ନୂଆଦିଲ୍ଲୀ: ଭାରତ ଏବଂ ଆର୍ମେନିଆ ମଧ୍ୟରେ ସମ୍ପର୍କ କ୍ରମାଗତ ଭାବେ ମଜବୁତ ହେଉଛି। ଭାରତ ଆର୍ମେନିଆକୁ ଅସ୍ତ୍ର ଯୋଗାଉଛି, ଯେଉଁଥିପାଇଁ ଆର୍ମେନିଆର ମୁଖ୍ୟ ଶତ୍ରୁ ଆଜେରବାଇଜାନ ଫ୍ରାନ୍ସ ଏବଂ ଗ୍ରୀସ୍ ସହିତ ଭାରତ ଉପରେ କ୍ରୋଧିତ ହୋଇଛନ୍ତି। ଆଜେରବାଇଜାନ ପାକିସ୍ତାନର ଭଲ ବନ୍ଧୁ, ଯାହା କାଶ୍ମୀର ପ୍ରସଙ୍ଗରେ ପାକିସ୍ତାନ ସହ ଛିଡା ହୋଇଥିବାବେଳେ ଆର୍ମେନିଆ କାଶ୍ମୀର ପ୍ରସଙ୍ଗରେ ଭାରତ ସହ ଛିଡା ହୋଇଛି। ଆଜେରବାଇଜାନର ରାଷ୍ଟ୍ରପତି ଇଲହାମ ଅଲିୟେଭ କହିଛନ୍ତି ଯେ, ଆଜେରବାଇଜାନ ବିରୋଧରେ ଥିବା ଆର୍ମେନିଆକୁ ଭାରତ, ଫ୍ରାନ୍ସ ଏବଂ ଗ୍ରୀସ ଅସ୍ତ୍ର ଯୋଗାଉଛନ୍ତି। ଅଲିୟେଭ କହିଛନ୍ତି ଯେ, ଏଭଳି ପରିସ୍ଥିତିରେ ଆମେ ଚୁପ ବସିବୁ ନାହିଁ।
ଏକ ବିଶ୍ୱବିଦ୍ୟାଳୟର ସମ୍ମିଳନୀକୁ ସମ୍ବୋଧିତ କରି ଇଲହାମ ଅଲିୟେଭ କହିଛନ୍ତି ଯେ, ‘ଯେତେବେଳେ ଭାରତ, ଫ୍ରାନ୍ସ ଏବଂ ଜର୍ମାନୀ ଆମ ବିରୁଦ୍ଧରେ ଆର୍ମେନିଆକୁ ଅସ୍ତ୍ର ଦିଅନ୍ତି ଆମେ ଚୁପ୍ ରହିବୁ ନାହିଁ। ସେମାନେ ଖୋଲାଖୋଲି ଭାବରେ ଏହା କରୁଛନ୍ତି।
ଅନ୍ୟପକ୍ଷରେ, ଆର୍ମେନିଆ ଭାରତ ସହ ସମ୍ପର୍କକୁ ରଣନୀତିକ ଭାଗିଦାରୀରେ ବିସ୍ତାର କରିବାକୁ ଇଚ୍ଛା ପ୍ରକାଶ କରିଛି। ଆର୍ମେନିଆର ଶ୍ରମ ମନ୍ତ୍ରୀ କହିଛନ୍ତି ଯେ ‘ଆମର ସମ୍ପର୍କ ଆଜି ଏପରି ସ୍ତରରେ ପହଞ୍ଚିଛି ଯେ ସେମାନଙ୍କୁ ରଣନୀତିକ ଭାଗିଦାରୀ ଭାବରେ ପରିଭାଷିତ କରାଯାଇପାରିବ। ମୋର ଆଶା ଯେ ଆମର ବୈଦେଶିକ ମନ୍ତ୍ରୀ ନିଶ୍ଚିତ ଭାବରେ ଏ ବିଷୟରେ କିଛି ଆଲୋଚନା କରିବେ।
ବାସ୍ତବରେ, ଗତ ବର୍ଷ ଏକ ରିପୋର୍ଟ ଆସିଥିଲା ଯେ ଭାରତ ବ୍ୟତୀତ ଫ୍ରାନ୍ସ ମଧ୍ୟ ଆର୍ମେନିଆକୁ ଅସ୍ତ୍ର ପଠାଇବ, ଆଜେରବାଇଜାନ ଏହା ଉପରେ ଆପତ୍ତି ଉଠାଇଥିଲା। ଆଜେରବାଇଜାନ କହିଛି ଯେ, ଯଦି ଫ୍ରାନ୍ସ ଏହି ଉପାୟରେ ଅସ୍ତ୍ର ପ୍ରଦାନ କରେ ତେବେ ଦକ୍ଷିଣ କାକାଶସରେ ହିଂସା ବୃଦ୍ଧି ପାଇପାରେ। ଏବେ ପୁଣି ଥରେ ଆଜେରବାଇଜାନର ରାଷ୍ଟ୍ରପତି ଇଲହାମ ଅଲିଏଭ ଏକ ଧମକପୂର୍ଣ୍ଣ ବିବୃତ୍ତି ଦେଇଛନ୍ତି। ଅଲିଏଭ ସ୍ପଷ୍ଟ କରିଛନ୍ତି ଯେ, ଯଦି ଆଜେରବାଇଜାନ କୌଣସି ବିପଦ ଅନୁଭବ କରୁଛି, ତେବେ ଆର୍ମେନିଆ ଏବଂ ଏହାର ସହଯୋଗୀ ଦେଶ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଉଭୟ ଆର୍ମେନିଆ ଏବଂ ଆଜେରବାଇଜାନ ସହ ଭାରତର କୂଟନୈତିକ ସମ୍ପର୍କ ରହିଛି। ମଧ୍ୟ ଏସିଆ ଏବଂ ଇରାନ ଦେଇ ରୁଷ ଏବଂ ୟୁରୋପ ପର୍ଯ୍ୟନ୍ତ ଯିବା ପାଇଁ ଏହି ଅଞ୍ଚଳ ଭାରତ ପାଇଁ ଗୁରୁତ୍ୱପୂର୍ଣ୍ଣ। ୨୦୨୨ ମସିହାରେ, ଭାରତ ଆର୍ମେନିଆକୁ ପିନାକା ମଲ୍ଟି ବ୍ୟାରେଲ୍ ରକେଟ୍ ଲଞ୍ଚର୍, ଆଣ୍ଟି ଟ୍ୟାଙ୍କ୍ ଅସ୍ତ୍ରଶସ୍ତ୍ର ଏବଂ ଗୁଳି ଯୋଗାଇବା ପାଇଁ ୨୫୦ମିଲିୟନ୍ ଟଙ୍କା ମୂଲ୍ୟର ଚୁକ୍ତି ସ୍ୱାକ୍ଷର କରିଥିଲା।
