ଦକ୍ଷିଣ ଭାରତର ରାଜନୀତିରେ ଏକ ବଡ଼ ପରିବର୍ତ୍ତନର ସଙ୍କେତ ଦେଇ ପୂର୍ବତନ ତାମିଲନାଡୁ ବିଜେପି ସଭାପତି କେ. ଅନ୍ନାମଲାଇ ଶୁକ୍ରବାର ନିଜର ନୂତନ ରାଜନୈତିକ ଦଳ “We The Leaders” ର ଶୁଭାରମ୍ଭ କରିଛନ୍ତି। ବିଜେପିରୁ ଆନୁଷ୍ଠାନିକ ଭାବେ ଇସ୍ତଫା ଦେବାର କିଛି ଘଣ୍ଟା ପରେ ଏହି ଘୋଷଣା ହୋଇଥିବାବେଳେ, ନୂତନ ଦଳ ପ୍ରତି ଲୋକଙ୍କ ଆଗ୍ରହ ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି।
ଦଳର ସୂଚନା ଅନୁଯାୟୀ, ଶୁଭାରମ୍ଭ ହେବାର କେବଳ କିଛି ଘଣ୍ଟା ମଧ୍ୟରେ ୯ ଲକ୍ଷରୁ ଅଧିକ ଲୋକ ଏହି ଆନ୍ଦୋଳନ ସହ ଯୋଡ଼ି ହୋଇଥିବା ବେଳେ, ହଜାର ହଜାର ସ୍ୱେଚ୍ଛାସେବକ ଓ ତୃଣମୂଳ ସ୍ତରର ନେତାମାନେ ମଧ୍ୟ ସମର୍ଥନ ଜଣାଇଛନ୍ତି। ଏହାକୁ ଅନ୍ନାମଲାଇଙ୍କ ବ୍ୟକ୍ତିଗତ ଲୋକପ୍ରିୟତା ଓ ବିକଳ୍ପ ରାଜନୀତି ପ୍ରତି ବଢ଼ୁଥିବା ଆକର୍ଷଣର ପ୍ରତିଫଳନ ବୋଲି ବିଶ୍ଳେଷକମାନେ ମନେ କରୁଛନ୍ତି।
ନୂତନ ଦଳର ଘୋଷଣା କରି ଅନ୍ନାମଲାଇ କହିଛନ୍ତି ଯେ, ତାଙ୍କର ଲକ୍ଷ୍ୟ ହେଉଛି ରାଜନୀତିକୁ ପୁଣିଥରେ ସାଧାରଣ ଲୋକଙ୍କ ନିକଟକୁ ନେଇଯିବା। ଶିକ୍ଷା, ସ୍ୱାସ୍ଥ୍ୟ, ପରିବେଶ-ସ୍ଥାୟୀତ୍ୱ ଏବଂ ଯୁବ ନେତୃତ୍ୱକୁ କେନ୍ଦ୍ର କରି ଏହି ଆନ୍ଦୋଳନ ଆଗକୁ ବଢ଼ିବ ବୋଲି ସେ ସ୍ପଷ୍ଟ କରିଛନ୍ତି।
ସୋସିଆଲ ମିଡିଆରେ ଦଳର ଆରମ୍ଭ ସମୟରେ ସେ ଲେଖିଥିଲେ, “ଆସନ୍ତୁ ଆଗକୁ ବଢ଼ିବା, ପଦକ୍ଷେପ ନେବା ଏବଂ ପରିବର୍ତ୍ତନ ଆଣିବା।” ଏହି ବାର୍ତ୍ତା ମାଧ୍ୟମରେ ସେ ଯୁବପିଢ଼ି ଓ ସଚେତନ ନାଗରିକଙ୍କୁ ନୂତନ ରାଜନୈତିକ ପ୍ରୟାସରେ ସାମିଲ ହେବାକୁ ଆହ୍ୱାନ କରିଛନ୍ତି।
ବିଜେପିର ମୁଖ୍ୟ ଚେହେରା ଭାବେ ଦୀର୍ଘଦିନ ଧରି ତାମିଲନାଡୁରେ କାମ କରିଥିବା ଅନ୍ନାମଲାଇଙ୍କ ଏହି ନୂତନ ପଦକ୍ଷେପ ରାଜ୍ୟ ରାଜନୀତିରେ ନୂଆ ସମୀକରଣ ସୃଷ୍ଟି କରିପାରେ। ବିଶେଷକରି ଯୁବ ଭୋଟର ଏବଂ ପାରମ୍ପରିକ ଦଳଗୁଡ଼ିକୁ ବିକଳ୍ପ ଖୋଜୁଥିବା ମତଦାତାଙ୍କ ମଧ୍ୟରେ ଏହା କେତେ ପ୍ରଭାବ ପକାଇବ, ତାହା ଆଗାମୀ ଦିନରେ ସ୍ପଷ୍ଟ ହେବ।
ଅନ୍ନାମଲାଇଙ୍କ ନୂତନ ଆନ୍ଦୋଳନର ମୂଳ ଭିତ୍ତି ହେଉଛି “Conscious Constituency Approach” ବା ସଚେତନ ନିର୍ବାଚନ ମଣ୍ଡଳୀ ଆଭିମୁଖ୍ୟ। ଏହା ମାଧ୍ୟମରେ ପ୍ରଯୁକ୍ତି-ନିର୍ଭର ଶାସନ ଓ ତୃଣମୂଳ ସ୍ତରର ଜନଅଂଶଗ୍ରହଣକୁ ଏକାଠି କରାଯିବାର ଲକ୍ଷ୍ୟ ରହିଛି।
ଦଳର ଦୃଷ୍ଟିକୋଣ ଅନୁସାରେ, ନେତୃତ୍ୱ କେବଳ ନିର୍ବାଚନ ଜିତିବାରେ ସୀମିତ ନ ରହି ସମାଜ ସହ ସିଧାସଳଖ ସଂଯୋଗ, ତଥ୍ୟ-ଭିତ୍ତିକ ନିଷ୍ପତ୍ତି ଓ ଜବାବଦେହୀ ଶାସନ ବ୍ୟବସ୍ଥାକୁ ପ୍ରୋତ୍ସାହନ ଦେବ।
ଅନ୍ନାମଲାଇ ପୂର୍ବରୁ ଘୋଷଣା କରିଥିଲେ ଯେ, ତାଙ୍କର ଏହି ଆନ୍ଦୋଳନ A. P. J. Abdul Kalamଙ୍କ ଆଦର୍ଶରୁ ପ୍ରେରିତ ହୋଇ କୋଏମ୍ବାଟୁରରେ ଏକ ନୈତିକ ଓ ଜନକେନ୍ଦ୍ରିକ ରାଜନୀତିକ ମଞ୍ଚ ଭାବେ ବିକଶିତ ହେବ। ଏହା ମାଧ୍ୟମରେ ମୂଲ୍ୟବୋଧ, ସେବା ଏବଂ ଦାୟିତ୍ୱବୋଧ ଆଧାରିତ ନେତୃତ୍ୱ ଗଢ଼ି ତୋଳିବାର ପ୍ରୟାସ କରାଯିବ।
ଦଳର ଆରମ୍ଭକୁ ମିଳିଥିବା ପ୍ରାରମ୍ଭିକ ସମର୍ଥନ ଉତ୍ସାହଜନକ ହୋଇଥିଲେ ମଧ୍ୟ, ଏହାକୁ ଏକ ସୁଦୃଢ଼ ରାଜନୈତିକ ଶକ୍ତିରେ ପରିଣତ କରିବା ଅନ୍ନାମଲାଇଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ। ତଥାପି, ତାମିଲନାଡୁରେ ବିକଳ୍ପ ରାଜନୀତିର ଏକ ନୂଆ ଅଧ୍ୟାୟ ଆରମ୍ଭ ହୋଇଥିବା ନେଇ ଏବେ ଚର୍ଚ୍ଚା ଜୋର ଧରିଛି।