ନୂଆଦିଲ୍ଲୀ: ସରକାରୀ ତଥ୍ୟର ବିଶ୍ଳେଷଣରୁ ଜଣାପଡ଼ିଛି ଯେ, ସପ୍ତଦଶ ଲୋକସଭାରେ ଚଳଚ୍ଚିତ୍ର ତାରକା, କ୍ରୀଡ଼ାବିତ୍ ଓ ଗାୟକଙ୍କ ଭଳି ସେଲିବ୍ରିଟି ସାଂସଦମାନଙ୍କ ଉପସ୍ଥିତି କମ୍ ଥିଲେ ହେଁ ବିତର୍କରେ ଭାଗ ନେବା ବହୁତ କମ୍ ରହିଥିଲେ ହେଁ ଓଡ଼ିଆ ଚଳଚ୍ଚିତ୍ର ତାରକା ତଥା ସାଂସଦ ଅନୁଭବ ମହାନ୍ତି ଏଥିରେ ଆଗରେ ଅଛନ୍ତି।
ଏହି ବିଶ୍ଳେଷଣ ପାଇଁ ୧୯ ଜଣ ସାଂସଦଙ୍କୁ ସେମାନଙ୍କ ନିର୍ବାଚନୀ ସତ୍ୟପାଠରେ ତାଲିକାଭୁକ୍ତ କରିଥିବା ବୃତ୍ତି ଆଧାରରେ ବିଚାର କରାଯାଇଛି। ଏହି ବୃତ୍ତିଗୁଡ଼ିକ ମଧ୍ୟରେ ଅଭିନେତା/ଅଭିନେତ୍ରୀ, ଗାୟକ-ଅଭିନେତା, କଳାକାର, କ୍ରୀଡ଼ାବିତ୍, ନିର୍ଦ୍ଦେଶକ, ଲୋକଗାୟକ ଏବଂ ଏହି ବୃତ୍ତିର ଅନ୍ୟାନ୍ୟ ଭିନ୍ନତା ଅନ୍ତର୍ଭୁକ୍ତ। ବିଦାୟୀ ଲୋକସଭାରେ ଅଧିକାଂଶ ସେଲିବ୍ରିଟି ସାଂସଦଙ୍କ ମଧ୍ୟରୁ ବିଜେପିର ୧୦ଜଣ ହୋଇଥିବାବେଳେ ୫ ଜଣ ସାଂସଦ ଟିଏମସିର ଓ ବିଜେଡିର ଜରେ ରହିଛନ୍ତି।
ପିଆରଏସ୍ ଲେଜିସ୍ଲେଟିଭ୍ ରିସର୍ଚ୍ଚର ଏକ ରିପୋର୍ଟ ଅନୁଯାୟୀ, ଏହି ଲୋକସଭାରେ ମୋଟ ୨୭୪ଟି ବୈଠକ ଅନୁଷ୍ଠିତ ହୋଇଥିଲା, ଯାହା କି ପୂରା ପାଞ୍ଚ ବର୍ଷର କାର୍ଯ୍ୟକାଳ ପାଇଁ ସର୍ବନିମ୍ନ ସଂଖ୍ୟା। ମାତ୍ର ୪ଟି ଲୋକସଭାରେ କମ୍ ବୈଠକ ବସିଥିଲେ ହେଁ କାର୍ଯ୍ୟକାଳ ପୂରା ହେବା ପୂର୍ବରୁ ସେସବୁକୁ ଭଙ୍ଗ କରି ଦିଆଯାଇଥିଲା। କୋଭିଡ୍-୧୯ ମହାମାରୀ ସଂସଦର ସିଟିଂ ସଂଖ୍ୟାକୁ ପ୍ରଭାବିତ କରିଥିଲା। ୨୦୨୦ରେ ସଂସଦ ମାତ୍ର ୩୩ ଦିନ ଚାଲିଥିଲା।
କମ୍ ଉପସ୍ଥାନ
ପିଆରଏସ ଲେଜିସ୍ଲେଟିଭ୍ ରିସର୍ଚ୍ଚଦ୍ୱାରା ସଂକଳିତ ତଥ୍ୟର ବିଶ୍ଳେଷଣରୁ ଜଣାପଡ଼ିଛି ଯେ ସେଲିବ୍ରିଟି ସାଂସଦମାନଙ୍କର ହାରାହାରି ୫୬.୭% ଉପସ୍ଥାନ ଥିଲା। ଏହା ସମସ୍ତ ସାଂସଦଙ୍କ ହାରାହାରି ୭୯% ତୁଳନାରେ କମ୍। ବିଜେପିର ୧୯ଜଣ ସେଲିବ୍ରିଟି ସାଂସଦଙ୍କ ମଧ୍ୟରୁ ମାତ୍ର ୪ ଜଣଙ୍କ ଉପସ୍ଥିତି ଜାତୀୟ ହାରାହାରିଠାରୁ ଅଧିକ ଥିଲା।
ଭୋଜପୁରୀ ଅଭିନେତା ଦିନେଶ ଲାଲ ଯାଦବ ନିରାହୁଆଙ୍କ ଉପସ୍ଥିତି ୯୦% ଥିଲା। ବଙ୍ଗଳା ଅଭିନେତ୍ରୀ ଲକେଟ୍ ଚାଟାର୍ଜୀ୮୮%, ଭୋଜପୁରୀ ଅଭିନେତା ମନୋଜ ତିୱାରୀଙ୍କ ୮୫% ଏବଂ ସୁଟିଂରେ ଅଲିମ୍ପିକ୍ସ ପଦକ ବିଜେତା ଏବଂ ଭାରତୀୟ ସେନାର ଜଣେ ଅବସରପ୍ରାପ୍ତ କର୍ଣ୍ଣେଲ ରାଜ୍ୟବର୍ଦ୍ଧନ ରାଠୋରଙ୍କର ୮୦% ଥିଲା। ବଙ୍ଗଳା ଅଭିନେତା ଦୀପକ (ଦେବ) ଅଧିକାରୀଙ୍କ ଉପସ୍ଥିତି ସର୍ବନିମ୍ନ ୧୨% ଥିବାବେଳେ ଷୋଡ଼ଶ ଲୋକସଭାରେ ଏହା ୧୧% ଥିଲା। ଓଡ଼ିଆ ଚଳଚ୍ଚିତ୍ର ତାରକା ତଥା ସାଂସଦ ଅନୁଭବ ମହାନ୍ତିଙ୍କ ଉପସ୍ଥାନ ୭୬% ରହିଛି।
ଏହି ତାଲିକାରେ ହିନ୍ଦୀ ଅଭିନେତା ଅଜୟ ସିଂ ଦେଓଲ ଓରଫ ସନ୍ନି ଦେଓଲ ୧୭%, ବଙ୍ଗଳା ଅଭିନେତ୍ରୀ ତଥା ଗାୟିକା ମିମି ଚକ୍ରବର୍ତ୍ତୀ ୨୧%, ବଙ୍ଗଳା ଅଭିନେତ୍ରୀ ନୁସରତ ଜାହାଁ ରୁହି ୩୯%, ଗାୟକ ହଂସରାଜ ହଂସ ୩୯%, ହିନ୍ଦୀ ଅଭିନେତ୍ରୀ କିରଣ ଖେର ୪୭% ଏବଂ ଅଭିନେତ୍ରୀ ହେମା ମାଳିନୀ ୫୦% ଓ ପୂର୍ବତନ ଭାରତୀୟ କ୍ରିକେଟର ଗୌତମ ଗମ୍ଭୀରଙ୍କ ଉପସ୍ଥାନ ୬୧% ରହିଛି।
ବିତର୍କରେ ଅଂଶଗ୍ରହଣ
ମୋଟାମୋଟି ଭାବେ ସେଲିବ୍ରିଟି ସାଂସଦମାନେ କିଛି ବିତର୍କ ଓ ଆଲୋଚନାରେ ଭାଗ ନେଇଥିଲେ। ସେଲିବ୍ରିଟି ସାଂସଦଙ୍କ ମଧ୍ୟରେ ଓଡ଼ିଆ ଅଭିନେତା ଅନୁଭବ ମହାନ୍ତି ସର୍ବାଧିକ ୮୨% ବିତର୍କରେ ଭାଗ ନେଇଥିବାବେଳେ ଭୋଜପୁରୀ ଅଭିନେତା ତଥା ଗାୟକ ରବି କିଶନ ୮୧% ସହ ଦ୍ୱିତୀୟ ସ୍ଥାନରେ ରହିଛନ୍ତି। ଲକେଟ ଚାଟାର୍ଜୀ ୪୩ % ତୃତୀୟ ସ୍ଥାନରେ ଅଛନ୍ତି। ହିନ୍ଦୀ ଅଭିନେତା ଦେଓଲ ଓ ସିହ୍ନା କୌଣସି ବିତର୍କରେ ଭାଗ ନେଇନଥିଲେ। ଅଧିକାରୀ ଗୋଟିଏ ବିତର୍କରେ ଭାଗ ନେଇଥିବା ବେଳେ ଗମ୍ଭୀର ଓ ହଂସ ଯଥାକ୍ରମେ ୩ ଓ ୪ଟି ବିତର୍କରେ ଭାଗ ନେଇଥିଲେ।
ପ୍ରଶ୍ନ ପଚାରିବା
ସପ୍ତଦଶ ଲୋକସଭାରେ ସାଂସଦମାନେ ହାରାହାରି ୨୧୦ଟି ଲେଖାଏଁ ପ୍ରଶ୍ନ ପଚାରିଥିଲେ। ୧୯ ଜଣ ସେଲିବ୍ରିଟି ସାଂସଦଙ୍କ ମଧ୍ୟରୁ ମାତ୍ର ୪ ଜଣ ଜାତୀୟ ହାରାହାରିଠାରୁ ଅଧିକ ବା ଅଧିକ ପଚାରିଥିଲେ। ରବି କିଶନ ୪୮୦ଟି, ତିୱାରୀ ୩୯୫ଟି, ଲକେଟ ଚାଟାର୍ଜୀ ୨୯୫ଟି ଏବଂ ସୁମଲତା ଅମ୍ବରୀଶ ୨୧୦ଟ ଓ ଅନୁଭବ ମହାନ୍ତି ୧୬୮ଟି ପ୍ରଶ୍ନ ପଚାରିଛନ୍ତି।
ଶତ୍ରୁଘ୍ନ ସିହ୍ନା କୌଣସି ପ୍ରଶ୍ନ ପଚାରି ନ ଥିଲାବେଳେ ବଙ୍ଗୀୟ ଅଭିନେତ୍ରୀ-ନିର୍ଦ୍ଦେଶକ ସତବଦି ରାୟ ବାନାର୍ଜୀ ଗୋଟିଏ ପ୍ରଶ୍ନ ପଚାରିଲେ, ଲୋକକଣ୍ଠଶିଳ୍ପୀ ମହମ୍ମଦ ସାଦିକ ଦୁଇଟିୁ ପ୍ରଶ୍ନ ପଚାରିଲେ ଏବଂ ସନ୍ନି ଦେଓଲ ୪ଟି ପ୍ରଶ୍ନ ପଚାରିଥିଲେ। ଏହାବ୍ୟତୀତ ସଂସଦରେ ମାତ୍ର ୪ ଜଣ ସେଲିବ୍ରିଟି ସାଂସଦ ଘରୋଇ ବିଲ୍ ଉପସ୍ଥାପନ କରିଥିଲେ। ରବି କିଶନ ୧୦ଟି ବିଲ୍, ଅନୁଭବ ମହାନ୍ତି ୩ଟି ବିଲ୍, ଲକେଟ୍ ଚାଟାର୍ଜୀ ୨ଟି ବିଲ୍ ଏବଂ ଗୌତମ ଗମ୍ଭୀର ଗୋଟିଏ ବିଲ୍ ଆଣିଛନ୍ତି।