ନୂଆଦିଲ୍ଲୀ: ଦେଶରେ ସାଇବର ଠକେଇ ମାମଲା ବଢ଼ି ବଢ଼ି ଚାଲିଛି। ଏଥିରେ ସବୁଠୁ ଭୟଙ୍କର ହୋଇଛି “ଡିଜିଟାଲ୍ ଅରେଷ୍ଟ୍” ଠକେଇ। ଠକ୍ ନିଜକୁ ପୁଲିସ୍, CBI ଓ ଅନ୍ୟ ସରକାରୀ ସଂସ୍ଥାର ଅଧିକାରୀ ବୋଲି କହି ଫୋନ୍ କରନ୍ତି, ଗିରଫ କରିବାର ଭୟ ଦେଖାଇ ଟଙ୍କା ଲୁଟନ୍ତି।
୨୦୨୬ରେ କେବଳ ଏହି ସ୍କାମ୍ରେ ଭାରତୀୟଙ୍କଠୁ ପ୍ରାୟ ୮୦୦ କୋଟି ଟଙ୍କା ଠକେଇ ହୋଇସାରିଛି। ଏହା ସେତେବେଳେ ହୋଇଛି ଯେତେବେଳେ ସାଇବର ଅପରାଧ ମାମଲାରେ ପ୍ରାୟ ୫୦% ହ୍ରାସ ହୋଇଥିବା କୁହାଯାଉଛି।
ସୁପ୍ରିମ୍ କୋର୍ଟଙ୍କ କଡ଼ା ଆଭିମୁଖ୍ୟ:
ସୁପ୍ରିମ୍ କୋର୍ଟ ହ୍ୱାଟ୍ସଆପ୍ ଓ ଅନ୍ୟ ଡିଜିଟାଲ୍ କମ୍ପାନୀଙ୍କୁ ନିର୍ଦ୍ଦେଶ ଦେଇଛନ୍ତି – ଡିଜିଟାଲ୍ ଅରେଷ୍ଟ୍ ଓ ସାଇବର ଠକେଇ ରୋକିବା ପାଇଁ କଣ ପଦକ୍ଷେପ ନେଉଛନ୍ତି, ତାହା କୋର୍ଟ ଓ ଆଇ୪ସି – ଭାରତୀୟ ସାଇବର ଅପରାଧ ସମନ୍ୱୟ କେନ୍ଦ୍ର ଆଗରେ ରଖନ୍ତୁ।
ହ୍ୱାଟ୍ସଆପ୍ କୋର୍ଟଙ୍କୁ କହିଛି – ଠକେଇ ସହ ଜଡ଼ିତ ପ୍ରାୟ ୯,୪୦୦ ଆକାଉଣ୍ଟ୍ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯାଇଛି। କମ୍ପାନୀ ଏମିତି ସଫ୍ଟୱେର୍ ବନାଉଛି, ଯାହା ସନ୍ଦେହଜନକ ଆକାଉଣ୍ଟ୍ ଚିହ୍ନଟ କରି ୟୁଜରଙ୍କୁ ସତର୍କ କରିବ।
ବ୍ୟାଙ୍କ୍ ମଧ୍ୟ ଦାୟୀ ହେବେ:
କୋର୍ଟ କହିଛନ୍ତି ଯେ, ଯଦି ତଦନ୍ତରେ ପ୍ରମାଣିତ ହୁଏ ଯେ ବ୍ୟାଙ୍କ ନିଜ ଦାୟିତ୍ୱ ଠିକ୍ ଭାବେ ତୁଲାଇ ନାହିଁ ଓ ତା’ର ଅବହେଳା ପାଇଁ ଗ୍ରାହକ ଠକେଇର ଶିକାର ହେଲେ, ତେବେ ବ୍ୟାଙ୍କକୁ ଗ୍ରାହକଙ୍କ କ୍ଷତି ଭରଣା କରିବାକୁ ପଡ଼ିବ।
RBI କୁ ନୂଆ ନିୟମ ବନାଇବାକୁ ନିର୍ଦ୍ଦେଶ:
ସନ୍ଦେହଜନକ ଲେଣଦେଣକୁ ସାମୟିକ ରୋକିବା
ଗ୍ରାହକଙ୍କ ପୁରୁଣା ଲେଣଦେଣ ଆଧାରରେ ଅସ୍ୱାଭାବିକ କାରବାର ଚିହ୍ନଟ କରିବା
ସନ୍ଦେହଜନକ ଲେଣଦେଣ ବିଷୟରେ ପୁଲିସକୁ ଜଣାଇବା
ପୀଡ଼ିତଙ୍କୁ ଉଚିତ୍ କ୍ଷତିପୂରଣ ବ୍ୟବସ୍ଥା କରିବା
ବ୍ୟାଙ୍କ ଅବହେଳା ପାଇଁ ଉତ୍ତରଦାୟୀ ନିର୍ଦ୍ଧାରଣ କରିବା
ପୁଲିସକୁ ବି ରିପୋର୍ଟ ଦେବାକୁ ପଡ଼ିବ:
ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ପୁଲିସକୁ ଡିଜିଟାଲ୍ ଅରେଷ୍ଟ୍ ମାମଲାରେ ଦାୟର FIR ଓ ତଦନ୍ତ ବିଷୟରେ ରିପୋର୍ଟ ଦେବାକୁ କୋର୍ଟ କହିଛନ୍ତି। ପରବର୍ତ୍ତୀ ଶୁଣାଣି ୨୩ ନଭେମ୍ବର ୨୦୨୬ରେ ହେବ।
ସତର୍କ ରୁହନ୍ତୁ:
ପୁଲିସ୍, CBI କେବେ ବି ଫୋନ୍/ଭିଡିଓ କଲ୍ ରେ ଡିଜିଟାଲ୍ ଅରେଷ୍ଟ୍ କରନ୍ତି ନାହିଁ। ଏମିତି କଲ୍ ଆସିଲେ ଭୟଭୀତ ନ ହୋଇ ଫୋନ୍ କାଟି ୧୯୩୦ରେ ଅଭିଯୋଗ କରନ୍ତୁ।