ଭୁବନେଶ୍ବର: ଆଜି ନବମ ଥର ପାଇଁ ବିଜେଡିର ସଭାପତି ହେଲେ ନବୀନ ପଟ୍ଟନାୟକ। ଆଜି ଦଳର ସଭାପତି ପଦ ପାଇଁ ନିର୍ବାଚନ ଥିଲା। ଏଥିରେ ଏକମାତ୍ର ପ୍ରାର୍ଥୀ ଭାବେ ନବୀନ ପଟ୍ଟନାୟକ ନାମାଙ୍କନ ଦାଖଲ କରିଥିଲେ। ଫଳରେ ଆଜି ବିଜେଡି ବୈଠକରେ ନବୀନ ସଭାପତି ବୋଲି ଘୋଷଣା କରାଯାଇଛି।
ଏହାପରେ ଶଙ୍ଖ ଭବନରେ ନବୀନଙ୍କୁ ଦଳୀୟ ନେତାମାନେ ସ୍ବାଗତ କରିଥିଲେ। ପୁରୀର ନେତାମାନେ ଖଣ୍ଡୁଆ ପାଟ ଦେଇ ଅଭିନନ୍ଦନ କରିଥିଲେ। ସେହିପରି ଅନ୍ୟ ନେତାମାନେ ଫୁଲ ତୋଡା ଦେଇ ନବୀନଙ୍କୁ ସ୍ବାଗତ କରିଥିଲେ। ଆଜି ଶଙ୍ଖ ଭବନରେ ଆୟୋଜିତ ବୈଠକରେ ବହୁ ନେତା ଓ କର୍ମି ଯୋଗ ଦେଇ ନବୀନଙ୍କ ଜୟ ଜୟକାର କରିଥିଲେ।
ତେବେ ନବମ ଥର ପାଇଁ ସଭାପତି ହେବା ପରେ ନବୀନ ତାଙ୍କର ଅଭିଭାଷଣ ରଖିଥିଲେ। ସେ କହିଥିଲେ ଯେ, ବିଜେଡି ଶାସନ ରେ ଓଡିଶାର ଏକ ସୁବର୍ଣ୍ଣ ଯୁଗ ଥିଲା। ବିଜେଡି ଶାସନରେ ଥାଉ କିମ୍ବା ନ ଥାଉ ଆମେ ସବୁବେଳେ ଲୋକଙ୍କ ସେବାକୁ ଜାରୀ ରଖିବୁ। ବିଜେଡିକୁ କେହି ନିଚା ଭାବିବା ଅନୁଚିତ ବୋଲି ନବୀନ କହିଥିଲେ।
ଆମ ସମୟର ଓଡିଶା ବର୍ତ୍ତମାନ ଅନ୍ୟ ରାଜ୍ୟ ପାଇଁ ରୋଲ ମଡେଲ ସାଜିଛି। ସେମାନଙ୍କ ପାଇଁ ଆମ ଶାସନ ଆଦର୍ଶ ପାଲଟିଛି। ଆମ ଦଳ ଏକାଠି ରହିଛି ଆଉ ନେତାମାନେ ସବୁବେଳେ ସକ୍ରିୟ ଅଛନ୍ତି। ଆମର ନୀତି ଓ ଆଦର୍ଶ ହେଉଛି ଆମର ଶକ୍ତି। ଏହାକୁ ପାଥେୟ କରି ଆମେ ଲୋକଙ୍କ ସେବା କରିବା ବୋଲି ନବୀନ ନେତା ଓ କର୍ମିମାନଙ୍କୁ କହିଥିଲେ।
ସେ କହିଥିଲେ ଯେ, ଚାଷୀ ମହିଳା ଆଉ ଯୁବ ସମାଜ ସମସ୍ତଙ୍କ ପାଇଁ କାମ କରିବା ଆମର ଲକ୍ଷ୍ୟ। ଆମେ ସବୁବେଳେ ଓଡିଶାର ହକ ପାଇଁ ଲଢେଇ କରୁଥିଲୁ। ଆଜି ମଧ୍ୟ ସେହି ହକ ପାଇଁ ଲଢେଇ ଜାରୀ ରହିଛି। ଓଡିଶାର ସ୍ବାର୍ଥ ଆଉ ଓଡିଆଙ୍କ ସ୍ବାଭିମାନ ହେଉଛି ଆମର ପ୍ରାଥମିକତା। ତା ଉପରେ ସମସ୍ତେ ଧ୍ୟାନ ଦେବା ଆବଶ୍ୟକ।
ବିଜେପି ମିଛ ପ୍ରଚାର କରି ଶାସନକୁ ଆସିଛି। ସାମାଜିକ ଗଣମାଧ୍ୟମରେ ବିଜେପି ମିଛ କହି ଲୋକଙ୍କୁ ଭୁଆଁ ବୁଲାଇଛି। ଆମର ସାମାଜିକ ଗଣମାଧ୍ୟମ ତାହାକୁ ସଠିକ ଭାବେ ଜବାବ ଦେଇପାରିଲା ନାହିଁ। ସେଥିପାଇଁ ଆମେ ହାରିଲୁ। ହେଲେ ଓଡିଶାର ଜନସାଧାରଣ ଆମକୁ ଅଧିକ ପସନ୍ଦ କରିଛନ୍ତି। ବିଜେପିର ଏହି ମିଛ ପ୍ରଚାରକୁ ଆମ ବିଜେଡି କର୍ମିମାନେ ଉଚିତ ଜବାବ ଦେବେ ବୋଲି ନବୀନ ଆହ୍ବାନ ଦେଇଥିଲେ।