ନୂଆଦିଲ୍ଲୀ: ପାର୍ବଣ ଋତୁରେ ଗୃହପୋଯୋଗୀ ଇଲେକ୍ଟ୍ରୋନିକ୍ସ ସାମଗ୍ରୀ କିଣିବାକୁ ଯୋଜନା କରୁଥିବା ଗ୍ରାହକଙ୍କ ପକେଟ୍ ଉପରେ ପଡ଼ିବାକୁ ଯାଉଛି ଅତିରିକ୍ତ ବୋଝ। ଅନ୍ତର୍ଜାତୀୟ ବଜାରରେ ତମ୍ବା, ଆଲୁମିନିୟମ୍, ଷ୍ଟିଲ୍ ଏବଂ କ୍ରୁଡ୍ ଅଏଲ୍ ଭଳି କଞ୍ଚାମାଲ ଦର ବୃଦ୍ଧି ପାଇଥିବାରୁ ଅକ୍ଟୋବର ୧ ତାରିଖରୁ ଏସି, ଟିଭି, ଫ୍ରିଜ୍ ଓ ୱାଶିଂ ମେସିନ୍ ମୂଲ୍ୟ ୧% ରୁ ୮% ପର୍ଯ୍ୟନ୍ତ ବଢ଼ାଇବାକୁ କମ୍ପାନୀଗୁଡ଼ିକ ନିଷ୍ପତ୍ତି ନେଇଛନ୍ତି।
ଶିଳ୍ପ ବିଶେଷଜ୍ଞଙ୍କ ମତରେ, ଏୟାର କଣ୍ଡିସନର (ଏସି) ମୂଲ୍ୟ ସର୍ବାଧିକ ୫% ରୁ ୮% ବୃଦ୍ଧି ପାଇବାକୁ ଥିବା ବେଳେ ୱାଶିଂ ମେସିନ୍, ରେଫ୍ରିଜରେଟର୍ ଏବଂ ଏଲ୍ଇଡି ଟିଭି ମୂଲ୍ୟ ୩% ରୁ ୪% ପର୍ଯ୍ୟନ୍ତ ବଢ଼ିପାରେ। ବ୍ଲୁ ଷ୍ଟାର୍, ଗୋଦରେଜ୍, ହାୟର, ଡାଇକିନ୍ ଏବଂ ସୁପର ପ୍ଲାଷ୍ଟ୍ରୋନିକ୍ସ ଭଳି ପ୍ରମୁଖ କମ୍ପାନୀ ୪% ରୁ ୧୦% ପର୍ଯ୍ୟନ୍ତ ଦର ବୃଦ୍ଧି ନିଶ୍ଚିତ କରିସାରିଛନ୍ତି। ଏଲ୍ଜି ଏବଂ ହିଟାଚି ସେମାନଙ୍କ ଏସି ମୂଲ୍ୟ ୫% ପର୍ଯ୍ୟନ୍ତ ବଢ଼ାଇ ସାରିଥିବା ବେଳେ ପାନାସୋନିକ୍ ସ୍ଥିତି ସମୀକ୍ଷା କରୁଛି। ହାୟର ଇଣ୍ଡିଆ ସଭାପତି ଏନ୍. ଏସ୍. ସତୀଶ କହିଛନ୍ତି ଯେ, ବର୍ଷକ ମଧ୍ୟରେ ତମ୍ବା ଦର ମେଟ୍ରିକ୍ ଟନ୍ ପିଛା ୮,୦୦୦-୯,୦୦୦ ଡଲାରରୁ ବୃଦ୍ଧି ପାଇ ୧୪,୫୦୦ ଡଲାରରେ ପହଞ୍ଚିଛି। ଗୋଟିଏ ଏସିରେ ୩ରୁ ୪ କିଲୋଗ୍ରାମ ତମ୍ବା ଆବଶ୍ୟକ ହେଉଥିବାରୁ କମ୍ପାନୀ ଆସନ୍ତା ୧ରୁ ଏସି ମୂଲ୍ୟ ୫% ବଢ଼ାଇବାକୁ ବାଧ୍ୟ ହୋଇଛି। ଅକ୍ଟୋବରରୁ ଜାନୁଆରୀ ମଧ୍ୟରେ ବିଭିନ୍ନ ପର୍ଯ୍ୟାୟରେ ମୋଟ ୧୫% ପର୍ଯ୍ୟନ୍ତ ଦର ବୃଦ୍ଧି ଘଟିବା ଆକଳନ କରାଯାଉଛି।
ତେବେ ପାର୍ବଣ ଋତୁର ବିକ୍ରି ଉପରେ ଏହାର ପ୍ରଭାବ ସୀମିତ ରହିବ ବୋଲି କମ୍ପାନୀଗୁଡ଼ିକ ଆଶା ରଖିଛନ୍ତି। ଅଧିକାଂଶ ଡିଲର୍ ଓ ଡିଷ୍ଟ୍ରିବ୍ୟୁଟର ଅଗଷ୍ଟ-ସେପ୍ଟେମ୍ବର ସ୍କିମ୍ ଅଧୀନରେ ପୁରୁଣା ଷ୍ଟକ୍ ମଜୁଦ୍ ରଖିଛନ୍ତି। ସପ୍ଲାଇ ପାଇପଲାଇନରେ ଏବେ ମଧ୍ୟ ୧ରୁ ୧.୫ ମାସର ପୁରୁଣା ଷ୍ଟକ୍ ଥିବାରୁ ଗ୍ରାହକମାନେ ଦୀପାବଳି ପର୍ଯ୍ୟନ୍ତ ପୁରୁଣା ଦରରେ ହିଁ ଇଲେକ୍ଟ୍ରୋନିକ୍ସ ସାମଗ୍ରୀ କିଣିପାରିବେ। ନୂଆ ବୋର୍ଡ ମୂଲ୍ୟ ଦୀପାବଳି ପରେ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ ହେବ।