ଭୁବନେଶ୍ବର: ଆଇଏଏସ ଚାକିରୀରୁ ସ୍ବେଚ୍ଛାକୃତ ଅବସର ନେଲେ ସୁଜାତା କାର୍ତ୍ତିକେୟନ ପାଣ୍ଡିଆନ। ସେ ହେଉଛନ୍ତି ଚର୍ଚ୍ଚିତ ନେତା ଭି କେ ପାଣ୍ଡିଆନଙ୍କ ଧର୍ମପତ୍ନୀ। ତେବେ ସୁଜାତା ହଠାତ କାହିଁକି ଚାକିରୀ ଛାଡିଲେ ସେ ନେଇ ବିଭିନ୍ନ ମହଲରେ ଚର୍ଚ୍ଚା ଚାଲିଛି। ତାଙ୍କ ଚାକିରୀରେ ବର୍ତ୍ତମାନ କୌଣସି ଅସୁବିଧା ନ ଥିଲେ ମଧ୍ୟ ସେ କାହିଁକି ଅବସର ନେଲେ। ସୁଜାତା ବର୍ତ୍ତମାନ ଅର୍ଥ ବିଭାଗର ସ୍ବତନ୍ତ୍ର ସଚିବ ଅଛନ୍ତି।
ଗତ ନିର୍ବାଚନରେ ସୁଜାତା କାର୍ତ୍ତିକେୟନଙ୍କୁ ନେଇ ବେଶ ଚର୍ଚ୍ଚା ଚାଲିଥିଲା। ଏପରିକି ସେ ମିଶନ ଶକ୍ତି ବିଭାଗର ମୁଖ୍ୟ ଭାବରେ ମହିଳାମାନଙ୍କୁ ବିଜେଡିର କାମ କରିବା ପାଇଁ କହୁଥିଲେ ବୋଲି ବିଜେପି ଅଭିଯୋଗ କରିଥିଲା। ସେହି ଆଧାରରେ ସେତେବେଳେ ତାଙ୍କୁ ନିର୍ବାଚନ କମିଶନର ବଦଳି କରିବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ। ଫଳରେ ସେତେବେଳେ ସେ ସେହି ଅର୍ଥ ବିଭାଗରେ କାମ କରିବା ପାଇଁ କୁହାଯାଇଥିଲା।
ଏହାପରେ ବିଜେପି ସରକାର ଆସିବା ପରେ ସୁଜାତା ଝିଅ ପରୀକ୍ଷା ପାଇଁ ଛଅ ମାସ ଛୁଟି ପାଇଁ ଆବେଦନ କରିଥିଲେ। ସରକାର ତାଙ୍କୁ ଛୁଟି ମଧ୍ୟ ମଂଜୁରୀ କରିଥିଲେ। ଛୁଟି ସରିବା ପରେ ପୁଣି ସେ ଆଉ ଅଧିକ ଦିନ ରହିବା ପାଇଁ ଚାହିଁଥିଲେ। ହେଲେ ରାଜ୍ୟ ସରକାର ତାଙ୍କୁ ତୁରନ୍ତ ଯୋଗ ଦେବା ପାଇଁ ନିର୍ଦ୍ଦେଶ ଦେଲେ। ସେହି ଅନୁସାରେ ସୁଜାତା ସେହି ଅର୍ଥ ବିଭାଗରେ କାର୍ଯ୍ୟ କରୁଛନ୍ତି।
ସେଠାରେ ତାଙ୍କର କୌଣସି ଅସୁବିଧା ନ ହେଉଥିବା ବେଳେ ଆଇଏଏସ ପରି ଚାକିରୀ ଛାଡିବା ପଛରେ କଣ ରହସ୍ୟ ତାହା ଆଲୋଚନା ଚାଲିଛି। ପୂର୍ବରୁ ତାଙ୍କର ସ୍ବାମୀ ଭି କେ ପାଣ୍ଡିଆନ ଆଇଏଏସ ଚାକିରୀ ଛାଡି ବିଜେଡିରେ ଯୋଗ ଦେଇଥିଲେ। 2024 ନିର୍ବାଚନର ବିଜେଡି ମଙ୍ଗ ସେ ସମ୍ଭାଳିଥିଲେ। ହେଲେ ବିଜେପିର ଓଡିଆ ଅସ୍ମିତା ସ୍ଲୋଗାନ ଓଡିଶା ଭୋଟରଙ୍କୁ ଧରିଥିଲା। ପାଣ୍ଡିଆନ ତାମିଲରୁ ଆସି ଓଡିଶାର ରାଜନୀତି କାହିଁକି କରିବେ ବୋଲି ପ୍ରଶ୍ନ ସୃଷ୍ଟି ହେଲା। ଫଳରେ ବିଜେଡି ଏକ ବଡ ବିପର୍ଯ୍ୟୟର ସମ୍ମୁଖୀନ ହେଲା।
ଠିକ୍ ସେହିପରି ସୁଜାତା ଆଇଏଏସରୁ ଅବସର ନେବା ପରେ ବିଭିନ୍ନ ମହଲରେ ଆଲୋଚନା ଆରମ୍ଭ ହୋଇଯାଇଛି। ତାହା ହେଲା ଯେ, ସୁଜାତା କଣ ବିଜେଡିରେ ଯୋଗ ଦେବେ କି ? ଓଡିଆ ଝିଅ ସୁଜାତା କଣ ବିଜେଡିର ମଙ୍ଗ ଧରିବେ କି। ଏହିପରି ବିଭିନ୍ନ ପ୍ରଶ୍ନ ଉଠିବାରେ ଲାଗିଛି। ତେବେ ଏ ନେଇ ନା ବିଜେଡି ନା ସୁଜାତା ପାଣ୍ଡିଆନଙ୍କ ପକ୍ଷରୁ କୌଣସି ସୂଚନା ଦିଆଯାଇ ନାହିଁ।
