋର୍ଟ ପ୍ରଦାନ କରିଛି। ତେଣୁ ବିଜେଡି ଯେତେବେଳେ ଜିତିବା ପରିସ୍ଥିତିରେ ରହିଛି ସେତେବେଳେ ସେ କାହିଁକି ବିଜେପି ସହିତ ମେଣ୍ଟ କରିବ।
ଅନ୍ୟପକ୍ଷରେ ବିଜେପି କଥା ଦେଖାଯାଉ। ସଭାପତି ମନମୋହନ ସାମଲଙ୍କ ନେତୃତ୍ବରେ ବର୍ତ୍ତମାନ ବିଜେପି ବେଶ କିଛି ଉନ୍ନତି କରିବାରେ ଲାଗିଛି। ପୂର୍ବରୁ ଏକା ଲଢିବେ ବୋଲି ସେମାନେ ସାହାସ ଜୁଟାଇ ପାରୁ ନ ଥିଲେ। ହେଲେ ବର୍ତ୍ତମାନ 2024 ରେ ସେମାନେ ଏକା ଲଢିବା ପାଇଁ ବଳ ଜୁଟାଇ ପାରିଛନ୍ତି। ଆଉ ସେମାନେ ଜାଣିଛନ୍ତି ମେଣ୍ଟ ହେଲେ ବିଜେପିର କ୍ଷତି ହେବ ସିନା ଲାଭ ହେବ ନାହିଁ। ତେଣୁ ସେପରି କ୍ଷେତ୍ରରେ ବିଜେପି ମଧ୍ୟ ମେଣ୍ଟ ସପକ୍ଷରେ ନାହିଁ ବୋଲି ଜଣାପଡିଛି।
ହେଲେ ଏହି ମେଣ୍ଟ କିଏ କରୁଛି କାହିଁକି କରୁଛି ସେ ନେଇ ଚାରିଆଡେ ଆଲୋଚନା। ତେବେ ଦିଲ୍ଲୀ ସୁତ୍ର ଅନୁଯାୟୀ ଏହି ମେଣ୍ଟକୁ ଉଭୟ ବିଜେଡି କିମ୍ବା ବିଜେପି ଆଗ୍ରହୀ ନାହିଁନ୍ତି। କିନ୍ତୁ ବିଜେପିର ରାଷ୍ଟ୍ରୀୟ ନେତା ଚାହୁଛନ୍ତି ଓଡିଶାରେ ମେଣ୍ଟ ହେଉ। କାରଣ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯେଉଁ ସ୍ଲୋଗାନ ଦେଇଛନ୍ତି ” ଏଥର ଏନଡିଏ 400 ପାର୍ ” ତାହାକୁ ସତ ପ୍ରମାଣିତ କରିବାକୁ ଏହି ମେଣ୍ଟର ପରିକଳ୍ପନା।
ଅନ୍ୟପକ୍ଷରେ ବିଜେପିର ଶୀର୍ଷ ନେତୃତ୍ବ ଜାଣିସାରିଲେଣି ଯେ, ଓଡିଶାରେ ବିଜେପି କିଛି କରିପାରିବ ନାହିଁ। ସେମାନେ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବେଶ ଶକ୍ତିଶାଳି କରି ଓଡିଶାକୁ ଛାଡିଲେ। ହେଲେ ତାଙ୍କ ଦ୍ବାରା ସଂଗଠନ ସୁଦୃଢ ହୋଇପାରିଲା ନାହିଁ। ଫଳରେ ଧର୍ମେନ୍ଦ୍ରଙ୍କୁ ଏଥର ଶୀର୍ଷ ନେତୃତ୍ବ ରାଜ୍ୟ ସାଂଗଠାନିକ କାର୍ଯ୍ୟରୁ ଦୂରେଇ ଦେଇଛନ୍ତି। ଯଦି ଓଡିଶାରେ ସେ ବିଜେପିକୁ ସୁଦୃଢ କରିପାରିଥାଆନ୍ତେ ତେବେ ହୁଏତ ଆଜି ଏହି ମେଣ୍ଟ ହୋଇ ନ ଥାଆନ୍ତା।
