ସୀତାରାମ ଅଗ୍ରୱାଲ
ଚିଲିକା: ସାଧାରଣ ନିର୍ବାଚନ ଆଉ ମାତ୍ର ମାସ କେଇଟା ଥିବା ବେଳେ ଚିଲିକା ନିର୍ବାଚନ ମଣ୍ଡଳି ରାଜନୀତି ସମ୍ପୂର୍ଣ୍ଣ ଗୋଳିଆ ହୋଇଛି। ବିରୋଧି ବିଜେପିର ଉଭୟ ବିଧାୟକ ଓ ସାଂସଦ ପ୍ରାର୍ଥୀ ପ୍ରାୟତଃ ନିଶ୍ଚିତ ହୋଇସାରିଥିବା ବେଳେ ଶାସକ ବିଜେଡିର ଏ ପର୍ଯ୍ୟନ୍ତ ଅଙ୍କ ଛିଣ୍ଡିପାରି ନାହିଁ।
ବିଜେଡିରୁ ନିଲମ୍ବିତ ଚିଲିକା ବିଧାୟକ ପ୍ରଶାନ୍ତ ଜଗଦେବ ସୁପ୍ରିମ କୋର୍ଟ ନିର୍ଦ୍ଦେଶ ଅନୁଯାୟୀ ନିଜ ନିର୍ବାଚନ ମଣ୍ଡଳିରୁ ବର୍ଷକ ପାଇଁ ଦୁରେଇ ରହିଛନ୍ତି। ଫଳରେ ଚିଲିକାରେ ଶାସକ ବିଜେଡି ଏକ ପ୍ରକାର ନେତୃତ୍ବ ହୀନ ହୋଇପଡିଛି। ବିଜେପିକୁ କାଉଣ୍ଟର କରିବା ପାଇଁ ବିଜେଡିର କୌଣସି ସ୍ଥାନୀୟ ନେତା ଫ୍ରଣ୍ଟଲାଇନକୁ ଆସିପାରୁ ନାହାଁନ୍ତି।
ଅନ୍ୟପକ୍ଷରେ ଏବେବି ଟିକେଟ ଆଶାୟୀ ଥିବା ପୂର୍ବତନ ରଘୁନାଥ ସାହୁ ଏକଲା ଚଲୋ ନିତିରେ ସଂଗଠନ କାର୍ଯ୍ୟକ୍ରମ ଜାରି ରଖିଛନ୍ତି। ନିର୍ବାଚନ ମଣ୍ଡଳିର ପ୍ରତି ଛୋଟଛୋଟ କାର୍ଯ୍ୟକ୍ରମରେ ସାମିଲ ହୋଇ ଟିକେଟର ପ୍ରଥମ ଦାବିଦାର ବୋଲି ଦଳକୁ ସନ୍ଦେଶ ଦେବା ପାଇଁ ଚେଷ୍ଠା କରୁଛନ୍ତି। ଏପରିକି ରଘୁନାଥଙ୍କୁ ଯଦି ଦଳ ଟିକେଟ ନ ଦିଏ ତେବେ ସେ ସ୍ୱାଧୀନ ପ୍ରାର୍ଥୀ ଭାବେ ମୈଦାନକୁ ଓହ୍ଲାଇବେ ବୋଲି ତାଙ୍କ ସମର୍ଥକ ମାନେ କହି ବୁଲିଲେଣି।
ଏପରି ପରିସ୍ଥିତିରେ ପଞ୍ଚାୟତ ଏବଂ ଏନଏସି ସ୍ତରର ନେତାମାନେ ମଧ୍ୟ ବିଧାୟକ ପ୍ରାର୍ଥୀ ହେବା ସ୍ବପ୍ନ ଦେଖିବା ଆରମ୍ଭ କଲେଣି। ଯାହାକି ସୋସିଆଲ ମିଡ଼ିଆ ପୋଷ୍ଟରୁ ସ୍ପଷ୍ଟ ବାରି ହୋଇପଡୁଛି। ପାଖାପାଖି ଦଶ ବିଜେଡି ନେତା ବିଧାୟକ ଟିକେଟ ପାଇଁ ଆଶାୟୀ ରହିଛନ୍ତି। ଦିନକୁ ଦିନ ଏହି ତାଲିକା ମଧ୍ୟ ବଢିବାରେ ଲାଗିଛି।
ନୂଆ ଆଶାୟୀଙ୍କ ମଧ୍ୟରେ ଅଛନ୍ତି ବିଧାୟକଙ୍କ ପ୍ରତିନିଧି ତଥା କୁମାରାଙ୍ଗ ପଞ୍ଚାୟତର ପୂର୍ବତନ ସରପଞ୍ଚ ଏବଂ ବର୍ତ୍ତମାନ ସରପଞ୍ଚଙ୍କ ସ୍ୱାମୀ ମନୋଜ ପ୍ରଧାନ। ମନୋଜଙ୍କ ସମର୍ଥକମାନେ ସୋସିଆଲ ମିଡିଆରେ କରୁଥିବା ପୋଷ୍ଟ ଗୁଡିକରୁ ଏହା ସ୍ପଷ୍ଟ ବାରି ହୋଇପଡୁଛି। ସେ ମଧ୍ୟ ବିଧାୟକ ପ୍ରାର୍ଥୀ ବୋଲି ନିଜକୁ ପରୋକ୍ଷରେ ଦାବୀ କରିବାରେ ଲାଗିଛନ୍ତି।
ନିକଟରେ ବିଧାୟକ ଜଗଦ୍ଦେବଙ୍କ ଗ୍ରାଣ୍ଡ ଏଣ୍ଟ୍ରି କରିବା ପାଇଁ ଯେଉଁ ପ୍ରସ୍ତୁତି ବୈଠକ କରିଥିଲେ ସେଥିରେ ବିଜେଡିର ବହୁ ଆଗଧାଡ଼ିର ନେତା ତଥା ନିର୍ବାଚିତ ପ୍ରତିନିଧି ଅନୁପସ୍ଥିତ ଥିଲେ। ବିଶେଷ ସୂତ୍ର ମୁତାବକ ଅନୁପସ୍ଥିତ ନେତାମାନଙ୍କ ଉଦେଶ୍ୟ କିଛି ଅଲଗା ରହିଛି। ସେମାନେ ଏଥର ଚିଲିକାରେ ଆମଦାନୀ ନେତା ନୁହଁ ବରଂ ସ୍ଥାନୀୟ ନେତା ବିଜେଡିରୁ ବିଧାୟକ ହୁଅନ୍ତୁ ବୋଲି କର୍ମୀ ଏବଂ ନେତାମାନେ ଚାହୁଁଛନ୍ତି।
ଗୋଟିଏ ପଟେ ବିଜେପି ତାହାର ରଣନୀତି ପୁର୍ବରୁ ପ୍ରସ୍ତୁତ କରି ସଂଗଠନ ଜାରି ରଖିଥିବା ବେଳେ ଅନ୍ୟପକ୍ଷେ ବିଜେଡିର ନେତାମାନେ ପରସ୍ପର କନ୍ଦଳରେ ବ୍ୟସ୍ତ ଅଛନ୍ତି। ଯାହାକି ଦଳ ପାଇଁ ଅଡୁଆ ପରିସ୍ଥିତି ସୃଷ୍ଟି କରୁଛି। ଏପରି ଗୋଳିଆ ସ୍ଥିତି ଦେଖି ଶାସକ ଦଳ କି ପ୍ରକାରର ଗୋଟି ଚାଳନା କରିବ ତାହା ଜଣାପଡି ନାହିଁ।
ତେବେ ସମସ୍ତଙ୍କ ନଜର ରହିଛି ଜୁଲାଇ ୨୮ ତାରିଖକୁ। କାରଣ ଉକ୍ତ ଦିନ ଚିଲିକା ବିଧାୟକ ପ୍ରଶାନ୍ତ ଜଗଦେବ ନିଜ ନିର୍ବାଚନମଣ୍ଡଳିକୁ ଗ୍ରାଣ୍ଡ ଏଣ୍ଟ୍ରି ମାରିବେ। ଏଥିପାଇଁ ଚାଲିଛି ବିରାଟ ଆୟୋଜନ। ତେବେ ବିଧାୟକ ନିର୍ବାଚନ ମଣ୍ଡଳିକୁ ଆସିବା ପରେ ଅସଲି ରାଜନୈତିକ ଖେଳ ଆରମ୍ଭ ହେବ ବୋଲି ଜଣାପଡିଛି। ସେତେବେଳେ ଚିଲିକାରେ ବିଜେଡି ସ୍ଥିତିର ଆକଳନ କରି ହେବ।