ନୂଆଦିଲ୍ଲୀ: ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନୟୁ) ର ଛାତ୍ର ସଂଗଠନ ନିର୍ବାଚନରେ ବାମପନ୍ଥୀ ଛାତ୍ର ସଂଗଠନ ପୁଣି ଥରେ ବିଜୟୀ ହୋଇଛି। ବାମ ପ୍ରାର୍ଥୀ ଧନଞ୍ଜୟ ଅଖିଲ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ପ୍ରାର୍ଥୀ ଉମେଶ ସି ଅଜମିରାଙ୍କୁ ୯୨୨ ଭୋଟରେ ପରାସ୍ତ କରି ଜେଏନଏସୟୁ ସଭାପତି ପଦ ଜିତିଛନ୍ତି। ବାମପନ୍ଥୀ ଛାତ୍ର ସଂଗଠନ ଏବଂ ସେମାନଙ୍କ ସମର୍ଥିତ ପ୍ରାର୍ଥୀମାନେ ସଭାପତିଙ୍କ ସମେତ ଚାରିଟି ଆସନ ଜିତିଛନ୍ତି।
ବାମପନ୍ଥୀ ସଂଗଠନଗୁଡ଼ିକ ଜେଏନଏସୟୁ ନିର୍ବାଚନରେ ଅଖିଲ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) କୁ ପରାସ୍ତ କରି ତିନୋଟି ପଦବୀ ହାସଲ କରିଛନ୍ତି; ବିଏପିଏସଏ ପ୍ରାର୍ଥୀ ସାଧାରଣ ସମ୍ପାଦକ ପଦ ଜିଟିଛି। ବାମ ସଂଗଠନଗୁଡିକ ମଧ୍ୟ BAPSA ପ୍ରାର୍ଥୀଙ୍କୁ ସମର୍ଥନ କରିଥିଲେ। ସମସ୍ତ ଆସନରେ ବାମ ସଂଗଠନ ଏବଂ ଏହାର ସମର୍ଥିତ ପ୍ରାର୍ଥୀମାନେ ଆରଏସଏସ ସମର୍ଥିତ ଛାତ୍ର ସଂଗଠନ ଏବିଭିପି ସହିତ ପ୍ରତିଦ୍ୱନ୍ଦ୍ୱିତା କରିଥିଲେ। ୪ ବର୍ଷ ପରେ ହେଉଥିବା ନିର୍ବାଚନକୁ ନେଇ ଛାତ୍ରଛାତ୍ରୀମାନଙ୍କ ମଧ୍ୟରେ ବହୁ ଉତ୍ସାହ ଦେଖିବାକୁ ମିଳିଥିଲା।
୧୨ ବର୍ଷ ପରେ ମତଦାନ ସର୍ବାଧିକ ଥିଲା:
ଶୁକ୍ରବାର ଦିନ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ ଛାତ୍ର ସଂଗଠନ (ଜେଏନଏସୟୁ) ନିର୍ବାଚନ ପାଇଁ ୭୩ ପ୍ରତିଶତ ମତଦାନ ହୋଇଥିଲା, ଯାହାକି ଗତ ୧୨ ବର୍ଷ ମଧ୍ୟରେ ସର୍ବାଧିକ। ନିର୍ବାଚନ କମିଟି କହିଛି ଯେ, ଜେଏନଏସୟୁ ନିର୍ବାଚନ ଦୁଇଟି ପର୍ଯ୍ୟାୟରେ ଅନୁଷ୍ଠିତ ହୋଇଥିଲା। ଚାରି ବର୍ଷର ବ୍ୟବଧାନ ପରେ ଏଥର ମତଦାନ ହୋଇଥିଲା ଏବଂ ୭,୭୦୦ ରୁ ଅଧିକ ପଞ୍ଜୀକୃତ ଭୋଟର ଗୁପ୍ତ ଭୋଟ୍ ମାଧ୍ୟମରେ ଭୋଟ୍ ଦେଇଥିଲେ।
