ନୂଆଦିଲ୍ଲୀ: ତୁର୍କୀର ଇସ୍ତାନବୁଲ୍ ଉପକୂଳସ୍ଥିତ ମାରମାରା ସମୁଦ୍ରରେ ଏକ ଭୟଙ୍କର ଜାହାଜ ଦୁର୍ଘଟଣା ଘଟିଛି। ଏକ ମାଲବାହୀ କାର୍ଗୋ ସିପ୍ ଅନ୍ୟ ଏକ ଟ୍ୟାଙ୍କର ସହ ମୁହାଁମୁହିଁ ଧକ୍କା ହେବା ପରେ ମାତ୍ର ୧୧ ମିନିଟ୍ ମଧ୍ୟରେ ସମୁଦ୍ରରେ ବୁଡ଼ିଯାଇଛି। ଏହି ଅଘଟଣ ପରେ ଜାହାଜରେ ଥିବା କ୍ୟାପଟେନ୍ଙ୍କ ସମେତ ୧୦ ଜଣ ନାବିକ (କ୍ରିୟୁ ସଦସ୍ୟ) ନିଖୋଜ ଅଛନ୍ତି। ସେମାନଙ୍କୁ ଉଦ୍ଧାର କରିବା ପାଇଁ ବ୍ୟାପକ ସନ୍ଧାନ ଓ ଉଦ୍ଧାର ଅଭିଯାନ ଜାରି ରହିଛି। ତୁର୍କୀର ପରିବହନ ମନ୍ତ୍ରୀ ଆବଦୁଲକାଦିର ଉରାଲୋଗ୍ଲୁ ଏବଂ ଇସ୍ତାନବୁଲ୍ ରାଜପାଳଙ୍କ କାର୍ଯ୍ୟାଳୟ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ବୁଧବାର ଭୋର ପ୍ରାୟ ୩ଟା ୧୫ ମିନିଟ୍ରେ ଇସ୍ତାନବୁଲର ସିଲିଭ୍ରି ଉପକଣ୍ଠରୁ ପ୍ରାୟ ୨୦ ମାଇଲ (୩୨ କିଲୋମିଟର) ଦୂର ମାରମାରା ସମୁଦ୍ରରେ ଏହି ଦୁର୍ଘଟଣା ଘଟିଥିଲା। ୯୦ ମିଟର (୨୯୫ ଫୁଟ) ଲମ୍ବର ତୁର୍କୀ କାର୍ଗୋ ସିପ୍ ତୁଗବର୍କ ଇମାମୋଗ୍ଲୁ ରୋଲ୍ଡ ଷ୍ଟିଲ୍ ବୋଝେଇ କରି ଭୂମଧ୍ୟସାଗରୀୟ ବନ୍ଦର ‘ଇସ୍କେନ୍ଦରୁନ୍’ରୁ କୃଷ୍ଣସାଗରର ଏରେଗ୍ଲି ଆଡ଼କୁ ଯାଉଥିଲା।
ଏହି ସମୟରେ ଇସ୍ତାନବୁଲର ପୂର୍ବରେ ଥିବା କୋସାଏଲିରୁ ଏଜିୟାନ୍ ଉପକୂଳର ଆଲିଆଗା ଆଡ଼କୁ ଗତି କରୁଥିବା ୯୧ ମିଟର (୨୯୮ ଫୁଟ) ଲମ୍ବର ଅନ୍ୟ ଏକ ତୁର୍କୀ ପତାକାବାହୀ ଟ୍ୟାଙ୍କର ଅଲସୁ ସହିତ ତୁଗବର୍କ ଇମାମୋଗ୍ଲୁର ମୁହାଁମୁହିଁ ଧକ୍କା ହୋଇଥିଲା। ଦୁର୍ଘଟଣା ପରେ ସକାଳ ୩ଟା ୨୬ ମିନିଟ୍ରେ ଜରୁରୀକାଳୀନ ସଂକେତ ମିଳିଥିଲା। ଧକ୍କା ହେବାର ମାତ୍ର ୧୧ ମିନିଟ୍ ମଧ୍ୟରେ ‘ତୁଗବର୍କ ଇମାମୋଗ୍ଲୁ’ ଜାହାଜଟି ଦ୍ରୁତ ଗତିରେ ସମୁଦ୍ର ଗର୍ଭରେ ବୁଡ଼ିଯାଇଥିଲା। ତେବେ ‘ଅଲସୁ’ ଟ୍ୟାଙ୍କରର କୌଣସି ବିଶେଷ କ୍ଷତି ହୋଇନଥିବା ଜଣାପଡ଼ିଛି। ଜାହାଜ ବୁଡ଼ିଯିବା ପରଠାରୁ ତାହାର କ୍ୟାପଟେନ୍ଙ୍କ ସମେତ ସମସ୍ତ ୧୦ ଜଣ ତୁର୍କୀ ନାବିକଙ୍କ ସହ ଯୋଗାଯୋଗ ବିଚ୍ଛିନ୍ନ ହୋଇଯାଇଛି। ତୁର୍କୀ ସାମୁଦ୍ରିକ କର୍ତ୍ତୃପକ୍ଷ, କୋଷ୍ଟଗାର୍ଡ ଏବଂ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ସନ୍ଧାନ ଅଭିଯାନ ଆରମ୍ଭ କରିଛନ୍ତି। ସମୁଦ୍ର ମଧ୍ୟରୁ ବୁଡ଼ିଯାଇଥିବା ଜାହାଜର ଲାଇଫ୍ବୋଟ୍, ଲାଇଫ୍ ବୟ ଏବଂ କିଛି ଭଗ୍ନାବଶେଷ ମିଳିଥିଲେ ହେଁ ନିଖୋଜ ନାବିକଙ୍କର କୌଣସି ସନ୍ଧାନ ମିଳିପାରି ନାହିଁ। ବର୍ତ୍ତମାନ ସୁଦ୍ଧା କାହାକୁ ଜୀବନ୍ତ ଉଦ୍ଧାର କରାଯାଇ ପାରିନାହିଁ।